Կարգախոսներով եւ առանց. նախընտրական քարոզարշավը մեկնարկեց

Մեկնարկեց նախագահական ընտրությունների պաշտոնական քարոզարշավի փուլը: Այսօրվանից մինչեւ փետրվարի 17-ը, ՀՀ նախագահի թեկնածուները կներկայացնեն իրենց արժանիքներն, ու նրանցից յուրաքանչյուրը կփորձի հասարակությանը համոզել, թե ինչո՞ւ ժողովուրդը պիտի ընտրի հատկապես իրեն:

Իհարկե, քաղաքական որոշ դիտորդներ կանխատեսում են, որ այս ընտրություններում թե՛ իշխանության թեկնածուն եւ թե ընդդիմադիր դաշտը ներկայացնող նախագահի թեկնածուները զբաղվելու են փոխադարձ քաղաքական ստրիպտիզով՝ ջրի երես հանելով միմյանց դեմ եղած հնարավոր ու անհնար բոլոր կոմպրոմատները եւ միմյանց մեղադրելով հնարավոր ու անհնար բոլոր մեղքերի մեջ, սակայն ՀՀ նախագահի 11 թեկնածուների շտաբներն էլ երդվում են, որ դուրս չեն գալու քաղաքակիրթ պայքարի շրջանակներից: Բայց նաեւ ավելացնում են՝ եթե մրցակիցները չհրահրեն: Ինչեւէ, այսօր արդեն հանրապետության ողջ տարածքով, գրեթե բոլոր հաստատությունների պատերին՝ ֆաս, անֆաս ու պրոֆիլ, փակցված են լինելու նախագահի 11 թեկնածուների գովազդային պաստառներն ու  կարգախոսները: Եւ այսպես, ի՞նչ կարգախոսներ են իրենց համար ընտրել նախագահի 11 թեկնածուները, եւ  ո՞ր մարզից է նրանցից  յուրաքանչյուրը սկսելու իր քարոզարշավը: Գործող նախագահ, ՀՀ նախագահի թեկնածու  Ռոբերտ Քոչարյանի կարգախոսին մենք արդեն անդրադարձել ենք. ինչպես մեր զրույցում նշեց Քոչարյանի նախընտրական շտաբի քարոզչության պատասխանատու Վահագն Մկրտչյանը՝ նախագահն իր ընտրողներին առաջարկում է առաջիկա հինգ տարիներին եւս աշխատել միասին: Բացի այդ,  հունվարի 22-ից կգործի թեկնածու Ռոբերտ Քոչարյանի ինտերնետային էջը, որից հասարակությունը կարող է տեղեկանալ նրա առաջիկա բոլոր հանդիպումներին: Ինտերնետային էջում, բնականաբար, կտեղադրվեն  նաեւ շտաբի մամլո ծառայութան հաղորդագրությունները: Ի դեպ, չնայած ժամանակին, մեզ հետ մի զրույցի ընթացքում պարոն Մկրտչյանը չէր բացառել, որ իրենք քննարկելու են նաեւ սեւ PR օգտագործելու տարբերակը, սակայն երեկ վստահաբար հայտարարեց, որ հակաքարոզչություն չի օգտագործվի: Պարզվեց, եթե ուզենան էլ՝ չեն կարող օգտագործել, քանզի  սեւ PR-ի գիրքն ընդդիմադիր մի լրագրող Քոչարյանի շտաբից տարել ու մինչ օրս չի վերադարձրել: Թեկնածու Քոչարյանի քարոզչության պատասխանատուն տեղեկացրեց նաեւ, որ իրենց թեկնածուի գովազդային վահանակներ քաղաքում չեն փակցվի: Փոխարենը, թեկնածու Քոչարյանն անձամբ կայցելի հանրապետության բոլոր մարզերը՝ քարոզարշավի առաջին տասնօրյակում լինելով Արարատի, Արմավիրի,  Տավուշի, Կոտայքի եւ Գեղարքունիքի մարզերում: Ինչ վերաբերում է ՀՀ նախագահի թեկնածու Ստեփան Դեմիրճյանին, ապա վերջինս ունի նախընտրական երկու կարգախոս՝ «Արդարություն եւ արժանապատվություն» եւ «Համախմբված Ժողովուրդը կհաղթանակի»: Ինչպես մեզ տեղեկացրեց ՀԺԿ նախագահի շտաբի պետ Գրիգոր Հարությունյանը, Ստեփան Դեմիրճյանի առաջին այցը լինելու է հունվարի 22-ին՝ Լոռու մարզ: ՀԺԿ նախագահը կլինի հանրապետության բոլոր մարզերում եւ մայրաքաղաքի բոլոր համայնքներում: Որեւէ մարզ առանց այցելության չի թողնելու նաեւ «ԱՄ» նախագահ Արտաշես Գեղամյանը. վերջինիս նախընտրական կարգախոսն է՝ «Փետրվարի 19-ին միասին փրկենք Հայրենիքը»: Ինչ վերաբերում է նախընտրական առաջին այցերին, ապա «ԱՄ» շտաբի պետ Ալեքսան Կարապետյանը մեզ տեղեկացրեց, որ  առաջիկա մեկ-երկու օրերին նոր այցերի գրաֆիկը վերջնական տեսքի կբերվի: Ի դեպ, ի տարբերություն թեկնածուներ Քոչարյանի եւ Դեմիրճյանի, որոնք քաղաքի համայնապատկերին իրենց գովազդային վահանակները չեն փակցնի, Արտաշես Գեղամյանի շտաբի պետը տեղեկացրեց, որ իրենք օգտագործելու են քարոզչության համար նախատեսված  հնարավոր բոլոր միջոցները, այդ թվում նաեւ՝ գովազդային վահանակները: Բացի այդ, արդեն իսկ թողարկվել են Գեղամյանի լուսանկարով օրացույցներ եւ կրծքանշաններ: ՀՀ նախագահի հաջորդ թեկնածու, «Հանրապետություն» կուսակցության անդամ Արամ Սարգսյանը, ըստ վերջինիս նախընտրական շտաբի քարոզչության պատասխանատու Սուրեն Սուրենյանցի, ունի մոտ մեկ տասնյակ նախընտրական կարգախոսներ, որոնցից մեկն է՝ «Ընտրեք լույսը»: «Մենք եւս օգտագործելու են ինֆորմացիոն բոլոր ռեսուրսները»,- վստահեցրեց Ս.  Սուրենյանցը: Իսկ Արամ Զավենի Սարգսյանի առաջին նախընտրական այցը կլինի Արագածոտնի մարզ՝ հունվարի 22-ին: Թեկնածու Արամ Կարապետյանի նախընտրական կարգախոսն է՝ «Գալիս են նոր ժամանակներ»: Վերջինիս շտաբից տեղեկացրեցին, որ առաջիկա օրերին իրենց թեկնածուն շատ կարեւոր գործերով կմեկնի Մոսկվա, որից հետո նոր իրենք կկազմեն  նախընտրական այցերի գրաֆիկը: Ինչ վերաբերում է ԱԺՄ նախագահ Վազգեն Մանուկյանին, ապա վերջինիս նախընտրական  կարգախոսն է՝ «Համարձակվեք դառնալ երկրի տերը, եւ երկիրը կունենա ապագա»: ԱԺՄ նախագահի  շտաբի պետ Ալեքսանդր Բուտաեւը մեզ տեղեկացրեց, որ իրենց թեկնածուն եւս լինելու է հանրապետության բոլոր մարզերում, իսկ առաջին այցը նա կկատարի Սյունիք՝ հունվարի 24-ին:  ՀԿԿ թեկնածու Վլադիմիր Դարբինյանի նախընտրական կարգախոսն է՝ «Հայրենիք, աշխատանք, սոցիալիզմ»: Վերջինիս շտաբի պետ Սանատրուկ Սահակյանը մեզ  տեղեկացրեց, որ իրենց կուսակցության հնարավորությունները սահմանափակ են, ուստի իրենք շատ շռայլ քարոզարշավ չեն անի: Իսկապես, ի՞նչ իմաստ ունի ավելորդ փողեր ծախսելը, երբ,  միենույն է, Վլադիմիր Սարգիսովիչն իր թեկնածությունը հանելու է՝ հօգուտ Արտաշես Գեղամյանի: Այս առումով առավել պրագմատիկ է «Սոցիալիստական Հայաստան» միավորման թեկնածու Գառնիկ Մարգարյանը: Նա մեզ հետ զրույցում նշեց, որ ինքն առանձին կարգախոս չի ունենալու. ««Ազգային միաբանության» կարգախոսը լինելու է «Ազգային համաձայնության» դաշինքի, այսինքն՝ «ԱՄ»-ի, ՀԿԿ-ի եւ «Սոց.Հայաստանի» միացյալ կարգախոսը»,-վստահեցրեց պարոն Մարգարյանը:  Իսկ ՀԴԿ թեկնածու Արամ Սարգսյանի նախընտրական կարգախոսն է՝ «Երկրին՝ արդարություն, ժողովրդին՝ աշխատանք»: Վերջինիս առաջին այցը կլինի կա՛մ Գյումրի, կա՛մ Մարտունի: Իսկ առաջիկա շաբաթում ՀԴԿ-ն մայրաքաղաքում սյուրպրիզ է խոստանում, որը կուսակցության նախընտրական շտաբում չցանկացան բացահայտել: ՀՀ նախագահի թեկնածու Ռուբեն Ավագյանի նախընտրական կարգախոսն է՝ «Օրենքի գերակայություն եւ սոցիալ-իրավական պետություն»: Այս թեկնածուն եւս որոշել է իր ընտրողների հետ հանդիպել, ու նրա առաջին այցը լինելու Է Սյունիք: Ինչ վերաբերում է նախագահի թեւկնածու, ԵՊՀ դասախոս Արամ Հարությունյանին, ապա վերջինս մեզ հետ զրույցում համառորեն չէր ցանկանում բացահայտել իր նախընտրական կարգախոսները՝ պնդելով, թե նման գաղտնապահությունը գրեթե բոլոր  դասախոսներին բնորոշ հիվանդություն է: Այդուհանդերձ, մի կերպ համաձայնեց  բացահայտել իր բազմաթիվ նախընտրական կարգախոսներից մեկը. այն է՝ «Ազգային համաձայնության հասարակություն»: Ահա այսպիսի կարգախոսներով են մեր թեկնածուներն ուղիղ մեկ ամիս փորձելու հասարակությանը համոզել, որ  իրենցից լավը չկա: Բնականաբար, դրան գումարած՝ քարոզչության ընթացքում օգտագործվող սեւ ու սպիտակ ընտրական տեխնոլոգիաներն էլ  հետը:

Նաիրա Զոհրաբյան

Տպագրվել է «Հայկական Ժամանակ» օրաթերթի՝ 2003 թվականի հունվարի 21-ի համարում