Նախկին տարածքային կառավարման նախարարության աշխատակիցները «էքսկուրսիա» գնացին ու վերադարձան

ՀՀ արտակարգ իրավիճակների եւ տարածքային կառավարման նախարարությունները հասցրին միավորվել ու տարանջատվել ընդամենը մեկ տարի երկու ամսվա ընթացքում: Նշված գերատեսչությունները մեկն էին դարձել ու տարածքային կառավարման եւ արտակարգ իրավիճակների նախարարություն անվանվել Սերժ Սարգսյանի՝ 2014 թվականի դեկտեմբերի 1-ի հրամանագրով: Իսկ արդեն «ապահարզանի» հրամանագիրը եղավ 2016-ի փետրվարի 24-ին, ժամանակին խոշորացված գերատեսչությունն էլ վերակազմակերպվեց արտակարգ իրավիճակների եւ առանձին տարածքային կառավարման ու զարգացման նախարարությունների:

Նախկին տարածքային կառավարման նախարարության աշխատակազմը սկզբում տեղափոխվեց արտակարգ իրավիճակների նախարարության Դավթաշենում գտնվող մասնաշենք, իսկ այժմ վերադարձել է «տուն»՝ Հանրապետության հրապարակի թիվ 2 կառավարական շենք: Բայց կրկին անջատված այս նախարարության վերաբերյալ առայժմ միայն Սերժ Սարգսյանի հրամանագիրը կա, իսկ ահա հրամանագրից բխող կառավարության որոշումներ, որոնց համար մեկամսյա ժամկետ էր սահմանված, դեռեւս ընդունված չեն: Հաստատված չէ, օրինակ, տարածքային կառավարման եւ զարգացման նախարարություն վերանվանված գերատեսչության կառուցվածքը, հաստիքացուցակը: Բայց, չնայած դրան՝ գերատեսչությունը աշխատում է:

«ՀՀ տարածքային կառավարման եւ արտակարգ իրավիճակների նախարարության վերակազմակերպման մասին ՀՀ Նախագահի հրամանագրից բխող համապատասխան որոշումները արդեն շրջանառվում են, սահմանված ժամկետներում կհաստատվեն նախարարության կանոնադրությունը, կառուցվածքը եւ հաստիքների թվաքանակը»,- մեր գրավոր հարցմանը պատասխանելով՝ հայտնել են տարածքային կառավարման եւ զարգացման նախարարությունից:

Նշենք, որ երկու նախարարությունների միավորումից հետո տարածքային կառավարման նախարարության աշխատակիցների մեծ մասը շարունակել էր մնալ եւ աշխատել Հանրապետության հրապարակում գտնվող շենքում: Փոխնախարարներն, օրինակ, ըստ մեր տեղեկությունների, չէին տեղափոխվել Արմեն Երիցյանի ղեկավարած ԱԻՆ-ի մասնաշենք: Չտեղափոխվելու պատճառների ու գնացածների վերադարձի մասին մեր հարցմանն էլ տարածքային կառավարման եւ զարգացման նախարարությունից պատասխանել են. «ՀՀ Արտակարգ իրավիճակների նախարարության եւ ՀՀ տարածքային կառավարման նախարարության միավորումից հետո վերջինիս աշխատակազմը մասնակի էր տեղափոխվել ԱԻՆ մասնաշենք` աշխատակազմի ֆունկցիոնալ ստորաբաժանումների աշխատանքները լիարժեք կատարելու նկատառումներից ելնելով: ՀՀ տարածքային կառավարման եւ զարգացման նախարարության աշխատակազմի ԱԻՆ մասնաշենք տեղափոխված թվով 21 աշխատակից  վերադարձել է  Կառավարական շենք 2`  2016 թ. փետրվարի 26-ին: ՀՀ տարածքային կառավարման նախարարության աշխատակազմը` 89 հաստիքով, միավորումից հետո ամբողջությամբ շարունակել է աշխատել նորաստեղծ նախարարությունում»:

Այստեղից նաեւ տեղեկացնում են, որ նախարարության հաստիքացուցակը հաստատվելուց եւ համապատասխան պաշտոններում վերանշանակումներ կատարելուց հետո առաջացած բոլոր թափուր պաշտոնները կհամալրվեն մրցույթով` քաղաքացիական ծառայության ՀՀ օրենսդրությամբ սահմանված կարգով եւ ժամկետներում: Առանձին հարցով հետաքրքրվել էինք նաեւ աշխատակազմի ղեկավարի մասին: Հայտնի է, որ տարածքային կառավարման նախարարության աշխատակազմի ղեկավար Կարեն Իսախանյանը  նախարարությունների միավորումից հետո նշանակվել էր փոխնախարար, եւ երկուսը մեկում գերատեսչության փոխնախարարների թիվը դարձել էր հինգը: Ուստի, փորձել էինք պարզել, թե տարածքային կառավարման եւ զարգացման նախարարության աշխատակազմի ղեկավարի պաշտոնի համար մրցույթ կանցկացվի՞, թե՞ Իսախանյանը մեխանիկորեն կվերադառնա նախկին պաշտոնին: Մեզ պատասխանել են, որ աշխատակազմի ղեկավարի թափուր պաշտոնը կհամալրվի քաղաքացիական ծառայության ՀՀ օրենսդրությամբ սահմանված կարգով:

Հարց է առաջանում նաեւ, թե գերատեսչությունների վերակազմակերպման ընթացքում կարո՞ղ է աշխատավարձերի խնդիր առաջանալ եւ արդյոք ըստ էության նորաստեղծ նախարարության աշխատակիցներին աշխատավարձ վճարվելո՞ւ է վերակազմակերպման հրամանագրին հաջորդած եւ կառավարության համապատասխան որոշումների ընդունմանը նախորդած ժամանակահատվածի համար: «Նորաստեղծ նախարարության աշխատակազմի աշխատակիցներին աշխատավարձը վճարվում է ժամանակին»,- պատասխանել  են ՏԿԶ  նախարարությունից: