Սպորտ եւ քաղաքականություն. ՄՕԿ-ը չհանձնվեց

Հուլիսի 24-ին Միջազգային օլիմպիական կոմիտեն (ՄՕԿ) արտահերթ նիստում որոշում ընդունեց Ռուսաստանին չզրկել Օլիմպիական խաղերին մասնակցելու իրավունքից, եւ հրապարակեց այն պարտավորությունների ցանկը, որոնց կատարումը պարտադիր է ռուսաստանցի մարզիկների համար: Ընդամենը 10 օրից Բրազիլիայում մեկնարկող ամառային Օլիմպիական խաղերին կարող են մասնակցել ռուսաստանցի այն մարզիկները, ովքեր նախ՝ երբեւէ առնչություն չեն ունեցել որեւէ դոպինգ սկանդալի հետ, չեն օգտագործել խթանիչներ, եւ 2-րդ՝ ռուսաստանցի մարզիկներին Օլիմպիական խաղերին մասնակցել թույլատրելու հարցը պետք է որոշեն տարբեր մարզաձեւերի միջազգային ֆեդերացիաները:

Սրանք են այն 2 հիմնական պահանջները, որոնք ընդունեց ՄՕԿ-ը եւ որոնք «կոշտ եւ աննախադեպ» որակեց ՄՕԿ նախագահ Թոմաս Բախը: ՄՕԿ-ը նաեւ արգելել է ռուսաստանցի ցանկացած պաշտոնյայի մուտքն Օլիմպիական խաղեր եւ երկարաձգել է Ռուսաստանում դոպինգի հետ կապված տեղեկություններն ուսումնասիրելու համար համաշխարհային հակադոպինգային կազմակերպության կողմից ստեղծված հատուկ հանձնաժողովի աշխատանքը: «Գնում ենք», - այս խոսքերով է դուրս եկել Ռուսաստանի Օլիմպիական կոմիտեի նախագահ Ալեքսանդր ժուկովը կիրակի օրը կայացած ՄՕԿ-ի արտահերթ նիստից, ինչը նշանակում է, որ Ռուսաստանի դրոշը ծածանվելու է «Ռիո 2016»-ում, ռուսաստանցի մարզիկները (որոշակի սահմանափակումներով) մասնակցելու են Օլիմպիական խաղերին:

Ռուսաստանում ընդունված որոշումը որակվեց որպես հնարավոր տարբերակներից ամենամեղմը: Ռուսաստանի սպորտի նախարար Վիտալի Մուտկոն անգամ շնորհակալություն հայտնեց ՄՕԿ-ի նախագահին նման որոշման համար: Իսկ ահա այլ երկրներում ՄՕԿ-ի որոշումն ընդունվել է մեծ դժգոհությամբ: Միջազգային մամուլը հեղեղված է ՄՕԿ-ի նախագահի հասցեին քննադատական խոսքերով: «Սա խայտառակություն է: ՄՕԿ-ի նախագահ Թոմաս Բախի եւ Վլադիմիր Պուտինի միջեւ հաստատված բարեկամական կապերն օգտագործվեցին ի շահ Ռուսաստանի եւ ընդդեմ Օլիմպիական սկզբունքների»,- գրել է անգլիական «The Telegraph»-ը. «Կիրակի օրը՝ հուլիսի 23-ին, ՄՕԿ-ը ոչնչացրեց Օլիմպիական խաղերը: Ամբողջապես կոռուպցիայի մեջ թաղված ռուսական սպորտը պետք է դուրս մնար միջազգային հանրության կազմից, իսկ Բախը վախեցավ ընդդիմանալ Պուտինին»,- գրել է «Daily Mail»-ը՝ հավելելով, որ Բախն անձնական համատեղ բիզնես՝ փայտամշակման գործարաններ, ունի Ռուսաստանում տեղի բարձրաստիճան մարզական պաշտոնյաների հետ:

Մոտավորապես, այս ինտոնացիայով է արտասահմանյան մամուլը գրում ՄՕԿ-ի ընդունած որոշման մասին: Մինչ ՄՕԿ-ի արտահերթ նիստը 14 առաջատար երկրների՝ ԱՄՆ-ի, Ավստրիայի, Կանադայի, Իսպանիայի, Գերմանիայի, Դանիայի, Նոր Զելանդիայի, Եգիպտոսի, Նորվեգիայի, Ֆինլանդիայի, Շվեդիայի, Ճապոնիայի, Շվեյցարիայի եւ Հոլանդիայի  ազգային Օլիմպիական կոմիտեները հանդես եկան համատեղ հայտարարությամբ՝ պահանջելով որակազրկել Ռուսաստանի Օլիմպիական կոմիտեին, խթանիչների հետ կապ չունեցող ռուսաստանցի մարզիկներին թույլատրել մասնակցելու Օլիմպիական խաղերին ՄՕԿ-ի դրոշի ներքո: Մեծ հաշվով հենց այս կետն էր դարձել ու շարունակում է մնալ բանավեճերի, լուրջ տարաձայնությունների պատճառ: Միջազգային մարզական հանրությունը համարում է, որ պետական մակարդակով կոռուպցիայի մեջ թաղված ռուսական սպորտը տեղ չունի իսկական սպորտում, հեռու է Օլիմպիական գաղափարներից: Բայց, ՄՕԿ-ն իր վրա չվերցրեց նման պատասխանատվություն եւ որոշումներ ընդունելու իրավունքը փոխանցեց մարզաձեւերի ֆեդերացիաներին:

Առաջիկա օրերին, մինչեւ Օլիմպիական խաղերի մեկնարկն՝ օգոստոսի 5-ը, միջազգային մարզական ֆեդերացիաները պետք է հրապարակեն իրենց որոշումները՝ կապված ռուսաստանցի մարզիկներին Օլիմպիական խաղերին մասնակցելու թույլտվության վերաբերյալ: Ըստ ռուսական մամուլի՝ մարմնամարզության, ըմբշամարտի, ձյուդոյի, բռնցքամարտի եւ մի շարք այլ ֆեդերացիաներ կողմ են ռուսաստանցի մարզիկներին թույլատրելու հարցում (նշում եմ միայն այն մարզաձեւերի անունները, ուր «Ռիո 2016»-ում մասնակիցներ ունի նաեւ Հայաստանը): Բայց բոլորը հասկանում են, որ ՄՕԿ-ի որոշումը միջանկյալ որոշում է միջազգային մարզական հանրություն-Ռուսաստան հակամարտությունում եւ Օլիմպիական խաղերի ավարտից հետո, կամ էլ միգուցե հենց խաղերի ընթացքում այն բորբոքվելու է նոր ուժով ու թափով՝ արդեն առանց ՄՕԿ-ի: