Շաբաթը Վրաստանում. «Ուրանի գործը» եւ դեսպան Վարդանյանը

Մամեդյարովը, ուրանը, տաքսին

Նախորդ շաբաթվա սկզբին պաշտոնական այցով Վրաստանում  էր գտնվում Ադրբեջանի արտաքին գործերի նախարար Էլմար Մամեդյարովը: Վերջինս հանդիպել է իր վրաստանցի գործընկերոջը՝ Միխեիլ Ջանելիձեին:

Վրաստանի ԱԳՆ մամուլի ծառայությունը հայտնել է, որ կողմերը խոսել են Վրաստանի եւ Ադրբեջանի ռազմավարական գործընկերության հարցերի շուրջ: Նախարարները եւս մեկ անգամ մատնանշել են երկու երկրների միջեւ առկա քաղաքական, առեւտրատնտեսական եւ մշակութահումանիտար ոլորտներում հաջող համագործակցության իրողությունը: Մասնավորապես ընդգծել են Վրաստանի եւ Ադրբեջանի համագործակցության նշանակությունը՝ գլոբալ տրանսպորտային եւ էներգետիկ նախագծերի իրականացման գործընթացում: Այս առումով կարեւորվել են բնական գազի միջանցքի եւ Բաքու-Թբիլիսի-Կարս երկաթուղային նախագծերը: Նախարարները ընդգծել են, որ նշված նախագծերի հաջող իրականացումը մեծ նշանակություն ունի, մի կողմից՝ Եվրոպայի էներգետիկ անվտանգության հզորացան, մյուս կողմից՝ Եվրոպան Ասիային կապող տրանսպորտային միջանցքի անխափան գործունեության տեսանկյունից: Առեւտրատնտեսական երկկողմ համագործակցության հարցերից Վրաստանի ԱԳ նախարարը ուշադրություն է դարձրել Ադրբեջանի կողմից ներդրումների աճող ծավալին եւ այս առումով առկա հեռանկարներին: Ջանելիձեի հայտարարության համաձայն՝ տնտեսական համագործակցության ցուցանիշը եւս մեկ անգամ հաստատում է Վրաստանի եւ Ադրբեջանի գործընկերական եւ բարեկամական հարաբերությունները: Հանդիպման ընթացքում անդրադարձ է եղել նաեւ երկու երկրների միջեւ սահմանազատման (դելիմիտացիա) գործընթացը ժամանակին ավարտելու կարեւորությանը: Արտգործնախարարները խոսել են նաեւ տարածաշրջանի մարտահրավերների մասին: Վրաստանի արտգործնախարարը ադրբեջանցի գործընկերոջը ծանոթացրել է Վրաստանի կողմից չվերահսկվող տարածքներում առկա իրավիճակին: Կողմերը եւս մեկ անգամ հաստատել են տարածքային ամբողջականության եւ  ինքնիշխանության փոխադարձ աջակցությունը:

«Ուրանի գործը» եւ դեսպան Վարդանյանը

Սույն թվականի ապրիլի 18-ին Վրաստանի պետական անվտանգության ծառայությունը ապօրինաբար ուրան իրացնելու մեղադրանքով ձերբակալել էր 6 անձի, որոնցից 3-ը՝ Վրաստանի, մյուս 3-ը ՝ Հայաստանի քաղաքացիներ: Գործի շուրջ նոր զարգացումներ կան: Մեղադրյալի կարգավիճակում հայտնված Հայաստանի երեք քաղաքացիներից մեկի՝ Աշոտ Գորոյանի համար միջնորդել է Վրաստանում ՀՀ դեսպան Յուրի Վարդանյանը: Մեղադրյալի փաստաբան Թեմուր Գոգսաձեի խոսքերով, դեսպանը հանդես է եկել Գորոյանին ազատ արձակելու միջնորդությամբ՝ նրա հանդեպ պայմանական պատժամիջոց, կամ՝ գումարային տուգանք սահմանելու ակնկալիքով: Փաստաբանը պարզաբանել է նաեւ, որ այն տեսակի ուրանը, որի վաճառքի համար մեղադրվում են Վրաստանի եւ ՀՀ քաղաքացիները, օգտագործվում է ինժեներական եւ ավիացիոն նպատակներով: Վրաստանի ԱԱԾ-ի փոխանցմամբ՝ նշված անձինք Թբիլիսիում 200 մլն դոլար արժողությամբ ուրան են փորձել իրացնել: Հետաքննությունը ընթանում է միջուկային նյութի հանդեպ անկանոն վերաբերմունքի եւ վաճառքի փաստով, ըստ Վրաստանի քրեական օրենսգրքի 230 հոդվածի առաջին կետի, ինչը ենթադրում է 5-10 տարի ազատազրկում: Այս գործին վերաբերող դատական լսումները շարունակվում են: Հիշեցնենք, ՀԺ-ն տեղեկացրել էր, որ Վրաստանում ուրան վաճառելու փորձի համար ձերբակալվածների մեջ է նաեւ ՀՀԿ-ական պատգամավոր Առաքել Մովսիսյանի (Շմայս) հորեղբորորդին՝ Միհրան Մովսիսյանը:

Սկանդալային մուտք

Վրաստանյան շուկա մուտք գործել փորձող «շվՊպՍր» տաքսի ծառայությունը կրկին սկանդալի կենտրոնում է: Ընկերության վարորդներից մեկն անցյալ շաբաթ դիմել է ոստիկանություն եւ հայտնել, որ մի ուղեւոր իրեն ֆիզիկական եւ բարոյական վնաս է պատճառել: Այս կապակցությամբ Վրաստանի ներքին գործերի նախարարությունից հաղորդել են, որ մեկ քաղաքացի է ձերբակալվել վարչական օրենսգրքի 166 հոդվածի (մանր խուլիգանություն) մեղադրանքով:

Հիշեցնենք, որ ռուսական «շվՊպՍր» տաքսի ծառայությունը վրացական շուկա մտավ հուլիսի 23-ին, ինչն առաջին իսկ օրերից առաջացրեց հանրության որոշ հատվածի վրդովմունքը, քանի որ ընկերության քարտեզների վրա Վրաստանը նշված էր առանց Աբխազիայի եւ Հարավային Օսեթիայի: Սրանով ընկերությունը փաստացի խախտում է Վրաստանի՝ օկուպացված տարածքների մասին օրենքը: Ընկերությունը, սակայն, մեղադրանքը չի ընդունում: Ի դեպ, ինչպես Հայաստանի պարագայում, Վրաստանում եւս տաքսի ծառայության սակագներն անհամեմատ ցածր են շուկայում գործող մյուս ընկերությունների եւ հատկապես անհատ տաքսիստների առաջարկած գներից:

Չստացված հեղափոխություն

Վրաստանի նախկին վարչապետ Բիձինա Իվանիշվիլին սեպտեմբերի 5-ին Գուրիայում լրագրողների հետ հանդիպման ժամանակ խոսել է ընդդիմադիր «Միացյալ ազգային շարժում» կուսակցության մասին եւ հայտարարել, թե «հեղափոխությունից 13 տարի անց, ամռանը նրանք նոր հեղափոխություն են պլանավորելիս եղել»: Իշխող «Վրացական երազանք» կուսակցության հիմնադրի խոսքերով «Միացյալ ազգային շարժումը» հեղափոխություն նախապատրաստելու մի քանի ձախողված փորձ է իրականացրել: Իվանիշվիլիի խոսքերով, այս կուսակցության հույսը բացառապես հեղափոխության ճանապարհով իր նպատակներին հասնելն է:

«Այս տարիների կառավարման ընթացքում միշտ ուժի վրա են հենվել: Հեղափոխությունից 13 տարի անց, ամռանը նորից հեղափոխություն էին նախապատրաստում: Տեղեկություններ ունենք ներսից, բայց դա նաեւ ակնհայտ է: Հիշու՞մ եք, ցույցեր էին ուզում սկսել, որպեսզի թույլ կառավարությունը անմիջապես գնա: Աշնան ամիսներից գարուն էին տեղափոխում եւ այսպես շարունակ: Այժմ եւս նրանք հույս ունեն, որ հեղափոխության ճանապարհով իշխանության կգան: Իրենց միակ ծրագիրը ընտրությունների ժամանակ խառնաշփոթ իրավիճակ ստեղծելն է: Պետք է հասկանանք, որ վտանգը շատ մեծ է»,- հայտարարել է Իվանիշվիլին:

Նորայր Գասպարյան
Թբիլիսի