Պրիմիտիվ գողություն՝ թաղման կառավարական հանձնաժողովներում. գողանում են որքան կարող են

Տարիներեր առաջ մշակութային գործիչների թաղման կառավարական հանձնաժողովներին ուղղվող գումարները տնօրինում էր Հայաստանի պետական ֆիլհարմոնիան: Այս կառույցն էր որոշում, թե որ ընկերության հետ պետք է կնքել գնման պայմանագրեր եւ որ ծառայության համար որքան գումար էր պետք է վճարել: Armtimes.com-ին հայտնի դարձավ, որ մոտ երկու տարի առաջ, ներքին կարգով հրահանգվել է, մշակույթի հետ առնչություն ունեցող գործիչների հուղարկավորության համար ստեղծվող հանձնաժողովի աշխատանքների կազմակերպումն ամբողջությամբ վստահել հենց մշակույթի նախարարությանը: Սակայն ֆիլհարմոնիայի կանոնդադրության մեջ հստակ գրված է, որ դա նրանց գործառույթն է: Այս տեղեկությունը մեր զրույցում չհերքեց նաեւ ֆիլհարմոնիայի տնօրեն Գագիկ Մանասյանը:

Հարցին՝ փորձե՞լ եք կառավարությունից պարզաբանում ստանալ, թե ինչո՞ւ են ֆիլհարմոնիային զրկել այդ գործառույթից, նա պատասխանեց. «Ճիշտն ասած, ես չեմ կարող ասել, որ պաշտոնապես դիմել եմ, բայց մեր կյանքը գիտեք ինչպիսին է: Ես հասկանում էի, ով է անում, ինչու է անում եւ այդպես… հիմա դիմելը նշանակում էր ապստամբություն անել, մոտավորապես, այսպիսի մի բան»:

ՀՀ մշակույթի նախարարությունից մեր գրավոր հարցմանն ի պատասխան տեղեկացրեցին, որ վերջին երկու տարվա ընթացքում ՀՀ վարչապետի որոշումներով, ՀՀ մշակույթի նախարարի գլխավորությամբ ստեղծվել է ՀՀ մշակույթի և արվեստի վաստակավոր գործիչների մահվան կապակցությամբ 11 կառավարական հանձնաժողով: Հանձնաժողովները  կազմակերպել են հուղարկավորության գործընթացը՝ առաջնորդվելով ՀՀ կառավարության 2006 թվականի նոյեմբերի 23-ի N 1910-Ն որոշմամբ: ՀՀ վարչապետի որոշմամբ ստեղծված կառավարական հանձնաժողովի կազմի մեջ ներառվում է նաև Երևանի քաղաքապետարանի բնակչության սպասարկման ծառայությունը, որն իր ենթակայության «Երևան քաղաքի բնակչության հատուկ սպասարկում» ՀՈԱԿ-ի, ինչպես նաև այդ ՀՈԱԿ-ի հետ գործընկերային ծառայության պայմանագիր կնքած «Ալեքս Մանչ» մասանագիտացված ՍՊԸ-ի հետ կազմակերպում է հուղարկավորության գործընթացը:  

Մեր տեղեկություններով՝ «Ալեքս Մանչ» ՍՊԸ-ին էլ թաղումները կազմակերպելու գործառույթն է վստահել ՀՀ ԱԺ պատգամավոր Մհեր Սեդրակյանի թեթեւ ձեռքով: «Ալեքս Մանչ»-ը հիմնադրվել է նույն այն ժամանակ, երբ Երեւանի ավագանի է ընտրվել Մհեր Սեդրակյանի տղան՝ Դավիթ Սեդրակյանը, իսկ հիշյալ ՍՊԸ-ն համագործակցում է «Երևան քաղաքի բնակչության հատուկ սպասարկում» ՀՈԱԿ-ի հետ, որը քաղաքապետարանի կողմից ստեղծված կազմակերպություն է:

ՀՀ մշակույթի և արվեստի վաստակավոր գործիչների հուղարկավորության հետ կապված ծախսերն իրականացվում են ՀՀ պետական բյուջեով նախատեսված «Հասարակության և պետության հանդեպ հատուկ ծառայություններ ունեցած քաղաքացիների մահվան դեպքում հրաժեշտի ծիսակատարության և թաղման կազմակերպում, գերեզմանի բարեկարգման, մահարձանի և հուշատախտակի պատրաստման ու տեղադրման աշխատանքներին աջակցություն» ծրագրի բյուջետային ծախսերի տնտեսագիտական դասակարգման՝ «Հուղարկավորության նպաստներ բյուջեից» հոդվածի միջոցներից, որը չի նախատեսում գնման գործընթաց:

Այսինքն՝ առանց մրցույթ հայտարարելու կնքվում է պայմանագիր «Ալեքս Մանչ» ՍՊԸ-ի հետ, որն էլ ամեն ինչ անում է, որպեսզի հատկացված մոտ 1.7 միլիոն դրամը մինչեւ վերջ ծախսվի: Մշակույթի նախարարությունից մեզ են տրամադրել ՀԽՍՀ ժողովրդական արտիստ, ջութակահար Ժան-Տեր Մերկերյանի մահվան կապակցությամբ ստեղծված հանձնաժողովի կողմից «Ալեքս Մանչ» ՍՊԸ-ի հետ կնքված պայմանագրի պատճենը: Մշակույթի նախարարության կողմից այն ստորագրել է նախարարության աշխատակազմի ղեկավարի տեղակալ Ս. Մուրադյանը, 2015 թվականի հոկտեմբերի 9-ին:

Ստորեւ ներկայացնում ենք, թե որ ծառայության դիմաց որքան գումար է վճարվել «Ալեքս Մանչ»-ին, որոնք շուկայական գների հետ մեղմ ասած անհամատեղելի են: Նշենք նաեւ, որ մատուցած ծառայությունների դիմաց ոչ մի դեպքում չի նշվել, թե ինչ ծավալի կամ քանակի են դրանք եղել: Ավելի պարզ ասած՝ սա պրիմիտիվ գողության վառ օրիակ է:

Եվ այսպես. «Ալեքս Մանչ»-ին վճարված գումարը ծախսվել է հետեւյալ կերպ՝ հոգեհաց՝ 423.150 դրամ, կադիլակ՝ 115.500 դրամ, նկարի բաներ՝ 105.000 դրամ, նկար՝ 52.500 դրամ, հուղարկավորության բանվորների վճար՝ 168.000, լարային քառյակ՝ 84.000 դրամ, փոսի ձեւավորում՝ 199.500 դրամ, գազել՝ 94.500, սգո ձեւավորում՝ 178.500 դրամ, դիակի գրանցում՝ 28.350 դրամ, պսակներ՝ 157.500 դրամ: Ընդհանուր՝ 1 միլիոն 606 հազար 500 դրամ:

Հ.Գ. Հավանաբար, վարչապետ Կարեն Կարապետյանը պետք է կառավարության նիստում հանձնարարի մշակույթի նորանշանակ նախարարին, որ թաղումների կազմակերպման հարցում վերջ տրվի պրիմիտիվ գողությանը, որից հետո ինչ-որ բան կամ կփոխվի կամ չի փոխվի: