Թիվ մեկ «դոնոր» ԵՄ-ն ավելի քան 500 միլիոն եվրոյի ներդրում է կատարել ՀՀ-ում

Հայաստան-Եվրամիության համագործակցության արդյունքում այս շաբաթ Երեւանում կմեկնարկի «ԵՄ-ն բիզնեսի համար» խորագրով միջոցառումների շարքը, որի շրջանակներում կանցկացվեն բիզնեսի զարգացմանը նվիրված հանդիպումներ:

Այս մասին լրագրողների հետ զրույցում ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին.

«Եվրամիությունն իր գործունեության առանցքն է դիտարկում արեւելյան գործընկերության երկրներում տնտեսական աճին օժանդակելը: Մենք հավատացած ենք, որ տնտեսական տոկունությունն առանձնակի ուշադրության կարիք ունի, ուստի մենք սատարում ենք Հայաստանին այս հարցում, որպեսզի լավագույն հնարավորություններն ընձեռնենք տնտեսական զարգացմամբ»,- ասաց դեսպանը:

Դեսպանի խոսքով, տնտեսության զարգացման համար առանցքային նշանակություն ունի փոքր ու միջին բիզնեսի զարգացումը.

«ՀՀ նոր կառավարությունն իր ծրագրի առանցքում ունի այս հարցը, ու մենք պատրաստակամ ենք օժանդակելու Հայաստանի կառավարությանը: Տնտեսական աճը ՀՀ համար էական նշանակություն ունի ու մենք պատրաստ ենք օգնել: Ինչպես եւ շատ հայեր, մենք կարող ենք կառավարության նոր ծրագրում լավ նախաձեռնություններ տեսնել: Ես հանդիպել եմ նոր վարչապետի հետ, կարող եմ վերահաստատել, որ փոխադարձ կամք կա՝ ՀՀ կառավարության ու Եմ կողմից միմյանց հետ աշխատելու, հասնելու առավելագույն արդյունքի՝ ի շահ ՀՀ տնտեսության: Դրա հիմնական գործիքներից մեկն, ինչպես ասացի, ՓՄՁ-ների զարգացումն է: Մի շարք գործիքներ կան, սկսած օրենսդրությունից, որոնք կարող են հեշտացնել ՓՄՁ-ների կյանքը»,- ասաց Պյոտր Սվիտալսկին:

Դեսպանը շեշտեց, որ ԵՄ- ՀՀ  բանակցվող շրջանակային նոր համաձայնագիրը կնպաստի լրացուցիչ օտարերկրյա ներդրումներին ՀՀ-ում.

«Մենք համարում ենք, որ տնտեսական համագործակցությունը փոխշահավետ է: ԵՄ-ն խթանելով տնտեսական աճը որեւէ եսասիրական ձգտումներ չունի, որքան հաջողված լինի ՀՀ տնտեսությունն, այնքան լավ ԵՄ-ի համար»,- ասաց նա:

Հարցին՝ ԵՄ-ն ունի՞ հստակ գործիքներ իր ներդրումների արդյունավետությունը ստուգելու, դեսպանը պատասխանեց.

«Մենք հստակ մեթոդաբանություն ունենք, թե ինչպես  է ծախսվել գումարը, այլ հարց է, թե ինչպես է այն  ընկալվում հասարակության կողմից: Բացման խոսքում ես ասացի պետական քոլեջներին աջակցության մասին, եթե նայում եք թե ինչի եք մենք հասել, արդյունքը տեսանելի է: Ցանկացած քոլեջ, որ այցելեք, կտեսնեք, որ ուսանողները գնահատում են եՄ-ի աջակցությունը: Տեխնիկական արտադրամասերը նպաստում են կրթության ավելի լավ կազմակերպմանը, բայց երբ նայում ենք, թե ինչ է կատարվում այդ տաղանդավոր մարդկանց հետ, որոնք ուզում են աշխատանք գտնել, այստեղ չենք կարող բավարարված լինել արդյունքից, մի կողմից հաջողված է, մյուս կողմից՝ ոչ»,- ասաց նա:

Ինչ վերաբերում է ԵՄ-ի կողմից ՀՀ-ում կատարված ներդրումներին, դեսպանն ընդգծեց, որ ԵՄ-ն, ինչպես եւ շատ երկրներում, այնպես էլ ՀՀ-ում թիվ մեկ դոնորն է.

«Տարեկան 50 միլիոն եվրո ներդրում է կատարվում ՀՀ-ում, իսկ ՀՀ-ի անկախությունից ի վեր ավելի քան 500 միլիոն եվրոյի ներդրում է կատարվել՝ մի մասը դրամաշնորհների տեսքով է փոխանցվել, մյուս մասը   կառավարվում է Բրյուսելից»,- ասաց նա:

Ասուլիսի մյուս բանախոս Տնտեսական զարգացման ներդրումների փոխնախարար Գարեգին Մելքոնյանն էլ հավելեց, որ Երեւանում ընթանում է Հայաստանի եւ Եվրամիության միջեւ նոր իրավական փաստաթղթի շուրջ բանակցությունների հերթական փուլը:

«Տեքստի զգալի մասն այս քննարկումների ժամանակ կկարողանանք համաձայնեցնել: Ունենք տասից ավել ոլորտներ, որոնց վերաբերում է փաստաթուղթը, որոնք եւս բանակցվում են: Սա բանակցային չորրորդ ռաունդն է; Բանակցությունների ընթացքը դրական ու կառուցողական եմ գնահատում: Բազմաթիվ հարցերում մենք եկել ենք ընդհանուր համաձայնության, բայց դեռեւս կան հարցեր, որոնք նեղ մասնագիտական են ու դեռ քննարկվում են: Զգայուն հարցեր կա՞ն երկու կողմերի համար, այո կան, բայց հնարավոր է լուծումներ գտնել դրանց համար՝ քննարկումների ճանապարհով: Կարծում եմ, որ տեսանելի ապագայում կկարողանանք հասնել ընդհանուր հայտարարի»,- ասաց փոխնախարարը:

Փոխնախարարը տեղեկացրեց, որ առեւտրի եւ ներդրումների գլխում ներառված են թափանցիկության, ապրանքների, առեւտրի, մաքսային հարցրերին առնչվող հարցեր, առեւտրի տեխնիկական խոչընդոտներ՝ սերտիֆիկացիա, ագրիգիտացիա, սանիտարիա, մտավոր սեփականության պաշտպանություն և այլն:

«Հայկական կողմը հույս ունի, որ այս մասում կընդգրկվի նաև ներդրումների հարցը, եւ այս մասով քննարկումներ եւս կսկսվեն»,- ասաց փոխնախարարը:

Ինչ վերաբերում է ժամկետներին, թե վերջնական փաստաթուղթը երբ պատրաստ կլինի, Գարեգին Մելքոնյանը պատասխանեց.

«Կարծում եմ, որ կարեւորը համաձայնագրի բովանդակությունն է: Համաձայնագիրն ունի շատ մասնագիտական ծածկույթ, բավական ծավալուն է: Ամենակարեւոր հարցը բովանդակությունն է: Բայց սա չի նշանակում, որ ժամկետները երկրորդական են: Ունենք կառուցողական, ակտիվ բանակցային ընթացք: Տեսանելի ապագայում, հուսով եմ, որ կկարողանանք բերել տրամաբանական ավարտին»: Փոխնախարարը նաեւ հավելեց, որ քննարկումների ժամանակ մշակվում է նաեւ ՀՀ-ԵՄ 2017-20 թվականների համագործակցության ռազմավարությունը: