Գագիկ Ծառուկյանը դեռ շաբաթ օրվանից տեղեկացել է՝ իր առանձնատան մոտ սպասվող ակցիայի մասին

ԲՀԿ նախկին նախագահ Գագիկ Ծառուկյանն այնքան էլ անակնկալի չի եկել իր առանձնատան դիմաց տեղի ունեցած ակցիայից՝ իր՝ քաղաքականություն վերադարձի պահանջով. Ծառուկյանի դեռ շաբաթ օրվանից իմացել է, որ նման ակցիա հնարավոր է լինի: Այս մասին Armtimes.com-ի հետ զրույցում ասաց Ծառուկյանի մամուլի խոսնակ Իվետա Տոնոյանը:

Հիշեցնենք, որ այսօր մի քանի քաղաքացիներ Ծառուկյանի առանձնատան դիմաց ակցիա են արել՝ «Ծառուկյան, վերադարձեք քաղաքականություն» ցուցապաստառներով: Մեր հարցին՝ Գագիկ Ծառուկյանը տեղեկացե՞լ է ակցիայի մասին, Տոնոյանն ասաց.

«Երբ լրատվամիջոցներից տեղեկացա այդ ակցիայի մասին, անձամբ եմ տեղեկացրել պարոն Ծառուկյանին: Պարոն Ծառուկյանի առաջին ռեակցիան հետեւյալն էր. որքան էլ հարգանքով է վերաբերվում այդ մարդկանց ցանկությանը, հորդորին, պահանջին, սակայն խնդրել է, որ անվտանգության աշխատակիցները մարդկանց հորդորեն չհավաքվել եւ դադարեցնել այդ նախաձեռնությունը: Եթե ինքը նպատակահարմարությունը տեսնի այդ թեմային անդրադառնալ, ապա անձամբ այն կանի հրապարակային ու բոլորին հասանելի եղանակով»:

Հետաքրքրվեցինք՝ անակնկա՞լ էր Ծառուկյանի համար նման ակցիան, Տոնոյանը պատասխանեց.

«Շաբաթ օրվանից կային խոսակցություններ, որ նմանատիպ նախաձեռնություն է պլանավորվում: Ես դեռեւս այն ժամանակ պարոն Ծառուկյանին փոխանցել եմ: Միգուցե անակնկալ էր, որ այնումենայնիվ, այսօր այդ ամեն ինչը տեղի ունեցավ որովհետեւ այլ բան է, երբ ենթադրությունների մասին է խոսվում, եւ այլ բան է, երբ պոստ ֆակտում այդ ամենի ականատեսն ենք դառնում»:

Տեղեկացնենք, որ Իվետա Տոնոյանը մինչ այս ֆեյսբուքյան իր էջում գրառում էր կատարել՝ ասելով, որ «տարբեր շրջանակների կողմից հետեւողականորեն ու շարունակաբար շրջանառության մեջ է դրվում Գագիկ Ծառուկյանի՝ քաղաքականություն վերադառնալու թեման.

«Ես, իհարկե, հասկանում եմ որոշ շրջանակների «Հռոմի պապից առավել կաթոլիկ ձեւանալու» նմանօրինակ բոլոր դրսեւորումները, սակայն խորհուրդ եմ տալիս արհեստական սոցիոլոգիական հարցումների կազմակերպման, փողոցներում մարդկանց հարցուփորձ անելու գործելաոճը դադարեցնել: Արհեստականորեն ուղղորդվող նմանատիպ բոլոր նախաձեռնությունների հեղինակներին հորդորում եմ զուր չվատնել իրենց ժամանակն ու ջանքերը, քանզի անկախ ձեր ցանկացած տեսակի շահագրգռվածությունից, սա ձեր որոշելիքը չէ»,- գրել է նա:

Հարցրեցինք՝ այս ակցիան ե՞ւս «տարբեր շրջանակներից ուղղորդվողների» շարքում է դասվում, Իվետա Տոնոյանն ասաց, որ այսօրվա ակցիան ինքնաբուխ էր, որեւէ կերպ ուղղորդված չէր, իսկ իր գրառումը վերաբերում էր լրատվամիջոցների ինքնանպատակ հրապարակումներին:

Հիշեցնենք, որ 2015 թվականի փետրվարի 12-ի ՀՀԿ խորհրդի նիստում Սերժ Սարգսյանը ծավալուն ելույթով հանդես եկավ՝ ամբողջությամբ նվիրված Գագիկ Ծառուկյանին: Հայտնի ելույթում Ծառուկյանը բնորոշվեց որպես «քաղաքականության մեջ չարիք»:

«Ստեղծված իրավիճակում ես ընդունում եմ մեղքի իմ բաժինը: Տարիներ շարունակ ես եմ ուղղակիորեն արգելել ձեզ հրապարակավ հանդես գալու Ծառուկյան Գագիկի բոլոր անհեթեթությունների դեմ՝ անձամբ փակելով այդ քաոսը, ե՛ս եմ արգելել որեւէ մեկին հոլովել ժողովրդի կողմից դակված «Դոդի Գագո» կնիքը»,- ասել էր Սերժ Սարգսյանը:

Սերժ Սարգսյանի հրամանով Ծառուկյանն ազատվեց Ազգային անվտանգության խորհրդի անդամի կարգավիճակից, ԱԺ նախագահին հանձնարարական տրվեց ուսումնասիրել ԱԺ պատգամավոր Գագիկ Ծառուկյանի բացակայությունները, ինչպես նաեւ Ծառուկյանի խնամի՝ այն ժամանակվա վարչապետ Հովիկ Աբրահամյանին հանձնարական՝ ուսումնասիրել «տարիներ շարունակ օդում կախված լուրերը միլիարդավոր գողացված հարկերը»:

Գագիկ Ծառուկյանի բացակայությունների, ինչպես նաեւ իրեն ու իր մերձավորներին պատկանող ընկերություններում հարկային ստուգումներից մի քանի օր անց՝ 2015 թվականի մարտի 5-ին Գագիկ Ծառուկյանն անուղղակիորեն համաձայնեց Սերժ Սարգսյանի այն դիտարկման հետ, որ քաղաքականության մեջ չարիք է՝ հրաժարվելով կուսակցության նախագահի եւ խմբակցության ղեկավարի պաշտոնից, ինչպես նաեւ քաղաքականությունից դուրս գալու մասին:

Այս հայտարարությունից հետո Գագիկ Ծառուկյանին պատկանող ընկերություններում դադարեցվեցին հարկային ստուգումները, ինչպես նաեւ շարունակվեցին պատգամավոր Ծառուկյանի բացակայությունները, սակայն այլեւս այդ խնդիրը չուսումնասիրվեց խորհրդարանի նախագահի կողմից:

Գագիկ Ծառուկյանը բացակայել է ԱԺ հինգերորդ գումարման ողջ իններորդ նստաշրջանից, ինչի առնչությամբ մեր հարցին ի պատասխան ԱԺ նախագահ Գալուստ Սահակյանն ասել էր, որ «Ծառուկյանի պատժամիջոցը հետեւյալն է՝ աշխատավարձ չի ստանա»:

Վերջին շրջանում կրկին ակտիվացան խոսակցությունները, որ 2017 թվականի խորհրդարանական ընտրություններին ընդառաջ իշխանությունները փորձում են կրկին քաղաքականություն բերել Գագիկ Ծառուկյանին: ԲՀԿ-ականների այն խոսքերն էլ, որ Ծառուկյանը ժամանակավորապես է հեռացել քաղաքականությունից, եւ ինքը կորոշի վերադառնա քաղաքականություն, թե ոչ, կարծես թե հաստատում են, որ Ծառուկյանն այլեւս քաղաքականության մեջ չարիք չէ: