Ոստիկանի սպանության համար մեղադրանք կառաջադրե՞ն «Սասնա ծռեր» խմբի անդամ Սմբատ Բարսեղյանին

«Սասնա ծռեր» խմբի անդամների կալանավորումից մոտ 3 ամիս անց Հատուկ քննչական ծառայությունը նախօրեին անորոշ հաղորդագրություն տարածեց՝ հայտնելով, թե պարզվել են ՊՊԾ գնդի տարածքի գրավման ընթացքում ոստիկանության երեք ծառայողի՝ Արթուր Վանոյանի, Յուրի Տեփանոսյանի եւ Գագիկ Մկրտչյանի սպանությունների բոլոր հանգամանքները եւ բացահայտվել են սպանությունները կատարած անձինք:

Հաղորդագրության մեջ, սակայն չի նշվում, թե կոնկրետ ովքեր են, ըստ ՀՔԾ-ի, այս սպանությունների հեղինակները:

Սպանված ոստիկան Յուրի Տեփանոսյանի մասով ավելի վաղ «Սասնա ծռեր» խմբի անդամ Վարուժան Ավետիսյանը տեղեկացրել էր, որ իրենք այդ ոստիկանի սպանության հետ որեւէ առնչություն չունեն։ Ավետիսյանն ընդգծել էր նաեւ, որ այն վայրը, որտեղ սպանության պահին գտնվել է Տեփանոսյանը, իրենց համար տեսանելի չէ։ Ոստիկանության պաշտոնական հաղորդագրության համաձայն՝ Յուրի Տեփանոսյանը սպանվել էր դիպուկահարի կրակոցից։ Ոստիկանությունը նաեւ տեսանյութ եւ լուսանկար հրապարակեց ՊՊԾ գնդի տանիքից, որում պատկերված էր «Սասնա ծռեր» խմբի անդամ Սմբատ Բարսեղյանը:

Դատելով վերը նշվածից, կարելի է ենթադրել, որ Տեփանոսյանի սպանության համար վարույթն իրականացնող մարմինն առաջիկայում մեղադրանք կառաջադրի Սմբատ Բարսեղյանին: Նրա պաշտպան Հայկ Ալումյանը մեր հարցին ի պատասխան ասաց, որ Տեփանոսյանի սպանության համար Սմբատ Բարսեղյանին մեղադրանք չի առաջադրվել եւ որեւէ նախադրյալ չի տեսնում այդպիսի մեղադրանք առաջադրելու: Ալումյանն, ի դեպ, նշեց, որ իր պաշտպանյալի մասնակցությամբ առերես հարցաքննություն է կատարվել, սակայն չմանրամասնելով, թե ում մասնակցությամբ: Նա ասաց, որ այդ տվյալները նախաքննական գաղտնիք են հանդիսանում:

Ինչ վերաբերում է ոստիկանության գնդապետ Արթուր Վանոյանի եւ ոստիկանության ավագ ենթասպա Գագիկ Մկրտչյանի սպանություններին, ապա ՀՔԾ-ն չի մանրամասնում, թե ինչպես են բացահայտել նրանց սպանությունները, ինչպես են անհատականացվել գնդում գտնվող յուրաքանչյուրի գործողությունները եւ որ ամենակարեւորն է՝ խմբի անդամներից ով կամ ովքեր են սպանել ոստիկաններին:

Վանոյանի սպանությունից հետո Վարուժան Ավետիսյանը հայտարարեց, որ դա պետք է որակել որպես դժբախտ պատահար: «Բազմաթիվ հորդորներ են եղել, որ՝ մենք ձեր դեմ ոչինչ չունենք, ձեր կյանքին, առողջությանը վտանգ չենք ուզում հասցնել, խնդրում ենք՝ մի կրակեք, բայց նա դատարկել է ամբողջ փամփշտատուփը: Նրան ոչ մեկը չի մեղադրել, նա կատարել է իր ծառայողական պարտականությունները, բայց մեր կողմն էլ իրացրել է իր ապստամբության իրավունքը»,- հայտարարել էր Ավետիսյանը:

Իսկ թե ում մեղադրանք կառաջադրեն Վանոյանի սպանության համար, թերեւս կարելի է ենթադրել ԼՂՀ Ազգային ժողովի պատգամավոր, Արցախի հերոս Վիտալի Բալասանյանի հայտարարությունից, որտեղ նա հետեւյալ կոչն էր արել խմբի անդամներին. «Քանի դեռ ուշ չէ, անհապաղ իշխանություններին հանձնել վիրավոր տղային, որը նաեւ, ըստ տեղեկությունների, ոստիկանության գնդապետին սպանողն է»: Նշենք, որ առաջին օրերին ծանր վիրավորվել էր խմբի անդամ Մխիթար Ավետիսյանը. նա գլխի շրջանում վնասվածք էր ստացել եւ մինչեւ վերջ մնաց ՊՊԾ գնդի տարածքում եւ իրավապահներին հանձնվեց բոլորի հետ միասին:

Ուստի, դատելով վերը նշվածներից, չի բացառվում, որ նախաքննական մարմինը Վանոյանի սպանության համար Ավետիսյանին եւս մեղադրանք առաջադրի: Երեկ փորձեցինք նրա պաշտպան Ինեսսա Պետրոսյանից այս կապակցությամբ մեկնաբանություն ստանալ, սակայն նա մեր հեռախոսազանգերին չպատասխանեց: Այնուամենայնիվ հուսանք, որ ՀՔԾ-ն երկար գաղտնի չի պահի եւ ի վերջո կհայտարարի, թե ովքեր են մեղադրվում երեք ոստիկանի սպանության մեջ:

ՀՔԾ-ն իր նախօրեի հաղորդագրությունում նաեւ նշել էր, որ ՊՊԾ գունդը զավթելուն մասնակցել են եւս երկու զինյալ, երկու ինքնաձիգով, ովքեր նույն օրն իսկ աննկատ լքել են գնդի տարածքը, հետները դուրս բերելով նաեւ գնդի զինանոցից հափշտակված «Մակարով» տեսակի երկու ատրճանակ: Նրանք հայտնաբերվել եւ ներգրավվել են որպես մեղադրյալ: Մեր տեղեկություններով, երկու զինյալից մեկը «Սասնա ծռեր» խմբի անդամ Մարտիրոս Հակոբյանի (Դեդ) որդին՝ Կարենն է եղել, իր ընկերոջ հետ: Հիշեցնենք, որ Կարեն Հակոբյանը ձերբակալվել էր սեպտեմբերի 28-ին եւ մի քանի օր անց ստորագրությամբ ազատ արձակվել:

Անդրադառնալով կալանավորվածների մեղադրանքը փոփոխելուն՝ նշենք, որ դրա վերաբերյալ նրանց փաստաբաններին դեռ ոչինչ հայտնի չէ։ Պավլիկ եւ Արամ Մանուկյանների պաշտպան Հարություն Բաղդասարյանը երեկ մեր զրույցում ասաց, որ ավելի ճիշտ կլիներ նախաքննության մարմինը մեղադրանքը փոփոխեր, հետո նոր նման հաղորդագրություն տարածեր. «Սա քաղաքական հայտարարություն է, որը շատ քիչ կապ ունի «Սասնա ծռերի» հետ եւ շատ քիչ կապ ունի քրեական գործի հետ: Ես կարծում եմ, դրանք ավելի շատ քաղաքական հայտարարություններ են, որոնք ուղղված են ավելի շատ դրսին՝ որոշակի հարցեր լուծելու համար, որովհետեւ այսօր Հայաստանը շատ լուրջ մարտահրավերների առաջ է կանգնած, մասնավորապես, տարածքների վերադարձման հարցը, իսկ մեր պաշտպանյալները դեմ են տարածքների հանձնմանը: Սա վարկաբեկիչ հայտարարություն էր»,- եզրափակեց Բաղդասարյանը:

Հիշեցնենք, որ այս պահին «Սասնա ծռեր» խմբի անդամներին մեղադրանք է առաջադրվել շենք-շինություններ զավթելու, ապօրինի զենք պահելու, կրելու եւ բժիշկներին պատանդ պահելու համար: Առաջադրված մեղադրանքներում նրանք իրենց մեղավոր չեն ճանաչում: