Հայաստան-Գերմանիա. մեծ օրակարգ, որոշիչ փուլ

Արտաքին գործերի նախարար Էդվարդ Նալբանդյանը անցյալ շաբաթ Բեռլինում հանդիպեց իր գերմանացի գործընկեր Ֆրանկ-Վալտեր Շտայնմայերին եւ Գերմանիայի կանցլերի արտաքին քաղաքականության և անվտանգության հարցերով գլխավոր խորհրդական Քրիստոֆ Հոյսգենին:

Դատելով նրանից, որ Գերմանիան Եվրամիության ամենաազդեցիկ երկիրն է, ՀՀ-ի դաշնակից Ռուսաստանի` սրվող կոնֆլիկտում ԵՄ հիմնական «ֆլագմանը» եւ ԵԱՀԿ-ում նախագահող պետություն, ապա այս հանդիպումները դժվար է անվանել հերթապահ: Համաձայն ԱԳՆ տարածած մամուլի հաղորդագրության, հանդիպումների ժամանակ քննարկվել է հարցերի լայն շրջանակ՝ սկսած ԼՂ հակամտության կարգավորման հեռանկարներից, Մերձավոր Արեւելքում ստեղծված իրավիճակից եւ փախստականների հոսքից մինչեւ հայ-գերմանական եւ Հայաստան-Եվրամիություն հարաբերություններ:

Թեպետ մամուլի հաղորդագրություններում գրված է հիմնականում քննարկված հարցերի շրջանակը՝ առանց որեւէ մանրամասնությունների ներկայացման, սակայն մեկ հարցում արված է կանխատեսելի բացառություն:

«ԵԱՀԿ-ում գերմանական նախագահության համատեքստում… Էդվարդ Նալբանդյանը ԵԱՀԿ գործող նախագահ Ֆրանկ-Վալտեր Շտայնմայերի ուշադրությունը հրավիրեց առ այն, որ Ադրբեջանը հրաժարվում է կյանքի կոչել հիմնահարցի հանգուցալուծման գործընթացի առաջ մղման նպատակով համապատասխան պայմանների ստեղծմանն ուղղված` Վիեննայի և Սանկտ-Պետերբուրգի գագաթաժողովներին ձեռք բերված պայմանավորվածությունները, ավելին` շարունակում է սրել իրավիճակը Ադրբեջանի և Լեռնային Ղարաբաղի միջև շփման գծում», - ասել է Նալբանդյանը Ֆրանկ-Վալտեր Շտայնմայերին։

Անգամ, եթե հաղորդագրության մեջ այս մասին չասվեր, դժվար չէր լինի կռահել, որ հատկապես ապրիլյան լայնածավալ մարտական գործողություններից հետո, ՀՀ ԱԳՆ ղեկավարը պետք է ԵԱՀԿ-ում (իսկ կազմակերպությունը պատասխանատվություն է կրում լայն իմաստով Եվրոպայի տարածքում անվտանգության եւ կայունության համար) նախագահող այն էլ Գերմանիայի նման հզոր երկրին հիշեցներ Վիեննայում եւ Սանկտ-Պետերբուրգում Հայաստանի եւ Ադրբեջանի նախագահների ձեռք բերած պայմանավորվածությունների մասին: Համաձայն այդ պայմանավորվածությունների

կողմերը պարտավորվում էին պահպանել հրադադարի ռեժիմը, հզորացնել ԵԱՀԿ նախագահի մշտական ներկայացուցիչ Անջեյ Կասպրշիկի գրասենյակի կարողությունները եւ շփման գծում ներդնել հրադադարի ռեժիմի խախտման հետաքննության մեխանիզմներ:

Մյուս կողմից պարզ չէ, թե ինչ են քննարկել եւ ինչ պայմանավորվածությունների եկել Հայաստանը եւ Գերմանիան նույն ՀՀ-ԵՄ հարաբերությունների, փախստականների հոսքից ծագած խնդիրների կարգավորման եւ այլ հարցերի շուրջ: Ի դեպ, փախստականների հոսքը Հայաստանի համար շատ կարեւոր խնդիր է, քանի որ բնակչության թվաքանակի հետ համեմատած, ՀՀ-ն Եվրոպայում ընդունած փախստականների թվով երրորդ երկիրն է: Օրինակ՝ նույն Թուրքիային Եվրամիությունն ավելի քան երեք միլիարդ եվրո տրամադրեց Սիրիայից ժամանած փախստականների խնդիրների լուծման համար: Մյուս կողմից Եվրամիությունը նույն խնդրով պայմանավորված շատ զգուշավոր, ավելի շուտ վախվորած է արձագանքում Թուրքիայի ներսում ընդդիմադիրների նկատմամբ մոլեգնող բռնաճնշումներին:

Հենց այս խնդիրների համատեքստում գերմանացի քաղաքագետ Ալեքսանդր Ռառը Նալբանդյանի այցը Գերմանիա համարում է «շատ կարեւոր»: «Այստեղ կան մի քանի հանգամանքներ: Առաջինը ԼՂ հակամարտությունն է, որը Գերմանիայի ուշադրության կենտրոնում է: Գերմանիան այժմ նախագահում է ԵԱՀԿ-ում եւ պատասխանատվություն է կրում Եվրոպայի ու հետխորհրդային տարածքում հակամարտությունների համար: Ուստի, ղարաբաղյան խնդիրը շատ մեծ ուշադրության է արժանանում, որպեսզի թույլ չտրվի ապրիլյան արյունալի իրադարձությունների կրկնություն: Սա, իհարկե, դժվար հասանելի հարց է, քանի որ հակամարտող կողմերը բավականին շատ պատճառներ ունեն չկարգավորել հիմնահարցը: Ամեն դեպքում արտաքին ուշադրությունը շատ կարեւոր է», - մեզ հետ զրույցում ասաց նա՝ հիշեցնելով, որ ժամանակին Գերմանիան խոստացել էր աջակցել շփման գծում հետաքննության մեխանիզմների ներդրմանը համապատասխան սարքավորումների տեղադրման տեսքով:

Այս հարցը, վստահ է Ռառը, թեպետ աշխատանքային քննարկումների շրջանակներում բարձրացվում է, սակայն այն դժվար իրականանալի գործընթաց է: «Այնպես չէ, որ կողմերն ամբողջությամբ պատրաստ են այդ մեխանիզմների ներդրմանը: Մինչեւ այժմ անգամ չի իրականացվել Կասպշիկի հանձնախմբի կարողությունների հզորացման հարցը»,- հավելեց փորձագետը:    

Մյուս կողմից, ըստ քաղաքագետի, կարեւոր է Հայաստան-Եվրամիություն հարաբերությունների ապագան հատկապես վերափոխվող Արեւելյան գործընկերության ծրագրի շրջանակներում: «Արեւելյան գործընկերությունը տապալվեց, քանի որ Բելառուսը չի ստորագրել ԵՄ-ի հետ պայմանագիր, Ուկրաինան թեպետ ստորագրել է, սակայն կյանքի չի կոչում Մինսկի համաձայնությունները, Մոլդովայում մեծ է հավանականությունը, որ իշխանության կգա ռուսամետ քաղաքական գործիչ, Ադրբեջանն ու Հայաստանը եւս չեն ստորագրել Ասոցիացիայի պայմանագիրը: Տարբերվում է միայն Վրաստանը, սակայն այդ երկիրն անգամ չի ստացել ԵՄ-ի հետ ազատ վիզային ռեժիմ: Իսկ Եվրոպան Ռուսաստանի հետ ամբողջությամբ գժտվել է, ինչը մտահոգիչ է: Այժմ եվրաչինովնիկները հարց են տալիս միմյանց, թե նախորդ տարիներին ինչն այնպես չեն արել եւ ինչու նման արդյունք գրանցվեց: Այժմ մենք գտնվում են Արեւելյան գործընկերության վերանայման փուլում», - նկատեց Ալեքսանդր Ռառը:

Նալբանդյանի՝ Բեռլին կատարած այցի կարեւորությունը Տարածաշրջանային հետազոտությունների կենտրոնի ղեկավար Ռիչարդ Կիրակոսյանը դիտարկեց Արեւմուտք-Ռուսաստան խորացող հակամարտության շրջանակներում, հատկապես, որ ԱՄՆ-ի նախագահական ընտրություններով պայմանավորված ՌԴ-ի հետ հակամարտության հարցում այժմ ավանգարդի դերակատարում է ստանձնել հենց Գերմանիան: «Սա կարեւոր խնդիր է, քանի որ Ռուսաստանը Հայաստանի դաշնակիցն է, մյուս կողմից Հայաստանը սերտ կապեր ունի Արեւմուտքի հետ: Կողմերի տրամադրություններին առաջին ձեռքից ծանոթանալը կարեւոր է», - մեզ հետ զրույցում ասաց Կիրակոսյանը: Կիրակոսյանի կարծիքով, բացի աշխարհաքաղաքական խնդիրներից, Հայաստանը ԵՄ-ի հետ նոր շրջանակային համաձայնագրի կնքման շուրջ բանակցությունների որոշիչ փուլում ցանկանում է ստանալ Գերմանիայի հստակ աջակցությունը: «Բանակցությունները կարծես մոտենում են ավարտին, եւ ստանալ Գերմանիայի հստակ աջակցությունն այս հարցում ՀՀ-ի համար կարեւոր է»,- եզրափակեց նա:

Տպել
1965 դիտում

ՀՀ ֆուտբոլի հավաքականի խաղերի ամենաէժան տոմսերը կլինեն 1000 դրամ

Վանեցյանը անձնական միջոցներ չունի, որ ներդնի ֆուտբոլում, բայց կարծում է՝ կարիքը չի էլ լինի

Հայրապետյանը չէր եկել ժողովին, որում Վանեցյանը ընտրվեց ՀՖՖ նախագահ

Նիկողոսյանը եւ Մելիքբեկյանը՝ ՀՖՖ փոխնախագահներ

Ընտրվեց ՀՖՖ գործկոմի նոր կազմը

Արթուր Վանեցյանը ընտրվեց ՀՖՖ նախագահ

Արարատ Միրզոյանը Գյումրու թիվ 40 դպրոցի տնօրեն է նշանակել Մարմաշենի դպրոցի ուսուցչին

12-րդ դասարանում կենտրոնացված ավարտական քննություն կլինի միայն հայոց լեզու առարկայից

Վարդան Մինասյանը հեռացել է ՀՀ ֆուտբոլի հավաքականից

Անկախության տոնին պարգեւատրումներ, ցուցահանդեսներ, «Սուտլիկ որսկան» ու տոնական համերգ Գյումրիում

Սեւ մածուն. մոնստր է, մոնստր

ՀՀՇ-ով մեզ թող չվախեցնեն. ասում է Հովհաննես Հովհաննիսյանը

Ընտրություններին մասնակցող ամենահարուստ ուժը ՀՅԴ-ն է. ունեցվածքը սփռված է ողջ երկրով

Անկախության տոնի առթիվ վարչապետ Նիկոլ Փաշինյանին շնորհավորական ուղերձ է հղել ՌԴ նախագահ Վլադիմիր Պուտինը

Հայաստանի անկախության տոնի առթիվ Թբիլիսիի հեռուստաաշտարակը լուսավորվել է հայոց եռագույնով

GOOGLE որոնողական համակարգը եռագույնով է ներկվել՝ ի պատիվ Հայաստանի անկախության տոնի

Ամենից շատ վճարովի եթերաժամանակ ԲՀԿ-ն է գնել ու գրանցել ռեկորդ. նման ցուցանիշ դեռ չի եղել

Մեգան Մարքլը ներկայացրել է իր խոհարարական գիրքը

Պաշտպանը Գլխավոր դատախազին է ուղարկել Նաիրա Զոհրաբյանի տրամադրած նյութերը

Արագած գյուղում օտարերկրացիներ են մոլորվել