Ադրբեջանում հաջորդ տարվա սկզբին սոցիալական պայթյուն է կանխատեսվում

Ադրբեջանում բողոքի նոր ալիք է հասունանում, որը Ամանորից հետո կարող է վերաճել սոցիալական տարերային խռովության: Բավական չէր ադրբեջանական մանաթը վերջին երկու շաբաթների ընթացքում ամեն օր արժեզրկման նորանոր ռեկորդներ է սահմանում՝ Ադրբեջանի Սակագների խորհրդի որոշմամբ՝ դեկտեմբերի 1-ից ամսական 200 կիլովատ/ժամից ավելի էլեկտրաէներգիա սպառող քաղաքացիների, ինչպես նաեւ հիմնարկ-ձեռնարկությունների համար էլեկտրաէներգիայի սակագինը բարձրանալու է 28.5 տոկոսով՝ կազմելով 0.11 մանաթ (մոտ 06.2 ամերիկյան դոլար): Իսկ տարեկան 10 հազարից ավելի կիլովատ ժամ էլեկտաէներգիա ծախսողների համար այն կթանկանա 57 տոկոսով: Բացի այդ, թանկանալու է նաեւ գազը: Ըստ այդմ, տարեկան կտրվածքով 1500 խորանարդ մետրից ավելի գազ սպառողները ստիպված կլինեն 1 խորանարդ մետր գազի դիմաց վճարել կրկնակի ավելի՝ 0.20 մանաթ (մոտ 0.12 ամերիկյան ցենտ):

Առաջիկայում կոմունալ այլ ծառայությունների շղթայական թանկացում է սպասվում. Ադրբեջանի երկաթուղիներն ու մետրոպոլիտենն արդեն իսկ հայտնել են ուղեւորափոխադրումների ու բեռնափոխադրումների սակագների բարձրացման անխուսափելիության մասին: Օրերի խնդիր է ջրի թանկացումը:  

Միաժամանակ, մանաթի անվերահսկելի արժեզրկման պայմաններում Ադրբեջանում գրեթե ամենօրյա ռեժիմով վերանայվում են վաճառվող ապրանքների գները: Օրինակ, վերջին 2 ամսվա ընթացքում 15-20 տոկոսով թանկացել է հացը: Բնակչության գնողունակության անկման պայմաններում խանութների ցանցերը բողոքում են վաճառքի ծավալների անկումից:

Ադրբեջանական ընդդիմադիր «Ազգային ճակատ» կուսակցության առաջնորդ Ալի Քերիմլին սակագների խորհրդի որոշումը հակաժողովրդական է անվանել: Եւս մի հակաժողովրդական որոշում կոռումպացված իշխանությունից: Գազի սակագինը բարձրացվում է 100 տոկոսով, իսկ էլեկտրաէներգիան՝ 57 տոկոսով: Իշխանությունների համար ավելի կարեւոր է միլիարդներ ծախսել տարբեր տոնական միջոցառումների, Formula 1-ի անցկացման կամ այլ անիմաստ բաների վրա, քան բարելավել ազգաբնակչության սոցիալական վիճակը: Իշխանություններն իրենց նման բաներ են թույլ տալիս, քանի որ քաղաքացիները պասիվ պահվածք են դրսեւորում»,-այսօր հայտարարել է Ալի Քերիմլին:

Ընդդիմադիր REAL շարժման գործադիր քարտուղար, տնտեսագետ Նաթիգ Ջաֆարլին, քննադատելով կայացված որոշումը, հայտարարել է, որ Ադրբեջանին առաջիկայում նորանոր թանկացումների շարան է սպասվում, ինչը սոցիալական պայթյուն է առաջացնելու երկրում:

Մեկ այլ ընդդիմադիր գործիչ, հայտնի տնտեսագետ Գուբաթ Իբադօղլուն գտնում է, որ կոմունալ ծառայությունների թանկացումն ազգաբնակչության համար հոգեբանական ու տնտեսական տեւական ծանր հետեւանքներ է ունենալու:

Ստեղծված պայմաններում շատերը 2017 թվականի սկզբին Ադրբեջանում տարերային ցույցեր ու այս տարվա հունվարյան զանգվածային բողոքի ցույցերի կրկնություն են կանխատեսում: Մանաթի արժեզրկումն ու համատարած թանկացումները միանգամայն իրական են դարձնում նման հեռանկարը:

Այս առումով նախագահի հասցեին քննադատության քրեականացման մասին օրենքը, որը երեկ ընդունվել է Միլլի մեջլիսում եւ համատարած թանկացումների ու երկրում ծանր սոցիալ-տնեսական վիճակի համար իշխանություններին քննադատող կայքերի արգելափակումը, բոլորովին էլ պատահական չէ:

Արդեն երեք օր է Ադրբեջանի տարածքում արգելափակվել են «Ամերիկայի ձայն» եւ «Ազատություն» ռադիոկայանների կայքերը, որոնք ողողված են ադրբեջանական իշխանություններին քննադատող ու երկրի աղետալի սոցիալ-տնեսական վիաճի մասին աղաղակող հրապարակումներով: Ադրբեջանի սահմաններից դուրս նշված ռադիոկայանների ադրբեջանական ծառայության կայքերը հասանելի են:

Ադրբեջանի կապի նախարարությունն ու Ադրբեջանի էլեկտրոնային անվտանգության եւ ինտերնետ կապի հիմնական մատակարար «Դելտատելեկոմ» ընկերությունը հրաժարվում են որեւէ մեկնաբանություն անել կայքերի արգելափակման առնչությամբ: Այդ փաստը ենթադրել է տալիս, որ կայքերը արգելափակվել են իշխանությունների ցուցումով: Ժամանակային առումով կայքերի արգելափակումը տեղի է ունենում սոցիալական ցանցերում ու էլեկտրոնային լրատվամիջոցներում նախագահի քննադատությունը քրեակացնող օրենքի ընդունման հետ: Ադրբեջանի իշխանությունները, գիտակցելով, որ չեն կարող պատասխանատվության ենթարկել ամերիկյան ֆինասավորմամբ աշխատող կայքերին, որոշել են պարզապես արգելափակել դրանք: