Չեմ կարծում` որեւէ եվրոպական երկրում այսքան ազատ լինենք. Հայաստանի քաղաքացի

Հուլիսի 5-ը Հայաստանի Հանրապետության Սահմանադրության օրն է: Փողոցում հարցվածները գրեթե բոլորը գիտեին, թե ինչ պատճառով է այսօրը ոչ աշխատանքային: Բայց գրեթե յուրաքանչյուրն էլ այն կարծիքին էր, որ երկրի թիվ մեկ օրենքը հաճախ մնում է թղթի վրա:

«Թղթի վրա լավ գրված է, բայց ոչ մեկը չի իրագործում: Ես չեմ հասկանում` ինչու: Օրենքը սա է, բայց կատարում են հակառակ կողմից, դա ի՞նչ է նշանակում: Հսկողություն չկա, ով ինչ ուզում, անում է, ով ինչ ուզում, կատարում է, բայց վերջը խախալի երեսին ոչ մի բան չի մնում»,- ասաց հարցվածներից մեկը: 

Սահմանադրության մասին հարցերը մեկ այլ քաղաքացու հիշեցրեցին ժողովրդի սոցիալական ծանր պայմանները: «Մարդիկ փող չունեն, ապրելակերպ չունեն, թող մարդկանց օգնեն: Իրենց համար ինչ կա: Չորս բոլորը խեղճուկրակ ժողովուրդ է, ինչի մասին է խոսքը: Այստեղ ամեն մեկն իր օրենքն ունի: Այսքան ժամանակ ով է ում ձեռք մեկնել, օգնել: Երկու ձեռքով 32 գործ եմ անում: Աշխատավարձը քիչ է, մարդիկ չեն կարողանում ապրել, բայց եթե փնտրում ես, կարողանում ես աշխատանք գտնել:

Հարցված երիտասարդ աղջիկներից մեկը նկատեց, որ Սահմանադրությունը մեր անկախության երաշխիքներից է: «Եթե Սահմանադրությունը չլիներ, մենք անկախ չէինք լինի, ու շատ բան կանոնակարգված չէր լինի, չէիր իմանա` սպիտակ է, թե սեւ: Տեղեր կան, որ Սահմանադրությունը գործում է, տեղեր կան, որ չի գործում ու շատ էլ վնաս է տալիս երկրին: Ցանկալի է ամեն տեղ գործի»,- ասաց նա:

Մեկ այլ երիտասարդ աղջիկ ընդգծեց, որ պետք է յուարքանչյուրս հարգենք օրենքը ու համոզմունք հայտնեց, որ Հայաստանում մարդը շատ ավելի մեծ ազատություն ունի, քան եվրոպական երկրներում:

«Ուրախ եմ, որ ոչ աշխատանքային է, որովհետեւ այսպիսի օրեր պետք է լինեն, որ գոնե արժեւորենք մեր օրենքները, մի քիչ օրինազանց  չլինենք: Եկեք չքննադատենք Սահմանադրությունը, մեկ էլ` մեր երկրում գործող օրենքները: Ինձ համար մեր երկրում ավելի լավ է, քան մնացած երկրում: Ես ինքս շատ արժեւորում եմ մեր երկրի Սահմանադրությունն ու օրենքները եւ եթե յուրաքանչյուրս միտված լինենք օրենքը չխախտելու, ավելի լավ երկիր կունենանք»,- ասաց նա` հավելելով. «Յուրաքանչյուր ոք ունի ազատ, անկախ ապրելու իրավունք. կարծեմ դա բոլորիս ամենահաճախ հանդիպող նախադասությունն է: Չեմ կարծում` որեւէ եվրոպական երկրում այսքան ազատ լինենք»: