Մինչ սահմանադրական հանրաքվեի օրը պետք է ազատվենք Սերժ Սարգսյանից. Զ. Փոստանջյան

Ազգային ժողովում այսօր շարունակվում էր սահմանադրական փոփոխությունների նախագծի քննարկումը: Այսօրվա նիստը արտահերթ էր եւ պատգամավորները հանդես էին գալիս ելույթներով:

Իր ելույթում «Ժառանգություն» խմբակցության նոր ղեկավար Զարուհի Փոստանջյանը շնորհավորեց իշխանություններին՝ սահմանադրական փոփոխությունների շուրջ բովանդակային քննարկում ծավալելու հարցում հաջողության հասնելու համար:

Այնուհետեւ նշեց, որ իր հայտարարությունը կապ չունի սահմանադրական բարեփոխումների անվան տակ անցկացվող գործընթացի հետ:

Նրա կարծիքով՝ այս գործընթացի նպատակը ժողովրդին զինաթափելն է, որպեսզի նորից տիրանան իշխանությանը:

Հղում կատարելով Սերժ Սարգսյանի հայտնի փետրվարյան ելույթին՝ Փոստանջյանը նկատեց, թե այդ ելույթում իրականում Սերժ Սարգսյանը ընդունել է, որ ինքը քաղաքական դաշտում մարտահրավեր ունի եւ վտանգը վերացնելու համար խնդիր ունի մաքրել քաղաքական դաշտը, որպեսզի ինքը միատեր մնա: Ըստ պատգամավորի՝ սահմանադրական փոփոխությունները միտված են հենց այդ գործընթացին:

«Բոլոր նրանք, ովքեր որ այսօր համախմբված են եւ փորձում են Սերժ Սարգսյանից ազատվել, ովքեր մերժում են Սերժ Սարգսյանին (իսկ դա մեր ազգն է), հայկական օրակարգի ներքո`

1. պետք է ընդունեն նվազագույն սահմանադրական օրենքներ, որոնցից պետք է ընտրվի նոր ընտրական օրենսգիրք, որը պետք է ապահովի ընտրական իրավունքի լիարժեք իրացում,

2. լյուստրացիայի մասին օրենք,

3. ապօրինի սեփականաշնորհված գույքի հետվերադարձ պետությանը,

4. պետք է սկսենք անցկացնել անցումային արդարադատություն. առաջինը պետք է անցնի Սերժ Սարգսյանը եւ Ռոբերտ Քոչարյանը, հետո կլինեն այլ անուներ եւս»,- հայտարարեց պատգամավորը:

Փոստանջյանը վերջում հավելեց նաեւ, որ մինչ սահմանադրական հանրաքվեի օրը պետք է ազատվենք Սերժ Սարգսյանից:

15:49, 18/09/2015

481 դիտում