Վահրամ Բաղդասարյանի ՍՊԸ-ի տնօրենը ոսկու հանք է ուզում շահագործել. գյուղացիները դեմ են

Լոռու մարզի Արդվի եւ Մղարթի համայնքների վարչական տարածքում պլանավորված է անցկացնել օգտակար հանածոների երկրաբանական ուսումնասիրության, սակայն դրա վերաբերյալ գյուղացիները միայն վերջերս են իմացել:

ՀՀ բնապահպանության նախարարության պաշտոնական կայքից armtimes.com-ը տեղեկանում է, որ «Շրջակա միջավայրի վրա ազդեցության գնահատման եւ փորձաքննության մասին» ՀՀ օրենքի, ինչպես նաեւ կառավարության կարգով 2017թ. հուլիսի 26-ին՝ ժամը 12:00-ին, ՀՀ Լոռու մարզի Արդվիի համայնքապետարանի շենքում տեղի կունենան «Միռամ» ՍՊԸ-ի կողմից ներկայացված ՀՀ Լոռու մարզի Շեկաղբյուրի ոսկի-բազմամետաղների հանքերեւակումում 2017-2020թթ. ընթացքում օգտակար հանածոների երկրաբանական ուսումնասիրության նախնական գնահատման հայտի վերաբերյալ հանրային քննարկումներ (2-րդ հանրային քննարկում):

Բնապահպանության նախարարության հայտարարության համաձայն՝ երկրորդ հանրային քննարկումն է տեղի ունենալու, սակայն Արդվի համայնքի բնակիչներն առաջին անգամ են լսում հանրային քննարկման մասին: Ավելին, «Համայնքային համախմբման եւ աջակցության կենտրոն» ՀԿ-ի տնօրեն Օլեգ Դուրգարյանից տեղեկացանք, որ Արդվի համայնքի բնակիչները ստորագրահավաք են սկսել «Միռամ» ՍՊԸ-ի կողմից նախաձեռնված աշխատանքների դեմ:

«Արդվին, չնայած իր փոքրությանը, ունի բավականին հին պատմություն. գյուղում է ամփոփված Հովնան Օձնեցի կաթողիկոսի աճյունը: Արդվիում են ամփոփված նաեւ Ռուսական կայսրության արիստոկրատ Քալանթարյանների տոհմային թանգարանը եւ Օձի պորտ բուժիչ ջրերի ակունքը, որը գյուղն ապահովում է հազարավոր զբոսաշրջիկներով: Օրերս լրատվամիջոցներից մեկի հրապարակումից հայտնի դարձավ, որ գյուղի հարակից Շեկաղբյուր կոչվող սարավանդում նախատեսվում է հանքավայրի հետախուզական աշխատանքներ: Նշված հատվածում են գտնվում գյուղի խմելու ջրի ակունքը եւ անասունների արոտավայրը: Հանքերեւակման տարածքն ընդհանուր առմամբ զբաղեցնում է շուրջ 200 հա մակերես: Ընդգրկում է երկու համայնքի` Մղարթի 54 հա եւ Արդվիի 146 հա տարածքները:

Հարկ է նշել, որ գյուղի հանրությունը նշված գործընթացից բացարձակ անտեղյակ է եւ չի մասնակցել որեւէ հանրային քննարկման: Մինչդեռ Բնապահպանության նախարարության կայքից տեղեկանում ենք, որ սույն թվականի հուլիսի 26-ին Արդվիի համայնքապետարանում նախատեսվում է արդեն երկրորդ հանրային քննարկումն անցկացնել: Այս հանգամանքը գյուղացիների մոտ դժգոհությունների լուրջ առիթ է հանդիսացել, եւ բոլորը միահամուռ հայտնում են, որ չեն թողնի որեւէ հանքի շահագործում»,- ասված է գյուղացիների նամակում, որը ստորագրել է ավելի քան 8 տասնյակ գյուղացի:

Արդվի համայնքի ղեկավար Սամվել Կիրակոսյանից փորձեցինք որոշ տեղեկություններ ստանալ հանրայի քննարկման եւ այլ հարցերի վերաբերյալ, սակայն նրա արձագանքը մտահոգիչ էր: «Ուշադիր լսում եմ, բոլոր հարցերը տվեք»,- ասաց Սամվել Կիրակոսյանը, սակայն երբ առաջին հարցը լսեց, արագ ասաց. «Ես ժամանակ չունեմ, արձակուրդում եմ, հիմա հավաքված, ծննդի եմ հրավիրված, ես ժամանակ չունեմ, ձեր հարցերին չեմ կարող պատասխանել»: Սամվել Կիրակոսյանի հետ մեր զրույցն այսքանով ավարտվեց:

«Համայնքային համախմբման եւ աջակցության կենտրոն» ՀԿ-ի տնօրեն Օլեգ Դուրգարյանը մեր զրույցում ասաց, որ ոսկու հանքի ուսումնասիրության վերաբերյալ տեղեկացված չի եղել, այնպես ինչպես եւ գյուղացիները տեղյակ չեն եղել: «Երեկ գյուղացիները դիմեցին մեզ, հենց երեկ էլ տեղեկացա, որ գյուղացիները դրա նախորդ օրերին ստորագրահավաք են կազմակերպել, որ ամսի 26-ին համայնքում հանրային երկրորդ լսումներն են, ի դեպ, գյուղացիները նշում են, որ առաջին լսման վերաբերյալ իրենք չգիտեն, երբ է դա տեղի ունեցել»,- ասաց Օլեգ Դուրգարյանը՝ նշելով, որ ինքը պարզապես օգնել է գյուղացիների խնդրի հանրայնացմանը:

«Հենց երեկ տեղեկացա դրա վերաբերյալ, նախաձեռնությունը հենց համայնքի բնակիչներինն է: Ի ուրախություն մեզ բոլորիս եւ արտաքին միջամտությամբ պայմանավորված չէ, սակայն մենք պատրաստակամ ենք աջակցել համայնքի բնակիչներին իրեն նախաձեռնության եւ կամարտահայտման գործում»,- ասաց մեր զրուցակիցը` նշելով, որ գյուղացիները, կարծես, արդեն որոշել են,  որ իրենք տարածք չունեն հանքի համար հանձնելու: «Մարդիկ բարեհաջող զբաղվում են գյուղատնտեսությամբ: Առանց այն էլ Լոռու մարզի Թումանյանի տարածաշրջանի համայնքների կեսից ավելին խոցված է հանքարդյունաբերությամբ»,- ընդգծեց Դուրգարյանը:

«Հետք» էլեկտրոնային պարբերականը պարզել է, որ «Միռամ» ՍՊԸ-ն ընդամենը երկամսյա պատմություն ունի: Գրանցվել է այս տարվա մայիսի 10-ին: Ընկերության ամենամեծ բաժնետերը Արայիկ Սամվելի Զադոյանն է: Նրան է պատկանում բաժնեմասի 34 %-ը: Արայիկ Զադոյանը նաեւ ՀՀԿ խմբակցության ղեկավար Վահրամ Բաղդասարյանին պատկանող «Վաբա» ՍՊԸ-ի տնօրենն է: Մնացած 33-ական տոկոս բաժնեմասերի տերերը վանաձորցի Անահիտ Շավարշի Դանիելյանն է եւ ՌԴ քաղաքացի Հենրիկ Մեսրոպի Գեւորգյանը: Վերջինս նաեւ ընկերության տնօրենն է:

Նշենք, որ Մղարթ համայնքի ոսկու հանքն էլ շահագործում է «Մուլտի գրուպ» ընկերությունը, որը հիմնադրել է ԱԺ պատգամավոր Գագիկ Ծառուկյանը: