Մարդիկ կան՝ քնում-արթնանում, ուզում են՝ Դաշնակցությունը վերանա. Արմեն Ռուստամյան

ԱԺ ՀՅԴ խմբակցության պատգամավոր Անդրանիկ Կարապետյանը երեկ ԱԺ պետաիրավական հանձնաժողովի նիստի ժամանակ դեմ քվեարկեց Ծառուկյան խմբակցության կողմից ներկայացված օրենքի նախագծին, որով նախատեսվում էր Ընտրական օրենսգրքում փոփոխություններ կատարել եւ այլեւս ռեյտինգային ընտրակարգով ընտրություններ չանցկացնել Հայաստանում: Մինչդեռ, ՀՅԴ-ն Ծառուկյան խմբակցության նման ցանկանում է, որ ընտրություններն այլեւս այս ընտրակարգով չանցկացվեն: Այս մասին բազմիցս հայտարարել են ՀՅԴ-ական գործիչները: ՀՅԴ խմբակցության ղեկավար Արմեն Ռուստամյանից հետաքրքրվեցինք, թե ինչպե՞ս է ստացվում, որ պատգամավորը խմբակցությանը հակառակ քայլեր է անում: Արդյո՞ք տպավորություն չի ստեղծվում, որ ՀՅԴ-ն չի համարձակվում ՀՀԿ-ի կամքին հակառակ քայլեր կատարել:

«Երբ քննարկում է գնում, խմբակցությունում մեր պատգամավորներին հնարավորինս ազատ ենք թողնում, որպեսզի իրենք իրենց տեսակետներն ավելի ամբողջական, առանց կաշկանդվելու կարողանան ներկայացնել: Իսկ Դաշնակցության տեսակետը կերեւա, երբ բուն նյութը կմտնի լիագումար նիստ եւ մենք կքվեարկենք: Մենք գործող ռեյտինգային ընտրակարգից հրաժարվելու քայլեր ենք կատարելու, բայց մարտավարությունը, որը մեզ պարտադրվում է, անընդունելի է: Մենք սրա մասին ասել ենք, որ սա մերժվելու է»,- ՀԺ-ի հետ զրույցում պարզաբանեց դաշնակցականը: Ռուստամյանը նշեց, որ Կարապետյանը կողմ է, որ որեւէ ձեւով լինի ռեյտինգային ընտրակարգը, որը ՀՅԴ մոտեցումներում եւս կա:

«Երբ մենք ասում ենք հրաժարվել այս ընտրակարգից, դա չի նշանակում, որ միակ ճանապարհն այն է, ինչ առաջարկում են մեր մյուս գործընկերները: Սա նույնպես ճանապարհ է, բայց միակը չէ: Այդ ճանապարհը, որ առաջարկվել է, Անդրանիկ Կարապետյանի սրտով չէ, որովհետեւ նա ուզում է այդ ընտրակարգը պահպանվի»,- ասաց Ռուստամյանը: Նա պնդեց, որ Դաշնակցության համար երկու տարբերակներն էլ ընդունելի են, թե՛ ռեյտինգային չլինելը, թե լինելը:

«Մենք հարցը ձեւակերպում ենք այսպես` գոյություն ունի մի գործող կարգ, որից պետք է հրաժարվել եւ դրա համար հիմնավոր փաստեր ենք բերում, բայց այդ հրաժարվելու հատուկ հարցը ձեւակերպում ենք այնպես, որ կոնսենսուս ձեւավորվի այն խնդրի շուրջ, որ գործողը սխալ է: Պետք է միասին գտնել այն լուծումը, որն այս վիճակը կփոխի, եւ սրա համար տալ հնարավորություն մյուս գործընկերներին էլ մասնակից դառնալու, ոչ թե մենք նախապես նախապայման դնենք, որ հատկապես այս ճանապարհով փոխվի, սա ոչ մի տեղ չտանող ճանապարհ է»,- ընդգծեց Ռուստամյանը` հավելելով, որ տեղի ունեցավ այն, ինչ իրենք կանխատեսել էին: Ռուստամյանը նկատեց, որ եթե խոսվում է ռեյտինգայինը պահելու մասին, դրա տարբերակներն էլ բազմաթիվ են:

«Ինչու՞ ենք հիմա մենք ուզում հեւիհեւ ինչ-որ մի խնդիր լուծելու համար մի տարբերակ վերցնենք եւ բոլոր ուժերը մսխենք դրա վրա, մանավանդ գիտենք, որ վերջում արդյունք չեն տալու: Ռեյտինգայինի տարբեր ձեւեր կան, որի շուրջ պետք է բանակցել, մենք չենք էլ ուզում որ տպավորություն առաջանա, թե սա մի հարց է, որը բերելու է կոալիցիայի ներսում պառակտումների: Մենք ուզում ենք պահպանել կառուցողական մեր մոտեցումը եւ սա վստահ ենք լուծում կունենա, եթե մեր կոալիցիոն գործընկեր Հանրապետականը սրա հետ համաձայնվի, ուստի կամուրջներն այրելու, ինքնանպատակ քայլեր կատարելու խնդիր մենք այս դաշտում չենք ունեցել, չենք էլ ունենալու, որովհետեւ դա անհեռանկար է»,- ասաց նա:

Երեկ Նաիրա Զոհրաբյանը իր ելույթի ժամանակ նշել էր, որ ՀՅԴ-ին հավանաբար 125 տարի էլ պետք է լինելու, որ որոշի ԸՕ-ի փոփոխության նախագիծ ներկայացնի: Արմեն Ռուստամյանն մեր զրույցում ոչ ուղղակի պատասխանեց Զոհրաբյանի հայտարարությանը:

«Մարդիկ կան՝ քնում-արթնանում են, միայն ուզում են տեսնել, որ Դաշնակցությունն ընդհանրապես այլեւս գոյություն չունի, դարձել է կցորդ, վերացել է. նայում եմ, ինչ-որ անտրամաբանական օդից վերցրած եզրակացություններ, եթե այդպես նայենք Հանրապետականն է միացել Դաշնակցությանը, երբ ամբողջ մեր առաջարկությունները, մեր օրակարգն ընդունել է. հիմա ո՞վ է ում միացել, այս ի՞նչ պրիմիտիվ մտածելակերպ է»:

Նա ընդգծեց, որ նրանց ձեռք չի տալիս ընդունել, որ գոյություն ունի մի լուրջ քաղաքական ուժ, որն ունի իր օրակարգը եւ դրանից չի հրաժարվում, սա իրենց քաղաքական հաշվարկների մեջ չի տեղավորվում:

«Զուտ մրցակցային առումով իրենք այդ դաշտը կորցնում են եւ ուզում են սեփականաշնորհել ամեն ինչ: Բոլորը վատն են, իրենք պուպուշ են՝ այս տրամաբանությամբ է ամեն ինչ ընթանում: Իրենք արեւի տակ իրենց տեղը պահպանելու խնդիր պիտի լուծեն` Դաշնակցությունը դրանից դուրս մղելու տրամաբանությամբ, բայց ինչպես հայտնի է 127 տարի այդ փորձը կատարել են, ոչ մեկին դա չի հաջողվել, 127 օրվա կամ ժամվա կենսագրություն ունեցողներին հաստատ դա չի հաջողվի»,- եզրափակեց նա:

Անդրադառնալով պատգամավորի քվեարկությանը նշենք, որ Անդրանիկ Կարապետյանն ԱԺ-ում հազվադեպ է քաղաքական դիրքորոշում արտահայտում, որը կտրուկ տարբերվում է ՀՅԴ-ի դիրքորոշումից: Վերջն անգամ էլ նա զարմանալի ելույթ ունեցավ՝ հայտարարելով, որ կոռուպցիայի դեմ պայքարը «գործ տալ է»:

 Նյութը տպագրվել է «Հայկական ժամանակ» օրաթերթի փետրվարի 23-ի համարում:

Տպել
2144 դիտում

Թափառող կենդանիների վնասազերծմամբ զբաղվող ընկերության ընտրության նոր մրցույթ կհայտարարվի

Արցախի ՄԻՊ Արտակ Բեգլարյանը շնորհավորել է արցախյան եռատոնի առթիվ

Զոհրաբ Մնացականյանն ընդունել է միջազգային դիտորդական առաքելությունների ներկայացուցիչներին

Շնորհավորում ենք խորհրդարան անցած երեք քաղաքական ուժերին. «Օրինաց երկիր»

Հայաստանը չի ձգտում դառնալ ՆԱՏՕ-ի անդամ. Նիկոլ Փաշինյան

Ուկրաինայի իշխանությունների որոշումն անխոհեմ է. Պեսկով

Շնորհավորանք ու եռագույն սրտիկ՝ ԱՄՆ դեսպանատնից հայ ժողովրդին

Սուրեն Շահվերդյանը հրաժարական է տալիս Համազգային թատրոնի գեղարվեստական ղեկավարի պաշտոնից

Մեյը հետաձգել է Brexit-ի հարցով քվեարկությունը

Սա աննախադեպ իրադարձություն է, կարևոր նվաճում 3-րդ հանրապետության պատմության մեջ (տեսանյութ)

Անվավեր քվեաթերթիկների վրա այս անգամ հումորներ համարյա չկային․ դրանք անցել էին համացանցի տիրույթ

Մարդու իրավունքների պաշտպանության օրվան նվիրված միջոցառումներ ՊՆ-ում (լուսանկարներ)

Ինչպես են բաշխվել քվեները 2-րդ ընտրատարածքում

Ունեցանք միաբևեռ Ազգային ժողով. «Մենք» դաշինքը՝ ընտրությունների մասին

Գյումրեցի Ջուլիետա Ղուկասյանի սպանությունից 8 օր անց դեռ կասկածյալ չկա

«Սասնա ծռերը» ճանաչել է ԱԺ արտահերթ ընտրությունների արդյունքները, մաղթել արգասաբեր աշխատանք

Ի՞նչ հաջորդականությամբ են ձայները բաշխվել 4-րդ ընտրատարածքում

Ռուսաստանի հետ բարեկամության և համագործակցության համաձայնագիրը դադարեցվում է Պորոշենկոյի որոշմամբ

Ինձ պասիվ էի պահում, որ նախընտրական այս շրջանում չքաղաքականացվեր. Հ. Գալստյանն արդեն 8-րդ օրն է՝ հացադուլի մեջ է

Թեկնածուներից մեկի օգտին քվեարկելուն հարկադրելու առերևույթ դեպք է արձանագրվել. հարուցվել է քրգործ