Հաց բերողի հուշարձանը կկանգնեցվի Մաշտոցի պուրակում

Այսօր Ճարտարապետների միությունում բացվեց Արթուր Սարգսյանի՝ Հաց բերողի տարելիցին նվիրված հուշարձանի մանրակերտի ցուցադրությունը: Արթուր Սարգսյանի հուշարձանի նախագիծն այսօրվանից ներկայացված է հանրային քննարկման: Նախագծի հեղինակ, ճարտարապետ Անահիտ Թարխանյանն ասաց, որ նախնական որոշմամբ Մաշտոցի պուրակում է տեղադրելու հուշարձանը:

Անահիտ Թարխանյանը նշում է, որ տարբեր տարածքներ ուսումնասիրելով՝ հասկացան, որ Երեւանում կա մի տարածք, որը լիովին համապատասխանում է քաղաքացիական հանրությանը: «Մաշտոցի պուրակում մենք գտանք հատված, որտեղ ծառ չի կտրվելու, ընդամենը 2 տարեկան բալենու ծառն է, որը զգուշությամբ պիտի հանենք եւ տեղափոխենք, մնացածն ամբողջությամբ մարգ է»,- լրագրողների հետ զրույցում ասաց ճարտարապետը:

Անահիտ Թարխանյանի խոսքով՝ մարգի մեջ, փոքր բազալտե հարթակով դրվելու է հուշարձանը: Ունենալու է բազմազան սյուներ, որոնցից ամեն մեկը խորհրդանշելու է Արթուր Սարգսյանի բնավորության բազմազանությունը, իսկ ապակին, որով ավարտվում են բազալտե սյուները, խորհրդանշում է այն բարությունն ու հումանիստական վերաբերմունքը, որն Արթուր Սարգսյանը դրսեւորել է իր ամբողջ կյանքի ընթացքում:

Հաց բերողի հուշարձանի մանրակերտը

Անահիտ Թարխանյանն ասաց, որ հուշարձանը իրականում մեծ չէ, քառանիստ է, մոտավորապես 9 քառակուսի մետր մակերես է զբաղեցնելու: Հիմնական գաղափարախոսությունն այն է, որ մաքրությունից բարձրանում է հայ ժողովրդի կարծր բնավորությունը, որը տեսնում ենք Հաց բերողի մեջ: Ասում է, որ փորձել են բոլոր այդ սիմվոլները դնել հուշարձանի մեջ, իսկ գնահատականն արդեն ժողովուրդը պետք է տա:

Հասարակական գործիչ Թամարա Հովհաննիսյանի խոսքով՝ սա սիմվոլիկ նշանակություն եւ պատգամ ունի, որ մարդը մարդու նկատմամբ պետք է լինի ոչ թե գազան, ոչ թե թալանելու մտադրությամբ մոտեցող, այլ նրան օգնելու եւ ձեռք մեկնելու: «Հեղինակն աշխատել է մոտեցնել Արթուրի բնույթին, կոթողը ջրավազանի վրա է կանգնած լինելու, ջրերից դուրս է գալիս ամուր կամային մի էություն, ապա ապակու միջոցով նորից մաքրվում եւ բարձրանում դեպի հավերժությունը»,- ասաց Թամարա Հովհաննիսյանը:

Նոյեմբերի 2-ին անցկացված մամուլի ասուլիսի ժամանակ մի խումբ մտավորականներ հանդես էին եկել Արթուր Սարգսյանի արձանը կանգնեցնելու առաջարկով, եւ ներկայացրել էին արձանի նախագիծը: Ճարտարապետ Անահիտ Թարխանյանն ասաց, որ հուշարձանի նախագիծը ներկայացրել էին Թամարա Հովհաննիսյանի, Հասմիկ Պապյանի եւ Եղիշե Պետրոսյանի հետ:

Ըստ քաղաքապետարանի հիմնական դրվածքի պետք է լինեն մի խումբ արվեստագետներ, որոնք ներկայացնում են գործը, ապա այդ գործը պետք է անցնի հանրային քննարկումների եւ միայն դրանից հետո հնարավոր կլինի դիմել քաղաքապետարան, որպեսզի նախ, համաձայնեցում եւ տարածքի հատկացում լինի արձանի համար, ապա հատկացված տեղի հիման վրա կարողանան արդեն հաստատել հուշարձանը:

Նշենք, որ հուշարձանի մանրակերտն իրականություն է դարձրել երիտասարդ ճարտարապետ Արին Ավետիսյանը, որը գրեթե երեք ամիս աշխատել է նախագծի վրա: Անահիտ Թարխանյանը, անդրադառնալով քաղաքապետարանի թույլտվությանն ու հուշարձանի տեղադրմանը Մաշտոցի պուրակում՝ նշեց, որ պետք է միշտ լավով նայել ապագային եւ գուցե այսօր, կամ վաղը քաղաքապետարանը չկարողանա համապատասխան որոշում կայացնել, սակայն ի վերջո որոշումը կկայացվի: «Ես համոզված եմ, որ մեկ կամ երկու ամիս հետո մենք կստանանք դրական պատասխան, իսկ եթե ոչ՝ ամբողջ կյանքը դեռ առջեւում է: Օրերից մի օր այդ դրական պատասխանը կհնչի եւ հուշարձանը կկառուցվի, եթե ոչ մենք, ապա մեր երեխաներն ու թոռները կտեսնեն Հաց բերողի հուշարձանը»,- ասաց նա:

Խոսելով նախագծման մասին՝ ճարտարապետն ասաց, որ արվեստագետը, երբ նախագահում է, չի մտածում, թե ինչ կհաստատվի տվյալ ժամանակվա ճարտարապետության կանոնների համաձայն, նախագծում է այն՝ ինչ գտնում է կարեւոր. «Ձեւավորել մի հուշակոթող, որը բոլորին կհուշի բարոյականությունը, քանի որ հայ ժողովուրդը ծարավ ունի հիշելու, բարի եւ ինքնաբավ լինելու»:

Նշենք, որ հուշարձանի մանրակերտի ցուցադրությունը բաց է այսօրվանից եւ բաց կլինի մինչեւ մարտի 16-ը՝ Հաց բերողի մահվան տարելիցի օրը ներառյալ:

Աղունիկ Հովհաննիսյան