Քաղաքապետարանը զերծ է մնում Հաց բերողի արձանը տեղադրելու մասին վերաբերմունք հայտնելուց

Երեւանի քաղաքապետարանը զերծ է մնում Հաց բերող Արթուր Սարգսյանի արձանը Երեւանի կենտրոնում տեղադրելու արվեստագետների եւ ճարտարապետների առաջարկի վերաբերյալ վերաբերմունք հայտնելուց: Քաղաքապետարանի աշխատակազմի տեղեկատվության եւ հասարակայնության հետ կապերի վարչության պետ Արթուր Գեւորգյանն armtimes.com-ի հարցին ի պատասխան ասաց, որ մշակույթի գործիչների առաջարկի վերաբերյալ վերաբերմունքը կարող է լինել անձնական եւ ոչ երբեւէ գերատեսչական:

«Նախ նշենք, որ կա մայրաքաղաքում արձաններ տեղադրելու համապատասխան ընթացակարգ: Թող բերեն առաջարկը, պետք է դա քննարկվի համապատասխան հանձնաժողովում, համապատասխան հանձնաժողովը թող իր եզրակացությունը տա, որի վերաբերյալ կտեղեկացնենք»,- ասաց Արթուր Գեւորգյանը:

Նշենք, որ այսօր «Մեդիա կենտրոն»-ում հրավիրված համատեղ ասուլիսի ժամանակ դերասան Թամար Հովհաննիսյանը հիշեցրեց, որ Արթուր Սարգսյանը 2016 թվականի հուլիսին ոստիկանության ՊՊԾ գունդը գրավելուց հետո սնունդ տարավ գրաված անձանց: «Իր արարքը միայն հայերին ու հայկականությանը բնորոշ չի: Դա բնորոշ է մարդ արարածին, եթե նա շարունակում է մնալ մարդ, եթե նա շարունակում է ձգտել կատարյալին որպես մարդ»,- նշեց Թամար Հովհաննիսյանը՝ ավելացնելով, որ Արթուր Սարգսյանը մի գիշերում դարձավ համայն հայության համար սիրելի մարդ:

Ասուլիսում ճարտարապետ Անահիտ Թարխանյանը ներկայացրեց Արթուր Սարգսյանին նվիրված հուշարձանի նախագիծը, որը ցանկանում են, որ տեղադրվի Երեւանի Բեյրութի եւ Իտալիայի փողոցների միջնամասի այգում՝ Իտալիայի դեսպանատան դիմաց:

Արձանը բազալտի քարերով սյուների համաձուլվածք է: Քառակուսու նմանվող ջրավազանի միջից վեր են խոյանում սյուները, որոնց վերին հատվածն ապակուց է: Սյուներն իրարից առանձին են: Քառակուսու նմանվող սյունախմբի մի պատին լինելու է Արթուր Սարգսյանի նկարը, որը արձանի շուրջը պտտվող մարդը միայն մի կետից կարող է տեսնել, իսկ երբ հեռանա դիտողը արձանից, Արթուր Սարգսյանի նկարն այլեւս չի երեւա: Արձանին հարող հրապարակում տեղադրվող քարի վրա գրվելու է Արթուր Արգսյանի հայտնի խոսքերից մեկը, որը դեռեւս չեն ընտրել:

«Հուշարձանի արժեքի մասին դեռ շատ վաղ է խոսել, որովհետեւ դա դեռ էսքիզ է եւ երեւի թե մեկ տարուց կամ կես տարուց ոչ շուտ մենք հնարավորություն ունենանք հստակ արժեքը որոշել, բայց դա էլ կախված է քաղաքապետարանից: Մենք դիմելու ենք ճարտարապետանախագծային առաջադրանք ստանալու համար: Ինչքան էլ լինի հուշարձանի արժեքը հայ ժողովուրդը կգտնի անհրաժեշտ գումարները, որպեսզի կանգնեցնի այդ հուշարձանը»,- ասաց Անահիտ Թարխանյանը: