Այս գիշեր Ֆրանսիայի հրապարակում ավելի շատ մարդ է գիշերելու. թարմացված (լուսանկար)

Նախորդ իրադարձությունների ընթացքին կարող եք հետեւել՝ այստեղ:

00:00-Ցուցարարները շարուանկում են մնալ Ֆրանսիայի հրապարակում: Տեղեկություններ կան, որ հրապարակում գիշերողներն այսօր ավելի շատ են լինելու: Նիկոլ Փաշինյանի խոսքով՝ նախորդ գիշեր հրապարակում գիշերել է մոտ 200 հոգի: Այս պահին Ֆրանսիայի հրապարակում մի քանի հարյուր հոգի կա, որոնք ջերմ մթնոլորտում երաժշտություն են լսում եւ գնդակ խաղում:  Վաղը 14:00-ին եւ 18:30-ին կրկին լինելու է հանրահավաքներ:

20:15- Հանրահավաքի ժամանակ Լեւոն Բարսեղյանն իր խոսքում կատակեց, որ Սերժ Սարգսյանն անհետ կորել է, ըստ երեւույթին նրան տարել են Ծաղկաձոր ՀՀԿ-ականներն ու պատանդ են պահում, ենթարկում թրաֆիքինգի, իսկ նա մարդկանց պետք է, որովհետեւ նրան ուղղված բազմաթիվ հարցեր կան: Լեւոն Բարսեղյանի խոսքերով, այսօրվա ծաղկաձորյան փախուստը տեսնելով, հնարավոր է, որ ՀՀԿ-ն Ազգային Ժողովի առաջիկա նիստը շատ ավելի գաղտնի պայմաններում անի, օրինակ՝ Դուբայում:

Բարսեղյանը եւս կոչ արեց բոլոր ընդդիմադիրներին՝ մոռանալ ներքին վիրավորանքները, մանավանդ՝ ԵԼՔ դաշինքի 2 կուսակցություններին՝ իր վաղեմի ընկերներ Էդմոն Մարուքյանին, Արտակ Զեյնալյանին, Մանե Թանդիլյանին եւ մյուսներին, գալ եւ միանալ այն մարդկանց, որոնք քվեարկել են իրենց օգտին: Իսկ հավաքված մարդկանց կոչ արեց ուժեղ լինել, չնահանջել, քանի որ բարդ օրեր են սպասվում, ուժեղ դիմակայություն:

Դավիթ Սանասարյանը կոչ արեց դուրս գալ համահայկական գործադուլների, չներկայանալ աշխատանքի ու ազատվել 80, 100 կամ 120 հազար դրամի դիմաց տրվող ստրկությունից, միանալ հանրահավաքին, անել քայլ ու հասնել արդյունքի:

Նիկոլ Փաշինյանն իր խոսքում անդրադարձավ այսօրվա իրադարձություններին, Հանրային ռադիոյի շենքի գրավմանն ու մերկ ձեռքերի պայքարին: Նա կրկին անգամ համերաշխության կոչ արեց ու շեշտեց, որ եթե այս անգամ էլ հիասթափեցնեն ժողովրդին, իրենց կսկսեն ատել ճիշտ այնպես, ինչպես հանրապետականներին:

19:30- Ֆրանսիայի հրապարակում բազմամարդ հանրահավաք է: Ելույթներով են հանդես գալիս  հանրահավաքի կազմակերպիչները: Արդեն խոսել են Լեւոն Բարսեղյանը, Դավիթ Սանասարյանը, այս պահին ելույթ է ունենում Նիկոլ Փաշինյանը:

17:40-Երթի մասնակիցները բացել են փակված փողոցները եւ շարժվում են Ֆրանսիայի հրապարակ:

17:20- Երթի մասնակիցները փակել են Ագաթանգեղոս-Գրիգոր Լուսավորիչ եւ Արշակունյաց փողոցների խաչմերուկը եւ նստացույց են հայտարարել:

17:07- Երթի մասնակիցները Խանջյան փողոցի թունելում են, որտեղ շարունակվում են վանկարկումները, վառվել են գունավոր ֆաերներ:

17:00- Հանրային ռադիոյից դուրս գալուց հետո երթը շարժվեց դեպի Խանջյան փողոց, մի պահ կանգ առան ՀՖՖ-ի մոտ, Նիկոլ Փաշինյանը կարդաց Ֆուտբոլի ֆեդերացիայի նախագահ Ռուբեն Հայրապետյանի այն հայտարարությունը, որում նա ասել էր, որ եթե հայկական ֆուտբոլը ձախողվի, նա 2018-ին հրաժարական կտա: Փաշինյանը նաեւ նշեց, որ հայկական ֆուտբոլը իրեն չի արդարացրել եւ դա համարվում է ձախողում, Ռուբեն Հայրապետյանը հրաժարական չի տվել, նա կրկնում է իր ղեկավարի՝ Սերժ Սարգսյանի քայլը եւ խոստմանը տեր չի լինում, որից հետո Փաշինյանը ծակ գնդակ նետեց ՀՖՖ բակ: Երթը շարունակվում է:

16:30- Հանրային ռադիոյի շենքը գրաված ցուցարարներին դրսում սպասում էին հազարավոր քաղաքացիներ, այս ամենը Նիկոլ Փաշինյանն անվանեց սիմվոլիկ ակցիա: Ցուցարարներն ամբողջությամբ փակել են Ալեք Մանուկյան փողոցը:

16:25- Ցուցարարները դուրս եկան Հանրային ռադիոյի շենքից: Կորել է Նիկոլ Փաշինյանի ուսապարկը: Նա այն փնտրեց շենքի ներսում, այժմ փնտրում է դրսում:

16:15- Նիկոլ Փաշինյանը ԶԼՄ-ների ուղիղ եթերում ելույթ ունեցավ ու հայտարարեց. «Ձեզ հետ խոսում է ԱԺ պատգամավոր, նախկին քաղբանտարկյալ Նիկոլ Փաշինյանը... Սերժ Սարգսյանը պատրաստվում է վերստին զավթել իշխանությունը: Կոչ ենք անում այսօր 18:30-ին հավաքվել Ազատության հրապարակում, արա քո քայլը եւ Ս. Սարգսյանը կանի իր ետքայլը, արա քո քայլը եւ ՀՀԿ-ն կանի իր ետքայլը»:

Վերջում Փաշինյանը հավելեց, որ Հանրային ռադիոն երբեւէ չի համաձայնել հրապարակել ցույցերի, հանրահավաքների մասին իրենց իրազեկումները, ի պատասխան՝ ռադիոյի աշխատակիցը հակադարձեց, որ միշտ եթերաժամանակ տրամադրվել է:

16:00- Անջատեցին Հանրային ռադիոյի շենքի լույսերը: Նիկոլ Փաշինյանը, սակայն, որոշեց այնուամենայնիվ ելույթ ունենալ ու քանի որ ուղիղ եթերի հնարավորություն չեղավ, նա ելույթ կունենա այնտեղ ներկա լրատվամիջոցների առաջ, խնդրեց 5-10 րեպե՝ պատրաստվելու համար:

15:50- Նիկոլ Փաշինյանը շուրջ կես ժամ բանակցում էր Հանրային ռադիոյի ղեկավարի տեղակալ Լիկա Թումանյանի հետ: Վերջինս առաջարկեց եթերաժամանակ տրամադրել երեկոյան ժամը 19:00-ին, ինչին Նիկոլ Փաշինյանը չհամաձայնեց: Ռադիոյի շենքի ներսում հավաքված մարդիկ եւս վանկարկում էին, որ եթեր են պահանջում հենց հիմա: 

Հանրային ռադիոյի ղեկավարի տեղակալ՝ Լիկա Թումանյանը ժամանակ խնդրեց՝ քննարկելու համար հենց հիմա եթերաժամանակ տրամադրելու հարցը:

15:38- «Մեդիադաշտի զգալի մասը Սերժ Սարգսյանի ընտանիքի սեփականությունն է դարձել՝ ի դեմս Միքայել Մինասյանի: Մենք բողոքում ենք այն բանի դեմ, որ հեռուստատեսային դաշտը բլոկադայի է ենթարկել #ԻմՔայլը արշավը եւ վերջին ամիսներին Սերժ Սարգսյանի դեմ իրականացվող կոնսոլիդացիան: Հ1-ը դարձել է Սերժ Սարգսյանի քարոզչության մեքենան եւ Հ1-ը դարձել է քաղաքացիներին գերեւարելու գործիք: Մենք սրանով մեր բողոքն ենք արտահայտում քաղաքացիներին տեղեկատվական բլոկադայի ենթարկելու համար: Մենք շարունակելու ենք մեր խաղաղ բողոքի ակցիաները»,-Հանրային ռադիոյի ուղիղ եթերից հայտարարեց Նիկոլ Փաշինյանը:

15:25- Ցուցարարներին այնուամենայնիվ հաջողվեց բարձրանալ, նրանք գրավել են Հանրային ռադիոյի շենքը, որտեղ պատրաստվում է ելույթով հանդես գալ Նիկոլ Փաշինյանը:

15:20- Ոստիկանը զենք է ուղղել ցուցարարների վրա, որոնք մտել են Հանրային ռադիոյի շենք: Ոստիկանը չի թողնում բարձրանալ վերեւ:

15:05- Շարունակվում է բազմամարդ երթը Երեւանի փողոցներում: Երթի մասնակիցները հընթացս ողջունում են պատուհաններից նայող բնակիչներին, անցորդներին, մեքենաների վարորդներին, որոնք պատասխանում են ձայնային ազդանշաններով, նաեւ դարձյալ կոչ է արվում ընդդիմադիրներին՝ դուրս գալ հրապարակ ու անել իրենց քայլը: Երթի մասնակիցները հեղեղել են փողոցները, երթն ընթանում է «Քա՛յլ արա, մերժի՛ր Սերժին» վանկարկումներով, ծափահարություններով ու մեծ ոգեւորությամբ:

14:50- Նիկոլ Փաշինյանն իր ելույթը սկսեց քիչ առաջ տեղի ունեցած ՀՀԿ նիստի մասին խոսելով, այնուհետ 2 հայտարարություն արեց.

«Առաջին հայտարարությունն այն մասին է, որ Մաշտոցի պողոտա-Մոսկովյան խաչմերուկ են հրավիրվում ավտոերթի մասնակիցները, որոնք հավաքվելու էին ժամը 16:30-ին Հարսնաքարի մոտ ու շարժվելու էին դեպի Ծաղկաձոր: Սերժ Սարգսյանը դարձել է «Նեուլավիմի Ջոն», չենք կարող ֆիքսել նրա գտնվելու վայրը՝ շրջափակելու համար: Հաջորդ հայտարարությունը ընդդիմադիր քաղաքական ուժերին համերաշխության կոչ անելու մասին է: Այս քաղաքական գործընթացում ամենակարեւորը համերաշխություն ապահովելն է: Այսօր առավոտ եկել ու մինչ այժմ այստեղ է Րաֆֆի Հովհաննիսյանը, այստեղ էր նաեւ «Ազատ Դեմոկրատներ»-ից Խաչատուր Քոքոբելյանն իր կուսակիցների հետ, այստեղ է Պարույր Հայրիկյանն իր կողմնակիցների հետ, ՀԱԿ-ի առնվազն երիտասարդական թեւի ներկայացուցիչներն են մեզ միացել, այստեղ է Արամ Կարապետյանը, սա շատ լավ բանաձեւ է՝ համերաշխություն-մինուս Սերժ Սարգսյան»,- ասաց Փաշինյանը: Նա նաեւ հայտարարեց.

«Սերժ Սարգսյանը եւ ՀՀԿ-ն նախ թռած են Երեւան քաղաքից, հիմա էլ թռած են Ծաղկաձորից: Ասում ենք՝ գնում ենք ՀՀԿ-ի շենքը շրջափակենք, փախնում են Ծաղկաձոր, ասում ենք՝ ավտոերթով գնում ենք Ծաղկաձոր, կես ժամում նիստ են անում, Սերժ Սարգսյանի թեկնածությունն են առաջարկում ու հեռանում: Հիմա ու՞ր գանք, ասենք՝ Հայաստանում ենք ձեզ շրջափակում, որ թողնեն ՀՀ-ից գնան: Հիմա ուզում եմ մեկ այլ ավտոերթ անենք, որը կկոչենք «Փնտրում ենք ՀՀԿ-ին շրջափակելու համար:

Կա նաեւ այսպիսի մի խնդիր, հիմա բազմամարդ է հանրահավաքը, բայց մեզ ասում են՝ սովորաբար հանրահավաքների ժամը 18:30-ն է, այդ պատճառով մենք երթ կանենք՝ ցույց տալու համար մեր հզորությունը:

Գիշերն այստեղ միջադեպ է եղել, սակայն կողմերից որեւէ մեկը մեր հանրահավաքի մասնակից չի եղել: Մեր գործողությունները բռնի չեն, բայց չի նշանակում, թե փափուկ են ու քնքուշ: Այն մարդը, որն այստեղ բռնություն կգործածի, նա մեր շարքերում գործ ու անելիք չունի:

Մենք հիմա երթ կանենք, այստեղ կմնա փոքր խումբ՝ հրապարակը պահպանելու համար: Իսկ այսուհետ ամեն օր ժամը 18:30-ին հանրահավաք է, ամեն օր, սա ֆիքսված ժամ է»,-ասաց Փաշինյանն ու հանրահավաքի եկած ժողովուրդը շարժվեց երթի:

14:35- Հանրահավաքը կմեկնարկի հաշված րոպեներից: Հրապարակի բոլոր ծայրերից հարթակի մոտ է հավաքվում հանրահավաքի եկած ժողովուրդը: 

Նշենք, որ որոշ ժամանակ առաջ հրապարակում անվճար ջրի եւ սննդի բաշխման անկյուններ են ստեղծվել, որոնք իրականացվում են հանգանակությունների ու ՔՊ վարչության անդամների միջոցներով:

14:20- Արդեն գրեթե 16 ժամ չորս կողմից փակ է Երեւանի Ֆրանսիայի հրապարակը: Ժամը 14:00-ին սպասվող հանրահավաքը, որը, Նիկոլ Փաշինյանի խոսքերով, գլխավոր հանրահավաքն է լինելու, կսկսվի մոտ կես ժամ ուշացումով:

Այս մասին հայտարարեց Նիկոլ Փաշինյանն ու հավելեց, որ իրավիճակի փոփոխության համար խորհրդակցել է պետք, հասկանալ գործողությունների հետագա ընթացքը:

Խոսքը ժամանակից շուտ տեղի ունեցած ՀՀԿ նիստի ու որոշման մասին է, որն անցել է միաձայն քվեարկությամբ:

Հիշեցնենք, որ այն հայտարարություններից հետո, թե շրջափակվելու է ՀՀԿ կենտրոնական գրասենյակը, կուսակցությունը անսպասելի որոշեց նիստն անցկացնել Ծաղկաձորում: Հանրահավաքի մասնակիցները ծրագրում էին ավտոերթ իրականացնել դեպի Ծաղկաձոր, սակայն ՀՀԿ-ն նիստը սկսել էր բավական շուտ ու որոշել առաջադրել Ս. Սարգսյանի թեկնածությունը:

Այսպիսով, ապրիլի 16-ին ՀՀ վարչապետի պաշտոնում Ազգային ժողովի ՀՀԿ խմբակցությունը պաշտոնապես կառաջադրի Սերժ Սարգսյանի թեկնածությունը:

Տպել
6385 դիտում

«Էլեկտրիկ Երեւան»-ից հայտնի ակտիվիստը դրվագ է պատմել ոստիկանությունում իր եւ Հունան Պողոսյանի հանդիպումից

Վարչական համաներում է կիրառվել 108 հազար 916 քաղաքացու նկատմամբ. Արտակ Զեյնալյան

Մարտական հրաձգությամբ գնդային մարտավարական զորավարժություն`ՊԲ հյուսիսային ուղղության զորամասերի մասնակցությամբ

Նախկին պատգամավոր Հովհաննես Մարգարյանը նոր կուսակցություն է բացել եւ վստահում է Նիկոլ Փաշինյանին

Վենետիկի հանձնաժողովը հայտարարություն է ընդունել ՀՀ Ընտրական օրենսգրքի նախագծի վերաբերյալ

Նախագահն այցելել է Հայաստանում Գերմանիայի դեսպանություն

Հայտնի «դըմփ-դըմփ հու՛»-ն՝ Հունան Պողոսյանի մասնակցությամբ (տեսանյութ)

Հնգյակով ցուցակը զարմացրել է ՀՀԿ-ին. կուսակցությունում մասնակցության վերջնական որոշում չկա

Հիվանդին ԲԿ-ում փոխներարկվել է «Հեպտատիտ Ց» վարակ պարունակող անհամատեղելի արյուն, որի հետևանքով հիվանդը մահացել է

Վահե Գրիգորյանի ընտրության հարցը կքննարկվի հոկտեմբերի 23-ին

Հայ զինծառայողները մասնակցել են միջազգային հեղինակավոր վարժանք-մրցույթին

«Երկիր Ծիրանի»-ին դատապարտում է Հունան Պողոսյանին մարզպետ նշանակելու կառավարության որոշումը

Սերժ Սարգսյանի ընկերոջ որդու նախաձեռնությամբ պատգամավորները դիմել են Սահմանադրական դատարան

Խոշտանգում կատարելու կասկածանքով ձերբակալվել են ոստիկանության Սևանի բաժնի պաշտոնատար անձինք

Կապանի մարզադաշտը կվերանորոգվի ՀՖՖ հաշվին. Նիկոլ Փաշինյան

Երգիչ Սեբուի հոր մեքենան կանգնեցրած եւ կաշառք պահանջած տեսուչները գրավի դիմաց ազատ են արձակվել

Անչափահասի կոկորդից արմունկով սեղմած պահել են, պառկած հասցրել բաժին, ապա բազմաթիվ հարվածներ հասցրել. փաստաբան

Ինձ համար կարեւորագույն խնդիր է՝ ջարդել նարկոտրաֆիկի ողնաշարը, մեծ խմբաքանակներ են անցնում Սյունիքով. Փաշինյան

ՀՀ Թաեքվոնդոյի ֆեդերացիայում աղմուկը չի հանդարտվում

Սեւակ Միքայելյանի քարոզարշավին աշակերտների մասնակցության մասին ձայնագրությունն ուղարկվել է Կոտայքի դատախազություն