Քննիչը վեց ժամյա «զրույց» է ունեցել «Սասնա ծռեր» խմբի անդամ Արայիկ Հակոբյանի հետ

 «Սասնա ծռեր» խմբի անդամ, 52-ամյա Արայիկ Հակոբյանին դատարան տանելու պատրվակով տեղափոխել են ՀՀ հատուկ քննչական ծառայություն, պահել 6 ժամ:

Այս մասին երեկ ահազանգեցին Հակոբյանի պաշտպաններ Լուսինե Սահակյանը եւ Երվանդ Վարոսյանը: Վերջիններս ֆեյսբուքյան իրենց էջում գրառում կատարեցին՝ մանրամասն նկարագրելով Հակոբյանին «դատարան տեղափոխելու» հանգամանքները:

Այսպիսով՝ սեպտեմբերի 6-ին, ժամը 12։00-ի սահմաններում «Սասնա ծռեր» խմբի անդամ Արայիկ Հակոբյանը ՀՀ ԱՆ «Նուբարաշեն» քրեակատարողական հիմնարկից «դատարան տեղափոխվելու» պատրվակով ՀՀ ոստիկանության ուղեկցող վաշտի աշխատակիցների կողմից տեղափոխվել է ՀՀ հատուկ քննչական ծառայություն։ Արայիկ Հակոբյանը տեղափոխվել է ծառայության 4-րդ հարկում գտնվող աշխատասենյակներից մեկը։ Ա. Հակոբյանի` պաշտպաններին անհապաղ հրավիրելու պահանջին նրան ընդունած քննիչը պատասխանել է, թե իբր չի կարողանում նրանց հետ կապվել, քանի որ նրանց հեռախոսներն անհասանելի են։ Սա այն պարագայում, երբ Ա.Հակոբյանի երկու պաշտպանները նույն ժամանակահատվածում գտնվել են նույն քննչական մարմնի վարչական շենքի 2-րդ հարկում, մասնակցել են իրենց այլ վստահորդների հարցաքննությանը։ 6 ժամից ավելի ՀՀ ՀՔԾ-ում պահվելուց, քննիչի հետ «զրույց» ունենալուց հետո, Արայիկ Հակոբյանը կրկին տեղափոխվել է ՔԿ հիմնարկ։

«Հատուկ քննչական ծառայության նման գործելաոճն անընդունելի է, վկայում է այն մասին, որ իր առջեւ դրված պահանջների լուծումը չտեսնելով օրինականության դաշտում, քննչական մարմինը փորձ է կատարում գործի դնել օրենքից դուրս գտնվող մեթոդներ։ ՀՔԾ-ից պահանջում ենք այսուհետ զերծ մնալ նման գործողություններից, գործել բացառապես օրենքով սահմանված կարգով, միջոցներով ու մեթոդներով: Միաժամանակ պատկան մարմիններից պահանջում ենք միջոցներ ձեռնարկել մեղավոր անձանց պատասխանատվության ենթարկելու ուղղությամբ»,- ասված է պաշտպանների տարածած հայտարարությունում:

Սույն հայտարարության հետ կապված՝ երեկ ՀՀ գլխավոր դատախազության հանրային կապերի բաժնից մեկնաբանություն խնդրեցինք: Մասնավորապես, խնդրեցինք նախաքննության օրինականության նկատմամբ հսկողություն իրականացնող դատախազից հետաքրքրվել՝ տեղյա՞կ է քննիչի գործողություններից եւ ի՞նչ քայլեր է ձեռնարկել այդ ուղղությամբ: Գլխավոր դատախազությունից մեր հարցերը պահանջեցին գրավոր: Դիմեցինք նաեւ ՀՀ  հատուկ քննչական ծառայություն՝ պարզելու, թե գործով քննիչը ի՞նչ «զրույց» է  ունեցել Արայիկ Հակոբյանի հետ եւ ի՞նչ քննչական գործողություններ է իրականացրել առանց պաշտպանի ներկայության: ՀՔԾ-ից, սակայն, մեր հարցերին չպատասխանեցին: 

Երեկ զրուցեցինք Արայիկ Հակոբյանի պաշտպան Երվանդ Վարոսյանի հետ: Մեր հարցին, թե քննիչի գործողությունների հետ կապված ի՞նչ քայլեր է պաշտպանական կողմը ձեռնարկելու, Վարոսյանը պատասխանեց. «Մենք արդեն խնդիրը բարձրաձայնել ենք, համապատասխան պատկան մարմինների արձագանքից ելնելով՝ կորոշենք մեր հետագա անելիքները: Կապված է նաեւ, թե ինչ արձագանք կլինի»: Մեր հարցին ի պատասխան պաշտպանն ասաց, որ Արայիկ Հակոբյանը որոշ առողջական խնդիրներ ունի եւ ներկա պահին համապատասխան բուժում է ստանում: Երվանդ Վարոսյանն ասաց, որ իր պաշտպանյալին մեղադրանք է առաջադրվել ՀՀ քրեական օրենսգրքի 218 հոդվածի 3-րդ մասի 1-ին կետով (Պատանդ վերցնելը, որը կատարվել է կազմակերպված խմբի կողմից) եւ 235 հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ իրացնելը): Առաջադրված մեղադրանքում Հակոբյանն իրենց մեղավոր չի ճանաչում եւ հրաժարվել է ցուցմունք տալ:

Զինված խմբի անդամ, 52-ամյա Արայիկ Հակոբյանն ամուսնացած է, ունի մեկ որդի, մեկ դուստր: Մեր հարցին, թե Արայիկը խմբի անդամներից ո՞ւմ է ճանաչել եւ արդյոք ընտանիքի անդամներին տեղյակ պահե՞լ է ՀՀ ոստիկանության ՊՊԾ գունդը գրավելու մտադրության մասին, նրա կինը՝ Արմինեն, պատասխանեց. «Ես իր հետ այդ մասին չեմ խոսել, ու նույնիսկ չգիտեմ, թե խմբի անդամներից ում է ճանաչել: Ես անձամբ նրանցից ոչ ոքի չեմ ճանաչում: Մենք այդ օրը (հուլիսի 17-ին) տեղյակ չենք եղել, թե ուր է գնում, տանը այդ մասին խոսակցություն չի եղել»,-ասաց Հակոբյանի կինը: Մեր հարցին, թե մինչ այս դեպքը ինչո՞վ է զբաղվել ամուսինը, Արմինեն ասաց, որ Արայիկ Հակոբյանը մանկավարժ է եղել, հետո զինվորական. «Տարիքայինով զորացրվել է, հետո աշխատանք չուներ: Մինչ դեպքն էլ տաքսի է վարել»,- եզրափակեց Հակոբյանի կինը:

Նշենք, որ ըստ ՀՀ Քրեական դատավարության օրենսգրքի՝ մեղադրյալի հարցաքննությունը 4 ժամից ավելի չի կարող տեւել, այնինչ Հակոբյանին քննիչը պահել է վեց ժամից ավելի: Քրեական դատավարության օրենսգրքով հստակ սահմանված են նաեւ այն բոլոր քննչական գործողությունները, որոնք քննիչն իրավունք ունի իրականացնել։ Իսկ մեղադրյալի հետ «զրույց» ունենալու մասին օրենսգիրքը չի սահմանում: Մնացած բոլոր գործողությունների համար սահմանված է, որ պետք է դրանք կատարվեն պաշտպանի մասնակցությամբ, ինչը քննիչը նույնպես խախտել է: