Հնարավոր է` Արամ Մանուկյանը դուրս գա եւ հորն ազատելու համար նոր հանցանք կատարի. քննիչ

«Սասնա ծռեր» խմբի անդամ Արամ Մանուկյանը կշարունակի մնալ կալանքի տակ: Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն այսօր մերժեց պաշտպանական կողմից ներկայացրած միջնորդությունը՝ Արամ Մանուկյանի նկատմամբ այլընտրանքային խափանման միջոց գրավը կիրրառելու վերաբերյալ:

Մինչ այդ դատարանի բակում էին հավաքվել Արամի հարազատները, ընկերները: Նրանք վանկարկում էին. «Ազատություն Արամին, ազատություն մեր գեղեկացկադեմ տղային»: Նրանք տեւական ժամանակ փորձում էին ճշտել՝ Արամը ներկայացվե՞լ է դատարան, թե՝ ոչ:

Նրա պաշտպան Ինեսսա Պետրոսյանը դատարանից դուրս գալիս լրագրողների հետ զրույցում ասաց, որ Արամ Մանուկյանը դատարան չի բերվել, քանի որ լուրջ առողջական խնդիրներ ունի: Նրա խոսքով՝ Արամ Մանուկյանը ծունկը դեռեւս չի կարողանում ծալել, հենակների վրա ընդամենը մի քանի քայլ է կարողանում քայլել: Մեր հարցին, թե գրավի միջնորդություն ներկայացնելիս պաշտպանական կողմ ի՞նչ փաստարկներ է ներկայացրել, Ինեսսա Պետրոսյանն ասաց, որ այն փաստական հանգամանքները, որ Արամ Մանուկյանը վատառողջ է, ենթարկվել է ծանր վիրահատությունների, շարժվում է հենակներով, ունի հատուկ խնամքի կարիք, ինչպես նաեւ նա բնութագրվում է դրական, 3-րդ կուրսի ուսանող է եւ զրկված է իր ուսումը շարունակելու հնարավորությունից։

Պետրոսյանը ընդգծեց, որ երաշխիք է նաեւ այն հանգամանքը, որ իր հայրը՝ Պավել Մանուկյանը, գտնվում է կալանքի տակ։ Դատական նիստի ընթացքում դատավորը կողմից հետաքրքրվել է, թե կողմի կարծիքով որպես գրավ ինչքան գումար պետք է սահմանվի եւ ով պետք է վճարի այդ գումարը։ Կողմը պատասխանել է, որ Արամ Մանուկյանի մայրը եւ քույրը պատրաստ են առնվազն 1 միլիոն դրամ վճարել։ Ինեսսա Պետրոսյանը նշեց, որ որպես առարկություն քննիչն ասել է, թե նրանք քաղաքական պահանջներ են ներկայացրել, այսինքն՝ Արամ Մանուկյանը կարող է շարունակել որոշակի գործողություններ։ Իսկ դատարանի այն դիտարկմանը, որ Պավլիկ Մանուկյանը եւս կալանքի տակ է գտնվում, քննիչը պատասխանել է, որ հնարավոր է Արամ Մանուկյանը դուրս գա եւ հորն ազատելու համար նոր հանցագործություն կատարի։ «Սա անհեթեթ եւ անհիմն փաստարկ էր: Քննիչը ընդունեց, որ ամեն դեպքում  իմ պաշտպանյալները իրենց քաղաքական հայացքների համար են պահվում: Մեր միջնորդությունը լիարժեք հիմնավոր էր, ավելի քան հիմնավոր էր եւ ընդհանրապես հիմք չկա մեր միջնորդությունը մերժելու համար: Սա քաղաքական ենթատեքստ ունեցեղ գործ է, պետք է սպասենք որոշմանը»,-ասաց Ինեսսա Պետրոսյանը։

Դատարանը մոտ 3 ժամ հեռացավ խորհրդակցական սենյակ եւ վերադառնալով՝ մերժեց պաշտպանական կողմի միջնորդությունը:

Որոշման հրապարակումից հետո Արամ Մանուկյանի մյուս պաշտպան Հարություն Բաղդասարյանը մեր հարցին ի պատասխան ասաց. «Դատարանը գտավ, որ Արամ Մանուկյանի կատարած գործողությունները հիմք են տալիս ողջամտորեն մտածել, որ գրավով ազատելը այս պահին հիմնավոր չէ, քանի որ թե՛ առաջին ատյանի դատարանը, թե՛ վերաքննիչ դատարանը գտել են, որ այն պայմանները, որոնցով որ կալանավորել են, դեռեւս մնացել են։ Այսինքն՝ դատարանը ողջամտորեն ենթադրում է, որ Արամ Մանուկյանը կարող է խուսափել կամ խոչընդոտել նախաքննությանը»: Մեր մյուս հարցին, թե ինչպե՞ս է գնահատում դատարանի այս որոշումը, Բաղդասարյանն ասաց, որ այս գործերով որոշումները միշտ գնահատում են որպես քաղաքական որոշումներ: Նրա կարծիքով՝ ստեղծված պայմաններում ոչ ոք չէր համարձակվի Արամ Մանուկյանի նման անձանց խափանման միջոցը փոխել։ «Այս պայմաններում որեւէ դատավոր չէր համարձակվի Արամ Մանուկյանի կամ նրա նման անձանց կալանավորումը փոխեր այլ խափանման միջոցով: Այս որոշման բողոքարկումը քննարկման առարկա է, որովհետեւ որքան ես եմ հասկանում, շատ շուտով կլինի նոր միջնորդություն Արամ Մանուկյանի կալանքը երկարացնելու վերաբերյալ եւ այս պարագայում բողոքարկումը դառնում է անիմաստ»,-ասաց նա:

Հարություն Բաղդասարյանը տեղեկացրեց, որ մինչ դատարան գալը «Դատապարտյալների հիվանդանոց» ՔԿՀ-ում տեսակցել է Արամ Մանուկյանին, որին դատական նիստը շատ քիչ է հետաքրքրել. «Նա արդեն պատկերացնում է, թե ինչ է տեղի ունենում դատարաններում»,-նշեց Բաղդասարյանը: Նա ասաց, որ բազմաթիվ փորձաքննություններ են նշանակվել, որոնց եզրակացությունները դեռ չկան: Մեր հարցին, թե մեղադրանքները փոփոխելու հետ կապված տեղեկություններ կա՞ն, դրանք կվերաորակվեն, թե՝ ոչ, Մանուկյանի պաշտպանն ասաց. «Նախաքննության մարմինն առայժմ նման հարց չի բարձրացրել եւ մեզ որեւէ մեղադրանքի փոփոխություն չի ներկայացրել»:

Հիշեցնենք, որ Արամ Մանուկյանին վիրահատել էին օգոստոսի 30-ին: Նրա ոտքը հատուկ մետաղային հարթակով ոսկրային բեկորների եւ կոտրվածքի ֆիքսման է ենթարկվել: Նրան մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից):