Հայաստանի ֆուտբոլի ազգային հավաքականը կգլխավորի Արթուր Պետրոսյանը

Հայաստանի ֆուտբոլի ազգային հավաքականն այսուհետ կգլխավորի հավաքականի նախկին հարձակվող Արթուր Պետրոսյանը: Այս մասին հայտնում է Հայաստանի ֆուտբոլի ֆեդերացիայի պաշտոնական կայքը: Պաշտոնական հաղորդագրության մեջ գրված է հետեւյալը.

«Լեգենդար ֆուտբոլիստ Արթուր Պետրոսյանը կգլխավորի Հայաստանի ազգային հավաքականը: Հայաստանի ֆուտբոլի ֆեդերացիան ավարտել է բանակցությունները Հայաստանի ազգային հավաքականի գլխավոր մարզչի նշանակման հետ կապված, եւ ս.թ. նոյեմբերի 1-ից Հայաստանի ազգային հավաքականի նախկին ֆուտբոլիստ, ներկայումս շվեյցարական «Ցյուրիխ-2» թիմի գլխավոր մարզիչ Արթուր Պետրոսյանի հետ կկնքվի համապատասխան պայմանագիր»:

45-ամյա մասնագետը Հայաստանի հավաքականում հանդես է եկել 1992-2005 թթ.: Մասնակցել է 70 խաղի եւ դարձել 11 գոլի հեղինակ: 1989-1998 թթ. հանդես է եկել «Շիրակում», 276 խաղում խփել է 114 գոլ: «Մակքաբի Պետահ Տիկվայի» (1998 - 1999) կազմում խաղադաշտ է դուրս եկել 14 անգամ, սակայն գոլով աչքի չի ընկել: Գոլեր չի հեղինակել նաեւ «Լոկոմոտիվ Նիժնի Նովգորոդում» (1999) անցկացրած 6 խաղում: 1999 թ. վերադարձել է «Շիրակ», մինչեւ 1999-2000 մրցաշրջանի ավարտը մասնակցել է 48 խաղի եւ խփել 28 գոլ: 2000-2003 թթ. անցկացրել է «Յանգ Բոյզ Բեռնում» (70 խաղ, 15 գոլ), իսկ 2003-2006 թթ.՝ «Ցյուրիխում» (45 խաղ, 15 գոլ):   

Արթուր Պետրոսյանը Հայաստանի ազգային հավաքականի բոլոր ժամանակների երկրորդ լավագույն ռմբարկուն է (1-ինը «Մանչեստեր Յունայթեդի» կիսապաշտպան Հենրիխ Մխիթարյանն է 19 գոլով): Նա Հայաստանի քառակի չեմպիոն է (1992, 1994, 1995, 1999),  երկակի սուպերգավաթակիր (1996, 1999), Շվեյցարիայի գավաթակիր (2005), Շվեյցարիայի չեմպիոն (2005-2006):

Արթուր Պետրոսյանը Հայաստանի լավագույն ֆուտբոլիստ է ճանաչվել 1996, 2000 թթ., Հայաստանի առաջնության լավագույն ռմբարկու՝ 1997 թվականին:

Մարզչական գործունեությունը սկսել է 2006 թ.՝ գլխավորելով «Ցյուրիխի» Մ-14, 15, 16, 18 թիմերը: 2011 թ. «Ցյուրիխի» Մ-18 թիմի հետ Արթուր Պետրոսյանը դարձել է Շվեյցարիայի չեմպիոն: 2014-2015 թթ. եղել է Հայաստանի ազգային հավաքականի գլխավոր մարզիչ Բեռնար Շալանդի օգնականը: 2016 թ. ստացել է մարզչական ՊՐՈ արտոնագիր:

^{Արթուր Պետրոսյանը խլում է գնդակը Դիեգո Մարադոնայից և խփում պատասխան գնդակը, 1996 թ., Հայաստանի ազգային հավաքական-«Բոկա Խունիորս» ընկերական հանդիպում (1:1)}

Հայաստանի հավաքականի գլխավոր մարզիչի պաշտոնում Արթուր Պետրոսյանը փոխարինել է Վարուժան Սուքիասյանին, որը հրաժարական տվեց աշխարհի 2018 թ. առաջնության ընտրական փուլի մեկնարկը տապալելուց հետո: Նրա գլխավորությամբ թիմը պարտվեց Դանիայի (1:0), Ռումինիայի (0:5) եւ Լեհաստանի (2:1) հավաքականներին: Սուքիասյանը հրաժարական տվեց Լեհաստանի դեմ արտագնա հանդիպումից հետո:

Լրատվամիջոցները նրան փոխարինելու հավանական թեկնածուների շարքում նշում էին Հայաստանի գործող չեմպիոն «Ալաշկերտի» գլխավոր մարզիչ Աբրահամ Խաշմանյանի անունը, որը նախկինում գլխավորել է Հայաստանի երիտասարդական հավաքականը: Նշվում էր, որ այդ պաշտոնը կարող է ստանձնել նաեւ վերջին տարիներին կայուն եւ լավ խաղ ցուցադրող «Շիրակի» գլխավոր մարզիչ Վարդան Բիչախչյանը:

2016 թ. ընթացքում Հայաստանի հավաքականը եւս մեկ հանդիպում է անցկացնելու աշխարհի առաջնության ընտրական փուլի շրջանակներում: Նոյեմբերի 11-ին թիմը Վազգեն Սարգսյանի անվան «Հանրապետական» մարզադաշտում հյուրընկալելու է Չեռնոգորիային: Հանդիպումը սկսվելու է ժամը 21:00-ին: