«Ազգային արժանապատվության հարց է». Բակո Սահակյանը հանձնարարել է վերականգնել ավերված Թալիշը

Armtimes.com-ն օրերս տեղեկացրել էր, որ թալիշեցի շուրջ 10 տղամարդիկ, որոնք ապրիլյան պատերազմից հետո ընտանիքների հետ լքել էին գյուղը, վերադարձել են եւ փորձում են վերականգնել գյուղի ջրամատակարարման համակարգը:

Արցախի հանրային հեռուստաընկերությունից տեղեկանում ենք, որ նախօրեին մի քանի նախարարների հետ Թալիշ է այցելել ԼՂՀ նախագահ Բակո Սահակյանը: Տեղում անցկացված աշխատանքային խորհրդակցության ընթացքում Սահակյանը նշել է, որ անհրաժեշտ է բոլոր ուժերն ու միջոցները ներդնել՝ գյուղը վերականգնելու համար։

Էկոնոմիկայի նախարարը զեկուցել է, որ ամբողջությամբ վերականգնվել է գյուղի էլեկտրաֆիկացումը, առաջիկա օրերին կվերականգնվի նաեւ ջրամատակարարման ցանցը:

Քաղաքաշինության նախարար Կարեն Շահրամանյանն էլ վստահեցրել է, որ առաջիկա ամիսներին Թալիշում մի քանի ուղղություններով կծավալվեն շինարարական մեծ աշխատանքներ: Նախ, կիրականացվի գյուղ տանող ճանապարհի վերականգնում, ապա՝ կկառուցվի մանկապարտեզ, հանդիսությունների տուն...գալիք տարվա սեպտեմբերի 1-ից նախատեսվում է շահագործման հանձնել դպրոցը. այն նախատեսվում է տեղակայել նախկին գյուղապետարանի շենքում:

«Պետք է ազատվենք գյուղում առկա ավերակներից եւ վերակառուցենք բոլոր բնակելի տներն ու ներհամայնքային ճանապարհները»,- Թալիշում հայտարարել է ԼՂՀ քաղաքաշինության նախարարը եւ հավելել, որ հարկ եղած դեպքում ոչ թե կվերանորոգեն հինը, այլ կկառուցեն նոր բնակելի տներ՝ բոլոր հարմարություններով։

արժանապատվության հարց է

Ինչպես հայտնի է՝ ապրիլյան պատերազմի ժամանակ Թալիշը թիրախային կետերից մեկն էր եւ ամենաշատ վնասը կրեց թե մարդկային, թե նյութական իմաստով: Շատերը նշում էին, որ մինչեւ ապրիլյան պատերազմի ընթացքում կորսված դիրքերը հետ չգրավվեն՝ այնտեղ ապրելը անհնար կլինի, որովհետեւ այս պայմաններում այն ամբողջությամբ թշնամու թիրախի տակ է: ԼՂՀ նախագահի մամուլի խոսնակ Դավիթ Բաբայանն ասում է, որ այս բոլոր աշխատանքներից առաջ լուծվելու է անվտանգության խնդիրը:

- Ինչպես բազմիցս հայտարարել ենք, պետք է ամեն ինչ արվի, որ այդ ավերված բնակավայրերը վերականգնվեն եւ այնուհետեւ վերադառնանք բանակցությունների միջոցով խնդրի կարգավորման: Այս համատեքստում լուրջ ծրագրեր են իրականացվում Թալիշ գյուղը վերականգնելու, այնտեղ համապատասխան ենթակառուցվածքները վերակենդանացնելու ուղղությամբ, որպեսզի բնակչությունը վերադառնա իրենց տները: Առաջնային է անվտանգության ոլորտը, որ մեր քաղաքացիների անվտանգությունը ապահովված լինի: Իսկ մեր անվտանգության թիվ 1 երաշխիքը մեր զինվորներն են, մեր բանակն է: Անվտանգության ապահովումից հետո պետք է անցնել սոցիալական, առողջապահական, գյուղատնտեսության, առեւտրի եւ մի շարք այլ ոլորտներում կարեւոր ծրագրերի իրականացմանը, որ գյուղը լրիվ վերակենդանանա եւ աստիճանաբար զարգանա:

- Ի՞նչ միջոցներով են իրականացվելու այս աշխատանքները եւ որքա՞ն գումար է անհրաժեշտ:

- Հստակ հաշվարկներ դեռ չկան: Օգտագործվելու են տարբեր միջոցներ: Առաջին հերթին, իհարկե, բյուջեից կլինեն հատկացումներ, բայց կան նաեւ այլ միջոցներ. դուք գիտեք, որ «Հայաստան» համահայկական հիմնադրամն է վերջին հեռուստամարաթոնի արդյունքում հավաքված գումարներից տրամադրելու ավերված բնակավայրերի վերականգնման համար: Այսինքն՝ Թալիշի վերականգնմանը մասնակցություն է ունենալու ողջ հայությունը:

- Պարոն Բաբայան, դեռ վերջերս խոսվում էր, որ մի շարք դիրքերի գրավումից հետո Թալիշում եւ պատերազմից տուժած մյուս բնակավայրերում ապրելը վտանգավոր է: Հաշվի առնելով, որ լայն թափով այսպիսի աշխատանքներ են իրականացվում, կարելի՞ է ասել, որ այդ վտանգը վերացել է:

- Եթե այդ ձեւով մոտենանք, ամեն մի բնակավայր էլ վտանգ է ներկայացնում: Եթե վաղը լայնածավալ պատերազմ տեղի ունենա՝ ամենաառաջին թիրախը լինելու է մայրաքաղաք Ստեփանակերտը, բնական է: Բայց դա չի նշանակում, որ մենք չպետք է զարգացնենք մեր գյուղերն ու քաղաքները: Այսինքն՝ պատերազմը պատերազմ, հավանականությունը՝ հավանականություն, բայց պետք է զարգանա երկիրը: Սա ի վերջո նաեւ ազգային արժանապատվության, պետական արժանապատվության խնդիր է:

- Նկատի ունեմ՝ եթե այնտեղ դպրոց կառուցվի եւ, Աստված մի արասցե, վաղը նորից վտանգ լինի, որքանո՞վ է նպատակահարմար այդքան միջոցների ծախսումը:

- Դրա համար ես ասում եմ, որ առաջին հերթին ուշադրություն են դարձվելու անվտանգության հարցերին: Եթե այդ տրամաբանությամբ մոտենանք, Երեւանում էլ չպետք է որեւէ բան կառուցվի, զարգանա, ստեղծվի, որովհետեւ կարող է լինել պատերազմ եւ Երեւանն էլ կարող է թիրախավորվել: Հակառակը՝ պետք է ապրենք, արարենք, եւս մեկ անգամ ապացուցենք, որ նույնիսկ այս պայմաններում կարող ենք զարգանալ, գոյատեւել, արարել, բարգավաճել:

- Միգուցե սահմանի փոփոխությո՞ւն է տեղի ունեցել:

- Որպեսզի փոփոխություն տեղի ունենա սահմանում՝ պետք է նախ փոփոխություն տեղի ունենա մեր հոգիներում, ուղեղներում: