«Սասնա ծռեր» հիմնադրամի անունը ֆեյսբուքում փոխվել է. հիմնադրամի շուրջ մթնոլորտը դեռ թեժ է

Բավական երկար ժամանակ հնչող մեղադրանքներից եւ կոչերից հետո «Սասնա ծռեր» հիմնադրամի անունը ֆեյսբուք սոցցանցում փոխվել է. Ֆելիքս Հայրապետյանի կողմից հիմնադրված հիմնադրամը գործում է «Քաղաքական բանտարկյալների աջակցության հիմնադրամ» անվանումով:

«Սասնա ծռեր» հիմնադրամում վերջին շրջանում ստեղծված մթնոլորտից հետո անվանումը փոխելու կոչով հիմնադրամի հոգաբարձուների խորհրդին դիմել էին «Սասնա ծռեր» խմբի անդամներից Մխիթար Ավետիսյանը, Պավել Մանուկյանը եւ Վարուժան Ավետիսյանը՝ բանտից տարածած նամակ-հայտարարությամբ:

Մեր հարցին, թե արդյո՞ք հիմնադրամի անունը փոխվել է նաեւ փաստաթղթերում, թե՞ միայն ֆեյսբուքում, հիմնադրամի հիմնադիր Ֆելիքս Հայրապետյանն ասաց. «Հիմնադրամի անունը փոխելու մասին հասարակությունը տեղյակ կպահվի։ Ֆեյսբուքում փոփոխությունը՝ սկսված փոփոխությունների սկիզբն է։ Դա մեկ օրում կամ մեկ շաբաթում արվող գործ չի»։

Հիշեցնենք, տարածված հայտարարությամբ նշված անձինք ընդգծում էին, որ հիմնադրամի հոգաբարձուների խորհրդի որոշ անդամներ քաղաքական չեզոքություն չեն պահպանում եւ կատարում են «Սասնա ծռեր» խմբավորման ապստամբական-ազատագրական գաղափարը եւ գործողությունները մերժող քայլեր, ինչը հիմք է տալիս եզրակացնելու, որ հիմնադրամի նման գործունեությունն այլևս ոչ միայն նպատակահարմար չէ, այլև վնասակար է ազատագրական պայքարի համար:

Ի պատասխան «Սասնա ծռեր» հիմնադրամը երեկ հայտարարությամբ հանդես եկավ՝ նշելով, որ «հիմնադրման պահին առավել համահունչ էր հիմնադրամն անվանել «Սասնա Ծռեր» անունով, քանի որ հենց «Սասնա Ծռեր» խմբի ընդվզումից ու դրան հաջորդած ձերբակալություններից էր ոգեշնչված հիմնադրամը ստեղծելու գաղափարը»:

«...վերջին օրերին «Սասնա Ծռեր» խմբի անդամների և նրանց ընտանիքների անունից տարածվել են իրար հաջորդող հայտարարություններ, որոնցով, փաստացի, հրաժարվում են հիմնադրամի ծառայություններից: Անգամ առաջարկվում է փոխել հիմնադրամի անունը: Տեղեկացնում ենք, որ հիմնադրամի անվան փոփոխման հարցը արդեն իսկ մտցված է վերակազմավորման գործընթացի օրակարգ»,- ասվում էր «Սասնա ծռեր» հիմնադրամի հոգաբարձուների խորհրդի հայտարարությունում:

Հիշեցնենք, որ «Սասնա ծռեր» հիմնադրամում լարվածությունը սկսվել էր վաղուց: Ըստ որոշ տեղեկությունների՝ հիմնադրամի որոշ անդամներ, որոնք հիմնականում Ֆելիքս Հայրապետյանի ընտանիքից են, ծաղրական ու թունոտ գրառումներով են հանդես եկել Ծռերի եւ նրանց գաղափարակից ընկերների մասին:

Սրան հաջորդեց «Սասնա ծռեր» խմբի անդամներ Արեգ եւ Սերգեյ Կյուրեղյանների հոր՝ Արմենակ Կյուրեղյանի եւ Հիմնադիր խորհրդարանի անդամ Ժիրայր Սեֆիլյանի կնոջ՝ Նանոր Սեֆիլյանի հեռանալը հոգաբարձուների խորհրդից:

Նանոր Սեֆիլյանը հայտարարեց, թե չի կարող աշխատել Սասնա Ծռեր հիմնադրամում, որտեղ թափանցելիությունը լրիվ ապահովված չէ բոլոր անդամների համար: Նա ընդգծում էր, որ հատկապես նկատի ունի Շվեյցարիայում բացված PayPall հաշվեհամարը: 

Հավանաբար այս հաշվեհամարի հետ կապված խնդիրներ էր տեսել նաեւ Արմենակ Կյուրեղյանը: Հոգաբարձուների խորհրդից իր հեռանալուց հետո Արմենակ Կյուրեղյանը պարբերաբար դիմում է հոգաբարձուների խորհրդին՝ խնդրելով իրեն տրամադրել պայմանագիրը, որը կապված է Շվեյցարիայում բացված հաշվի հետ եւ բանկային քաղվածքը այդ հաշվի մուտքերի եւ ելքերի վերաբերյալ:

«Մինչև այժմ ես պատասխան չեմ ստացել: Սա կարևոր է իմ՝ հիմնադրամի հոգեբարձուների խորհրդի նախագահ եղած ժամանակահատվածի համար հիմնադրամի գործունեության ամբողջական պատկերը ունենալու համար: Խնդրում եմ բոլորին սա չքաղաքականացնել եւ հատկապես չմղել անձնական դաշտ: Սա իմ պարտականությունն է և զուտ աշխատանքային գործընթաց է»,- հիմնադրամի էջում հոգաբարձուներին երեկ դիմել է Արմենակ Կյուրեղյանը: Նրա հարցերին պատասխանելու փոխարեն, սակայն հոգաբարձուների խորհրդի անդամներից Արուսյակ Հայրապետյանը, որ Ֆելիքս Հայրապետյանի դուստրն է, հիմնադրամի խմբում Արմենակ Կյուրեղյանին պատասխանել է, որ զավեշտալի է նրա հայտարարությունը:

Իսկ Հայրապետյանի կինը՝ Ժաննա Գասպարյանը կասկած է հայտնել, որ Կյուրեղյանի այս պահանջի ետեւում ուրիշ, նենգ մարդու ականջներ են։

«Վերջացել են, ստուգվել են կասկածները: Տես քանի մարդու է շարունակ վիրավորում։ Ամիսներով լավ հարաբերությունները ոտնատակ տալու համար ինքդ ինչ աստիճանի պրոբլեմատիկ պիտի լինես կամ հզոր հրահրող ունենաս։ Ծայր աստիճան ազնիվ մարդկանց հետ գործ ունեք, հետաքրքիր է, ինչու ընկալելի չէ»,- գրել է Գասպարյանը՝ այդպես էլ չպատասխանելով Կյուրեղյանի հարցադրմանը:

Հ.Գ. Ֆելիքս Հայրապետյանը մեզ տեղեկացրեց, որ առաջիկայում կատարվելու է միայն Լոս Անջելեսյան դրամահավաքի բաշխումը Հիմնադրամի ցուցակներում եղած անձանց։ Հիշեցնենք, որ լոս Անջելեսում վերջերս դրամահավաք անցկացվեց: