Սամվել Կարապետյանը պատասխանել է նաիրիտցիներին. «Նաիրիտի» սնանկության գործընթացը չի կասեցվի

Այս ամսվա սկզբին «Նաիրիտ» գործարանի աշխատակիցները բաց նամակով դիմել էին ՀԷՑ» ղեկավարությանը՝ խնդրելով կասեցնել «Նաիրիտի» սնանկության գործընթացը՝ մինչեւ գործարանի ներդրողների մրցույթի արդյունքների հրապարակումը եւ պոտենցիալ ներդրողի հետ բանակցությունների ավարտը: 

Նաիրիտցիները նամակը գրել էին այն ժամանակ, երբ ՀԷՑ-ի հայցի հիման վրա Շենգավիթ վարչական շրջանի ընդհանուր իրավասության դատարանը գործարանը սնանկ էր ճանաչել: ՀԷՑ սեփականատերը հանդիսացող «Տաշիր» ընկերությունների խմբի ղեկավար Սամվել Կարապետյանին ուղղված նամակով գործարանի աշխատակիցներն իրենց մտավախությունն էին արտահայտել, որ «Նաիրիտի» սնանկ ճանաչվելուց հետո գործարարները չեն ցանկանա ներդրումներ անել եւ վերագործարկել այն:

«Հակառակ դեպքում, վստահ ենք, ձեւավորվելու է կարծիք, ըստ որի՝ Ձեր անմիջական մասնակցությամբ եւ պատճառով է արդյունաբերական նախկին հսկան կորցրել իր հնարավորությունը՝ վերականգնելու իր երբեմնի համբավը։ Արդեն հնչում են մեկնաբանություններ, որ Ձեզ օգտագործում են` Նաիրիտի հանցավոր թալանն իրագործողներին կոծկելու համար: Եվ կամ Դուք կատարում եք օտար պետության պատվերը` Հայաստանի տնտեսական թուլացմամբ` այն ավելի վերահսկելի եւ կախյալ դարձնելու:

Դուք կանգնած եք դժվարին ընտրության առջեւ. մի կողմում գործարանի, նաեւ երկրի թալանն իրականացրած մի քանի կարկառուն պաշտոնատար անձինք են, մյուս կողմում` հազարավոր նաիրիտցիները, որոնց համար Նաիրիտը եւ՛ հարազատ տուն է, եւ՛ աշխատելու ու երկիրը շենացնելու հնարավորություն: Ապացուցեք, որ Ձեզ համար երկրի շահն է առաջնային, որ Դուք իսկապես մտահոգ եք երկրի տնտեսական առողջացմամբ, բարի կամք ցուցաբերեք եւ Նաիրիտի սնանկության վճիռը ժամանակավորապես կասեցրեք, որով հնարավոր կլինի հայտարարված մրցույթը հասցնել իր տրամաբանական ավարտին։ Ակնկալում ենք, որ որպես հայրենասեր հայորդի՝ թույլ կտաք, որ «Նաիրիտ» գործարանի վերագործարկումը դառնա անկյունաքար Հայաստանի տնտեսության զարգացման համար»,- մասնավորապես, ասվում էր «Նաիրիտ»-ի համակարգող խմբի բաց նամակում:

Նաիրիտցիներին ուղղված իր պատասխանում ՀԷՑ-ի սեփականատերը հանդիսացող «Տաշիր» ընկերությունների ցանցի բաժնետեր Սամվել Կարապետյանը ոչինչ չի նշել այն մասին, որ կասեցնում է «Նաիրիտի» սնանկության գործընթացը: Ընդգծել է, որ «Նաիրիտ» ՓԲ ընկերության կողմից տարիներ շարունակ էլեկտրաէներգիայի դիմաց վճարումների չկատարման արդյունքում ձեւավորվել է խոշոր պարտք, ուստի «Հայաստանի էլեկտրական ցանցեր» ընկերությունն իր շահերի պաշտպանության նպատակով 2015 թվականի ապրիլի 7-ին (մինչեւ «Տաշիր» ընկերությունների ցանցի կողմից «ՀԷՑ-ի ձեռքբերումը) դիմել է դատարան՝ «Նաիրիտ գործարանը» սնանկ ճանաչելու պահանջով:

«Գործող օրենսդրությամբ սնանկության գործընթացը կարող է զարգանալ տարբեր ուղղություններով: Ուղղություններից մեկը, օրինակ, սնանկության գործով կառավարչի կողմից իրականացվող հնարավոր առողջացման ծրագիրն է, որի ընթացքում կարող են իրականացվել մի շարք միջոցառումներ (այդ թվում նաեւ ձեր կողմից նշված մրցույթի անցկացումը՝ ուղղված «Նաիրիտ գործարանի» արտադրողական ենթակառուցվածքների վերագործարկման նպատակով մասնավոր գործընկեր ներգրավելուն): Դրանք ՀԷՑ-ի գործառույթների շրջանակից դուրս են: 

Անկախ հետագա զարգացումներից, համապատասխան մարմինների կողմից ընդունվող որոշումներից՝ հավաստիացնում եմ, որ «Տաշիր» ընկերությունների խումբը որեւէ կերպ չի խոչընդոտի «Նաիրիտ գործարանի» հնարավոր առողջացմանը կամ խնդրի այլ, որեւէ առումով դրական հանգուցալուծմանը»,-եզրափակում է Կարապետյանը:

«Նաիրիտի» համակարգող խմբի անդամներից Կարինե Շահվերդյանը մեզ հետ զրույցում հակադարձեց Կարապետյանին. «Ասում է՝ հնարավոր է առողջացման տարբերակ։ Այնինչ, սնանկության կառավարիչը հավաքել էր աշխատողներին եւ ասել, որ չգիտեմ դա երբ կլինի, աշխատավարձ կարող եմ տալ միայն այն ժամանակ, երբ ինչ որ բան կվաճառենք։ Իսկ մեր անհանգստությունը նրանում է, որ հնարավոր է ոչ պետքական ապրանքների հետ վաճառվեն նաեւ այնպիսի տարածքներ կամ շեն-շինություններ, որոնք հետագայում կխանգարեն վերագործարկմանը։ Նրա դերն այլեւս այդտեղ չի լինելու։ Դա իր վրա է վերցրել կառավարիչը։ Իսկ Կարապետյանի կողմից սա ընդամենը ենթադրություն կարող է լինել։ Չէ՞ որ ինքը չի վերահսկում»,- ընդգծեց նաիրիտցին: