Սիմոնյանին գործի դնելու համար ազատել են «Արփի լիճ» ՊՈԱԿ-ի տնօրենին, վեջինս բողոքարկելու է

Armtimes.com-ին տեղեկություններ էին հասել, որ Շիրակի նախկին մարզպետ Հովսեփ Սիմոնյանին Արփի լճի ազգային պարկ ՊՈԱԿ-ի տնօրենի ժամանակավոր պաշտոնակատար նշանակելու համար, առանց պատճառի աշխատանքից ազատել են տնօրեն Արա Պետրոսյանին: Այս տեղեկությունը armtimes.com-ի հետ զրույցում հաստատեց նաեւ ինքը` Արա Պետրոսյանը:

Armtimes.com-ը երեկ ՀՅԴ Բյուրոյի էլիտային մոտ կանգնած իր աղբյուրներից տեղեկություն էր ստացել, որ Դաշնակցությունը Շիրակի նախկին մարզպետին նոր պաշտոն է տվել:

Այսօր՝ հունիսի 27-ին,  Արփի լճի ազգային պարկ ՊՈԱԿ-ի տնօրենի ժ/պ Հովսեփ Սիմոնյանին աշխատակազմին ներկայացնելու համար անձամբ Աշոցք է ժամանելու բնապահպանության նախարար Արծվիկ Մինասյանը:

Ստորեւ ներկայացնում ենք Արփի լճի ազգային պարկ ՊՈԱԿ-ի արդեն նախկին տնօրեն Արա Պետրոսյանի հետ մեր հարցազրույցը:

- Պարոն Պետրոսյան, այսինքն՝ հենց այնպե՞ս հայտարարեցին, որ Դուք ազատված եք տնօրենի պաշտոնից: Ճի՞շտ եմ հասկանում:

-Այո: Մոտավորապես, այդպես: Բնապահպանության նախարարության աշխատակազմի ղեկավարի մի քանի ժամանոց այցից հետո, իմ երեք ու կես տարվա աշխատանքը բնութագրվել է բացասական: Նրա կողմից համապատասխան զեկուցագիր է գրվել: Բնականաբար, ես իմ բացատրություններն եմ գրել աշխատակազմի ղեկավարի զեկուցագրերի վերաբերյալ, որը հաշվի չի առնվել: Ես զեկուցագրում գրված յուրաքանչյուր բան հիմնավորել եմ իմ բացատրագրով, որ սա այսպես չէ, այնպես է: Իրական պատկերը ներկայացրել եմ, բայց փաստացի հաշվի չառան եւ ազատեցին աշխատանքից:

- Ի՞նչ խնդիր էին արձանագրել, որ զեկուցագրեր կազմեցին:

- Հիմնարկին պատկանող շենք-շինությունները, որոնք մեր հաշվեկշռում ընդհանրապես չեն եղել՝ Արփի լճի ազգային պարկի ստեղծման օրվանից առ այսօր, իբր անարդյունավետ եմ օգտագործում: Մեղվապահական ասոցիացիայի շենքը, որը Արփի համայնքի սեփականությունն է վերագրում են պարկին: Սեպասարի զբոսաշրջային կենտրոնը, որը ստեղծվել է  Արփի լճի ազգային պարկի ծրագրի շրջանակներում եւ հանձնվել է Սեպասար համայնքին, իբր էլի իմ ենթակայության տակ է եւ անարդյունավետ է օգտագործվում, իբր անգլերեն գիտեցող մասնագետ չունեմ, բայց ես երեք տարի շարունակ տուրիստներ եմ ընդունել ու ճանապարհ դրել: Դրանց համապատասխան լուսանկարները եւ փաստաթղթերը կան:

Նշել են, որ միջազգային կառույցների հետ համագործակցությունը շատ վատ է, դոնոր կազմակերպությունները դժգոհ են, բայց իմ ձեռքի տակ եւ նախարարությունում կան Գերմանիայի զարգացման բանկի առաքելության փաստաթղթերը՝ 40 էջ, որտեղ հստակ գրված է գոհունակություն, շնորհակալություն մեր աշխատանքի վերաբերյալ:

- Այսինքն՝ այս երեք տարիների ընթացքում ոչ մի խնդիր չեն տեսե՞լ…

- Ընդհակառակն, այս տարիների ընթացքում միայն շնորհակալագրերի ենք արժանացել՝ Գյումրու դպրոցներից, ռուս սահմանապահ զորքերից, մի շարք ՀԿ-ներից: Այս ամենին զուգահեռ շատ անհասկանալի ձեւով ազատում են, դե կուսակցական խնդիրներ կան…Այս մի ամսվա մեջ փորձեցին ինձանից ձերբազատվել:

- Դուք շուտ գիտեի՞ք, որ ազատվելու եք, թե՞ երեկ իմացաք:

- Ես դա իմացել եմ անցած հինգշաբթի երեկոյան, որ հունիսի 23-ից այլեւս այս պաշտոնը չեմ զբաղեցնում, պայմանագիրը լուծարված է:

- Լրացե՞լ էր պայմանագրի ժամկետը:

- Ոչ պայմանագիրը հինգ տարի ժամանակով էր: Լրանալու էր 2019 թվականի մարտին:

- Դուք կուսակցական ե՞ք:

- Ոչ, ես անկուսակցական եմ: Տվյալ պարագայում էլ՝ դաշնակցական չեմ:

- Պարոն Պետրոսյան, Ձեր հաջորդ քայլը ո՞րն է լինելու: Վեց ամիս անց տնօրենի մրցույթ է լինելու: Մասնակցելու՞ եք:

- Ես պարտադիր բողոքարկելու եմ նախարարի այս որոշումը: Ես Սիմոնյան Հովսեփի անձի հետ կապված ոչ մի խնդիր չունեմ, չեմ էլ ունեցել, երբ նա մարզպետ էր:

Այս թեմայի շուրջ armtimes.com-ը պարզաբանում է ստացել նաեւ բնապահպանության նախարարությունից: