Մենք ունենք շատ լուրջ անհանդուրժողականություն.Դավիթ Հարությունյանը՝ քաղհասարակության մասին

«Մենք շատ լավ հասկանում ենք, որ կառավարությունն է ողջ քաղաքականության համար պատասխանատու, նաեւ իրագործման պատասխանատու, սակայն, երբ մենք խոսում ենք պատասխանատվության մասին, մենք պետք է հստակ գիտակցենք, որ պատասխանատվությունն ամենեւին չի նշանակում մեկուսացում: Կառավարման համակարգի արդյունավետությունը կարող է բարձրանալ միայն այն դեպքում, երբ հասարակությունը կառուցված է ակտիվ քաղաքացիների վրա»,- այս մասին «Էրեբունի պլազա» բիզնես կենտրոնում կազմակերպված «Կառուցողական երկխոսության հանձնառություն» ծրագրի պաշտոնական մեկնարկի ժամանակ ասաց ՀՀ արդարադատության նախարար Դավիթ Հարությունյանը՝ նշելով, որ Հայաստանի հիմնական ռեսուրսը արժանապատիվ, կարող մարդն է, եւ քաղաքացիական հասարակության հետ համատեղ աշխատանքը պետք է տա իր արդյունքները:

Նախարարի խոսքով՝ «Կառուցողական երկխոսության հանձնառություն» ծրագիրը հետաքրքիր է նրանով, որ զարգացվելու են քաղաքացիական հասարակության կազմակերպությունների կարողությունները մի քանի առումով:

«Առաջին հերթին նաեւ կարողությունները, երբ խոսքը չի վերաբերվում զուտ դժգոհությանը, խոսքը վերաբերվում է փաստերի հիման վրա քաղաքականություն մշակելուն եւ հասարակական վերահսկողություն իրականացնելուն: Սա հեշտ կարողություն չէ: Շատ ավելի հեշտ է քննադատելը, քան մասնակցելը քաղաքականության մշակմանը»,- ասաց Դավիթ Հարությունյան ու նշեց երկրորդ խնդիրը քաղհասարակություն-կառավարության համագործակցության ոլորտում:

«Երբ մենք սկսեցինք արդյունահանող ճյուղերի թափանցիկության նախաձեռնությունը, առաջին աշխատանքը սկսվեց նրանից, որ մենք փորձեցինք երկխոսել, երեք տարբեր խմբեր՝ գործադիր իշխանություն, քաղհասարակություն, բիզնես: Առաջին մեր տպավորությունն այն է, որ մեր մեջ  շփման այնքան անհարթություններ կան, որ ամենամեծ խնդիրը լինելու է դա, բայց ժամանակը ցույց տվեց, որ շատ հաճախ յուրաքանչյուր խմբի ներսում անհարթությունները ոչ պակաս էին»,- ասաց արդարադատության նախարարը՝ ընդգծելով, որ ամենամեծ անհարթությունը միասին աշխատելու ուղղությամբ սովորելն է:

Դավիթ Հարությունյանի կարծիքով՝ միմյանց հետ աշխատելը չի ստացվում, քանի որ կա նաեւ ազգային հատկանիշ: «Մենք ունենք շատ լուրջ անհանդուրժողականություն: Մենք աշխարհը շատ հաճախ տեսնում ենք միայն սեւ եւ սպիտակ գույներով: Ես կարծում եմ՝ ծրագիրը հնարավորություն կընձեռի, որ մենք տեսնենք նաեւ այն գույների վարիացիան, որ սեւի եւ սպիտակի արանքում է»,- ընդգծեց նախարարը:

Կառուցողական երկխոսության հանձնառություն» ծրագիրն իրականացվում է «Իրավաբանների հայկական ասոցիացիա» ՀԿ-ի կողմից գործընկերներ «Ագորա Սենթրլ Յուրոփ» ՀԿ-ի (Չեխիա), «Ժողովրդավարական կրթության հայկական կենտրոն-ՍԻՎԻՏԱՍ» ՀԿ-ի, «Մարդկային զարգացման միջազգային կենտրոն» ՀԿ-ի, «ՓՄՁ Համագործակցության Ասոցիացիա» ՀԿ-ի և Հայաստանի համայնքների միության հետ համագործակցությամբ: Ծրագրի հիմնական նպատակն է մեծացնել քաղաքացիական հասարակության կազմակերպությունների (ՔՀԿ) ազդեցությունը հանրային քաղաքականության մշակման գործընթացում, ինչպես նաև ուժեղացնել Հայաստանում քաղաքացիական հասարակության կազմակերպությունների ներուժը՝ ոլորտային կոալիցիաներ կազմելու, կենտրոնական և տեղական իշխանությունների հետ համագործակցությունը զարգացման համար: Ծրագիրը ունի դրամաշնորհային բաղադրիչ, որի շրջանակներում ենթադրամաշնորհներ կտրամադրվեն քաղաքացիական հասարակության կազմակերպություններին և քաղաքացիական հասարակության կազմակերպությունների կոալիցիաներին: Ծրագրի թիրախային ոլորտները 9-ն են, այդ թվում՝ արդարադատությունը, կրթությունը, բիզնեսը: