Արգիշտի Կիվիրյանի հայցը բավարարելու վճռի դեմ ոստիկանության բողոքը կքննվի երկու տարի հետո

Արգիշտի Կիվիրյանի հակընդդեմ հայցը բավարարելու Վարչական դատարանի վճռի դեմ ՀՀ ոստիկանությունը վերաքննիչ բողոք է ներկայացրել:

Դատարանը, սակայն որոշել է ոստիկանության բողոքը քննել երկու տարի հետո՝ 2019 թվականի մայիսի 29-ին:

Հիշեցնենք, որ ՀՀ վարչական դատարանը` դատավոր Ալեքսանդրա Հարությունյանի նախագահությամբ, մայիսի 15-ին մերժել էր ռուս զինծառայող Վալերի Պերմյակովին Հայաստանի իրավազորությանը հանձնելու հարցով անցկացված երթի առնչությամբ ոստիկանության հայցը, իսկ Արգիշտի Կիվիրյանի հակընդդեմ հայցը՝ բավարարել: 

Ոստիկանությունը ՀՀ վարչական դատարան հայց էր ներկայացրել պահանջելով ոստիկանության ծառայողի օրինական պահանջը չկատարելու համար Վարչական իրավախախտումների վերաբերյալ ՀՀ օրենսգրքի 182-րդ հոդվածի հատկանիշներով Արգիշտի Կիվիրյանին վարչական պատասխանատվության ենթարկել:

Իսկ Արգիշտի Կիվիրյանը հակընդդեմ հայցով պահանջել է ոչ իրավաչափ ճանաչել ոստիկանության գործողությունները՝ կապված Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովին Հայաստանի իրավազորությանը փոխանցելու պահանջի վերաբերյալ 15.01.2015թ. կազմակերպված հավաքի հետ:

Մեր զրույցում Արգիշտի Կիվիրյանի ներկայացուցիչ Արամազդ Կիվիրյանն ասաց, որ բողոքի քննությունը երկու տարի հետո նշանակելը խնդիրներ է առաջացնում՝ ողջամիտ ժամկետում գործի քննության տեսանկյունից՝ անկախ այն հանգամանքից, որ իրենց հայցը բավարարված է, իսկ ոստիկանության հայցը՝ մերժված:

«Եվրոպական դատարանը դիրքորոշում է արտահայտել նշված հարցի առնչությամբ՝ նշելով, որ տվյալ դեպքում, թեկուզ, եթե անձի խախտված իրավունքը դատական կարգով վերականգնվել է, դեռեւս չի նշանակում, որ տվյալ դեպքում ողջամիտ ժամկետների մասով չի խախտվել անձի իրավունքը, եթե օրինակ գործընթացը տեւել է մի քանի տարի: Այս պահի դրությամբ մենք ունենք նմանատիպ մեկ գործ, որով փաստացի հայցադիմում էր ներկայացվել խախտված իրավունքների վերականգնման համար, եւ այդ գործը տեւել 9 տարի: Մենք ներկայացրել ենք դիմում եվրոպական դատարան եւ հիմա Եվրոպական դատարանը, ըստ էության, ընդունել է վարույթ,  եւ Կառավարությանը ժամկետ է տվել մինչեւ հոկտեմբերի սկիզբը, որպեսզի այդ գործով ներկայացնի իր հակափաստարկները: Այսինքն՝ Եվրոպական դատարանն ուշադրություն է դարձնում գործի քննության ողջամիտ ժամկետներին»,- մեր զրույցում մանրամասնեց փաստաբան Արամազդ Կիվիրյանը:

Ըստ նրա՝ այստեղ դատարանի ծանրաբեռնվածության հարց կա, բայց Կիվիրյանի կարծիքով դատական համակարգը պետք է ինչ-որ ձեւով այդ հարցը կարգավորի, լուծի: Եթե ծանրաբեռնվածության խնդիր կա, թող աշխատակազմն ընդլայնեն, կամ դատարանների քանակը ավելացնեն, թող ապահովեն բոլոր այն անհրաժեշտ միջոցներով, որպեսզի քաղաքացիներն այսքան դատական քաշքշուկների մեջ չընկնեն: Դատարանի ծանրաբեռնվածությունը չպետք է ազդի իրականում գործի քննության ողջամիտ ժամկետների վրա, որովհետեւ իրականում երկարատեւ պրոցեսները նաեւ բերում են նրան, որ անձն իր խախտված իրավունքների համար դառնում է անտարբեր, այսինքն՝ իրեն արդեն սկսում է չհետաքրքրել՝ կվերականգնվի՞ իր խախտված իրավունքը, թե՞ ոչ»,- ասաց Կիվիրյանը:

Ընդհանուր առմամբ՝ սա առաջին դեպքը չէ, երբ Վարչական դատարանը նիստի օր է նշանակում բավականին ուշ՝ մասնավորապես մեկ տարի հետո, սա որոշակի խնդիրներ է առաջացնում նաեւ այն դեպքում, երբ ինչ-որ կազմակերպության գույքի վրա արգելանք է դրվում:

Այս առնչությամբ Արամազդ Կիվիրյանն ասաց. «Վարչական դատարանը սպեցիֆիկ դատարան է, այսինքն՝ կողմերից մեկը, բնականաբար, պետական մարմինն է, ու տարաբնույթ իրավիճակներ կարող են տեղի ունենալ: Օրինակ՝ հայցի ապահովման միջոց է կիրառված, հարկային ակտ է վիճարկվում եւ ստացվում է, որ նույն կազմակերպության դեմ դրված արգելանքը շարունակվում են տարիներ շարունակ մնալ: Անձը գտնվում է անորոշության մեջ՝ չիմանալով հայցը բավարարվում է, չի բավարարվում, որպեսզի հասկանա, թե ինչպես ծրագրի իր հետագա քայլերը: Սա լուրջ խնդիր է առաջացնում ցանկացած կողմի համար, կարծում եմ, որ այդ անորոշությունը ձեռնտու չէ թե՛ հայցվորին, թե՛ պատասխանողին»,- հավելեց Կիվիրյանը: