ՊՆ-ում բարձր պաշտոն զբաղեցնողների թիվը կկրճատվի. Վիգեն Սարգսյան

Այս տարին գերծանրաբեռնված էր «Ազգ բանակ» հայեցակարգի ներկայացումից մինչեւ դրա ռազմավարության ներկայացման առաջին քայլերն ու դրանից բխող առաջին կիրառական ծրագրերի ներդրումը. հոկտեմբերի 2-ին հայտարարեց ՀՀ պաշտպանության նախարար Վիգեն Սարգսյանը՝ պաշտոնավարման 1 տարին ամփոփելով: Նախարարը նշեց, որ ընդհանրապես ամենատարբեր ուղղություններով այս տարին գերհագեցած էր տարբեր միջոցառումներով ու խնդիրներով:

«Իհարկե առաջին գերխնդիրը մնում է մեր զինված ուժերի մարտունակության հետեւողական բարձրացումը: Այստեղ մենք ունենք երեք հիմնական ուղղություն, դա զենքի, սպառազինության, զինամթերքի խելամիտ ձեռքբերումներն ու մարտական ծառայության մեջ ներդնելն է, երկրորդը դա մեր զորքի մարտական պատրաստության մակարդակի շարունակական բարձրացումն է, եւ երրորդը պաշտպանության ոլորտում կառավարման արդյունավետության հետեւողական բարձրացումն է»,- ընդգծեց Վիգեն Սարգսյանը:

Առաջին ուղղության ՝ ռազմարդյունաբերության զարգացման մասով, պաշտպանության նախարարը նշեց, որ ինքը գնահատում է արդյունքը գործնական հետեւանքներով եւ շեշտեց՝  այս տարի ՊՆ-ն մարտական ծառայության մեջ ներդրել է ամբողջությամբ Հայաստանում մշակված եւ արտադրված միջոցներ, որոնք չափազանց կարեւոր են մարտական հերթապահության արդյունավետ իրականացման տեսակետից:

«Դրանք այնպիսի միջոցներ են, որոնք ոչ միայն գնային առումով առավելություն են տալիս այստեղ արտադրված լինելու տեսակետից, այլեւ շուկայում չունեն իրենց անալոգները: Եվ դա  առաջին քայլն է, դեպի մեր հիմնական նպատակ, այն ինչ կոչվում է մեր ռազմական արդյունաբերությունը մեր տնտեսության կարեւորագույն շարժիչ ուժի վերածելու տեսանկյունից՝ արտահանում կոնցեպտի վրա ուշադրություն դարձնելով: Այդպիսի մշակումներով մենք կարծում եմ, հնարավորություն ենք ունենալու միջազգային շուկաներում հետաքրքիր դառնալու ոչ միայն որպես զենք-զինամթերք ներկրող երկիր, այլեւ բարձր տեխնոլոգիաների վրա հիմնված սպառազինություններ արտահանող երկիր, ինչը էական ազդեցություն կունենա նաեւ մեր ամբողջ գիտակ ներուժն արդյունավետ օգտագործելու առումով եւ ռազմաարդյունաբերության զարգացման համար՝ առհասարակ»,- ասաց նախարարը:

Սպառազինությունների ու զենքի ձեռքբերումների կապակցությամբ էլ Վիգեն Սարգսյանն ասաց, որ պարզ է՝ սա փակ ոլորտ է ու ինքը չի կարող թվարկել ձեռք բերված սպառազինություններն ու տեխնիկան, բայց նշեց, որ այս ուղղությամբ՝ բավականին լուրջ ձեռքբերումներ են ունեցել զինված ուժերը:

Անդրադառնալով ռազմադիվանագիտական կապերի ակտիվացմանը՝ Վիգեն Սարգսյանը շեշտեց, որ այս տարի շատ ինտենսիվ տարի է եղել, եւ ինքը կատարել է պաշտոնական այց Ռուսաստան, որն առաջինն էր վերջին տարիներին պաշտպանության ոլորտի գծով, ունեցել է պաշտոնական այցեր Վրաստան ու Իրան, որոնք կարեւոր էին, ռազմաքաղաքական ու տարանցման հարցերի գծով, ունեցել է նաեւ այցեր դեպի մեր բարեկամ Հունաստան եւ Կիպրոս, որոնք մեր զինված ուժերի կայացման առաջին օրվանից շատ մեծ դեր են ունեցել եւ վերջերս էլ պաշտոնական այցով Չինաստանում էր:

«Այսպիսով՝ կարող եմ ասել, որ մեր հարաբերությունները մեր առանցքային գործընկերների, մեր ռազմավարական դաշնակցի հետ պահպանել ենք. այդ այցերի ընթացքում մի շարք կարեւորագույն փաստաթղթեր ենք ստորագրել»,- տեղեկացրեց Վիգեն Սարգսյանը:

ՊՆ կողմից իրականացվող քաղաքականության համատեքստում նա կարեւորեց «Պատիվ ունեմ» եւ «Ես եմ» ծրագրերին, եւ նշեց, որ այս հայեցակարգերը հանրային լայն քննարկումներ անցան, իսկ այդպիսի լայն քննարկումներ առաջին անգամ էին անցկացվում ՊՆ առաջարկած քաղաքականության կամ մոտեցումների համատեքստում:

Պաշտպանության նախարարն ընդգծեց, որ անցած տարում գերկարեւոր խնդիր էր կառավարման արդյունավետության բարձրացումը, եւ կատարվել է շատ մեծ նախապատրաստական աշխատանք ՊՆ վարչական ապարատի կառուցվածքի վերանայման ուղղությամբ:

«Փորձելու ենք կրճատել բարձրաստիճան պաշտոնյաների թիվը եւ փորձելու ենք ավելի կենտրոնանալ անմիջական աշխատանք իրականացնող մասնագետների արդյունավետության բարձրացման վրա»,- հայտարարեց Վիգեն Սարգսյանը, իսկ հետո այս հարցի կապակցությամբ պարզաբանեց, որ տարիների ընթացքում այնպես է ստացվել, որ ՊՆ համակարգում բազմաթիվ բաժիններ, վարչություններ, բաժանմունքներ կան, որտեղ ծառայողների ու բարձր պաշտոն զբաղեցնողների թիվը մեծ է ընդհանուր ՊՆ համակարգում ղեկավար պաշտոն զբաղեցնող ծառայողների թվի մեջ: Այս առումով նախարարը նշեց, որ ՊՆ վարչական ապարատն օպտիմալացվելու է, բայց այդուհանդերձ ամեն ինչ անում են, որ այնտեղ ծառայող անձնակազմը կարողանա շարունակել իր ծառայությունը պաշտպանության համակարգում, զինված ուժերում, քանի որ այդ ծառայողները մեծամասամբ մեծ փորձ ունեցող եւ մեծ ճանապարհ անցած մարդիկ են:

Վիգեն Սարգսյանն անդրադարձավ նաեւ հանրային մեծ հետաքրքրություն ներկայացնող գնումների գործընթացին: Այս ուղղությամբ էլ նախարարը նշեց, թե այս տարվա առաջին 9 ամիսների ընթացքում, առցանց կատարվող գնումների անվանացանկը զգալիորեն փոփոխելու եւ առանց ապրանքատեսակների քանակների վերանայման, ՊՆ-ն ունեցել է միջինում 10 տոկոս խնայողություն՝ անցյալ տարվա գնումների նկատմամբ:

«Սա զգալի ու լուրջ թիվ է, որն ամբողջությամբ վերաբաշխվելու է սպառազինության ու զենքի գնումների խնդիրները լուծելու հարցին: Մենք շարունակելու ենք այդ աշխատանքները, մեր սկզբունքները շատ պարզ են: Բանակին մատակարարող գործարարը պետք է վստահ լինի, որ ինքը արդյունավետ, բաց ու մրցակցային դաշտում է գործում, մենք պետք է վստահ լինենք, որ իր արտադրանքը համապատասխանում է հայտագրված չափորոշիչներին: Այն փաստաթղթերը, որոնք ներկայացվում են բանակին, պետք է լինեն գերճշգրիտ, եւ այդտեղ որեւէ բացթողում կամ սխալ չի ներվելու՝ մենք հետեւողական ենք լինելու այդ հարցում, մեզ մատակարարվող ապրանքները պետք է լինեն շուկայականից ավելի ցած գնով, որովհետեւ մենք մեծ գնորդ ենք եւ ունենք այդ իրավունքը, միեւնույն ժամանակ պետք է վստահ լինենք, որ որակ-գին հարաբերակցության մեջ մեր զինվորը չի տուժում»,- շեշտեց Վիգեն Սարգսյանը: