ՀՀԿ-ն, Գեղամյանի ջանքերով, կրակն ընկավ

Երեկ՝ հոկտեմբերի 5-ին, հերթական անախորժ միջադեպը տեղի ունեցավ ԱԺ-ում. ԱԺ «Ելք» խմբակցության ղեկավար Նիկոլ Փաշինյան ֆեյսբուքյան իր էջում գրառում կատարեց ու հայտնեց, որ ԱԺ միջանցքում ՀՀԿ խմբակցության պատգամավոր Արտաշես Գեղամյանը բռունցքներով հարձակվել է իր վրա: Փաշինյանը դրանից րոպեներ առաջ ԱԺ ամբիոնում իր ելույթի ժամանակ անդրադարձել էլ նաեւ Արտաշես Գեղամյանին։ Ճիշտ է՝ Գեղամյանը հետո հերքեց այդ միջադեպի իրողությունը, բայց ականատեսներն այլ բան էին պատմում:

Հետո՝ երբ «Ելք» խմբակցության պատգամավորները հայտարարություններ էին անում Արտաշես Գեղամյանի ու Նիկոլ Փաշինյանի միջեւ տեղի ունեցած միջադեպի մասին, մի հետաքրքիր արտահայտություն արեց ՀՀԿ խմբակցության պատգամավոր, ՀՀԿ փոխնախագահ Արմեն Աշոտյանը: Դիմելով Նիկոլ Փաշինյանին՝ Աշոտյանը նշեց. «Քաղաքական միջավայրում որոշակի էկոլոգիական խնդիրներ կան, որոնք միասին պետք է լուծենք»:

Իհարկե, Աշոտյանն իր այս «անշառ» դիտարկումն արեց այդ պահին ԱԺ-ում քննարկվող թեմայի՝ էկոլոգիական խնդիրների քննարկումների համատեքստում, միգուցե նաեւ պատահաբար՝ առանց որեւէ ենթատեքստի: Բայց նրա այս արտահայտությունն ուշագրավ է դառնում հենց օրվա միջադեպի ու դրա հեղինակ Արտաշես Գեղամյանի քաղաքական դիմանկարի ֆոնին:

Վերջին շրջանում տարբեր ՀՀԿ-ականներ մեզ հետ զրույցում արդեն բավականին հաճախակի են խոսում Գեղամյանից ու ակնարկում, թե նա ՀՀԿ-ական չէ՝ ռուսական կողմից ՀՀԿ-ի ստացած «նվեր» է, որից, սակայն հրաժարվել հնարավոր չէ: Հարցն այն է, որ Գեղամյանն ընկավում է որպես ծայրաստիճան պրոռուսական գործիչ, ռուսական շահերի ակտիվ պաշտպան ու ագիտատոր: Եվ հյուսիսային «մեծ եղբորը» մատուցած բազմապիսի ծառայությունների համար պարգեւատրվում է խորհրդարանական մանդատով՝ իշխող ուժի ֆրակցիայի կազմում:

ՀՀԿ-ական մեր զրուցակիցը նշում էր, որ իրենք մեծ հաճույքով կազատվեին Գեղամյանից, բայց, ցավոք, չեն կարող:

Նիկոլ Փաշինյանի հետ այս տհաճ միջադեպից հետո Գեղամյանի հարցը դառնում է ավելի սուր, որովհետեւ մի կողմից առնվազն ՀՀԿ խմբակցությունը հիմա կրակն է ընկել նրա այդ արարքի պատճառով՝  ստիպված է  պաշտպանել նրան, ինչը բազմաթիվ պատգամավորներ սրտանց չեն ուզում: Ավելին՝ քանի որ միջադեպը տեղի է ունեցել ականատեսների ներկայությամբ՝ պատգամավորի, լրագրողների ու ԱԺ անվտանգության աշխատակիցների, եւ այդ տարածքում տեղադրված են տեսախցիկներ, որոնց տեսագրությունները դիտելուց հետո արդեն որեւէ կասկած չի մնա, թե ով է եղել ծեծկռտուքը սկսողը: Ու եթե «Ելք»-ի նախաձեռնած էթիկայի հանձնաժողովը ապացուցի, թե ով է եղել միջադեպի «գլխավոր հերոսը», ինչը ընդհանրապես խնդիր չէ, ապա ՀՀԿ խմբակցությունը պետք է ինչ-որ քայլեր ձեռնարկի:

Եթե այդ «գլխավոր հերոսը» չլիներ Գեղամյանը, ապա ՀՀԿ-ի համար նրան պատժելը խնդիր չէր լինի: Բայց հիմա իրավիճակը բարդանում է ՀՀԿ-ականների համար՝ հատկապես վեջին 2-3 շաբաթների իրադարձությունների ֆոնին: Որովհետեւ  «Ելք»-ը նախաձեռնեց ԵԱՏՄ-ից Հայաստանի դուրս գալու օրենսդրական նախաձեռնությունն ու այդ հարցը քննարկելու համար ժամանակավոր հանձնաժողով ստեղծելու առաջարկով հանդես եկավ, իսկ այդ ժամանակ Գեղամյանն «առաջին գծում» էր՝ ռուսական շահերն էր պաշտպանում:  Այնուհետեւ կառավարությունը խորհրդարան բերեց հայ-ռուսական միացյալ զորախումբ ստեղծելու, իսկ այնուհետեւ՝ ռազմատեխնիկական համագործակցությանը վերաբերող մի քանի նախագծեր եւս, որոնց դեմ էր «Ելք»-ը, իսկ Գեղամյանը դարձյալ «առաջնագծում էր»:

Ու ստացվում է այնպես, որ ԱԺ-ում ամենառուսամետ գործիչը՝ այս քննարկումների ֆոնին, բռունցքներն է գործի դնում ոչ ավելի, ոչ պակաս իրենց կողմից «հակառուսական» բնորոշված «Ելք»-ի ղեկավարի նկատմամբ: Դե հիմա, ՀՀԿ, արի ու «ռուս եղբայրներին» բացատրիր, որ սա Ռուսաստան-Արեւմուտք հակամարտության տիրույթը չէ, այլ պարզապես Գեղամյանին դուր չի եկել, որ Փաշինյանն իր անունը շատ է արտասանում: Մյուս կողմից էլ՝ դե արի, ՀՀԿ, ու եվրոպացի գործընկերներին, որոնց հետ պատրաստվում ես համաձայնագիր ստորագրել, համոզիր, որ ՀՀ Ազգային ժողովում ռուսամետ իշխանությունները Ռուսաստանի շահերին հակասող ելույթներ ունեցող ու «արեւմտամետ» համարվող պատգամավորներին չեն ծեծում:

Ամեն դեպքում՝ ռուսական կողմնորոշումը, ամենայն հավանականությամբ, կստիպի, որ ՀՀԿ-ն ամեն կերպ փորձի Գեղամյանին խիստ չպատժել: