Մոուրինյոն առայժմ վստահում է Մխիթարյանին.հայ մեկնաբանը Հենոյին ուղղված մեղադրանքների մասին

Անգլիական «Մանչեստեր Յունայթեդի» ոչ տպավորից հանդիպումների միակ մեղավորը ՀՀ հավաքականի կիսապաշտպան Հենրիխ Մխիթարյանը չէ: Նման կարծիքի է Armfootbal.com կայքի գլխավոր խմբագիր, ֆուտբոլային մեկնաբան Ռաֆայել Խալաթյանը: Վերջին շրջանում հայ ֆուտբոլիստի խաղը քննադատում են այնպիսի լեգենդար նախկին ֆուտբոլիստներ, ինչպիսիք են Ջեյմի Քարագերը, Փոլ Սկոուլզը, Գարի Նեւիլը, որոնք հանդես են գալիս որպես վերլուծաբաններ: Երկրպագուներն էլ թիմի գլխավոր մարզիչ Ժոզե Մոուրինյոյից պահանջում են պահեստայինների նստարանին թողնել Մխիթարյանին: Մեղադրանքների հերթական ալիքը բարձրացավ երեկ՝ նոյեմբերի 5-ին, «Չելսիից» կրած 0:1 հաշվով պարտությունից հետո: Armtimes.com-ի հետ զրույցում Ռաֆայել Խալաթյանն իր կարծիքը հայտնեց ՄՅՈւ-ի վատ խաղի պատճառների մասին:  

«Ընդհանուր առմամբ, թիմն իր լավագույն խաղը չի ցուցադրում, հատկապես ուժեղ մրցակիցների դեմ խաղերում: Հարձակումների ժամանակ ավելի շատ շեշտը դրվում է եզրերի վրա, կենտրոնով քիչ են խաղում, բացի այդ, հենակետային գոտում չկա ֆուտբոլիստ, որը կարողանում է լավ գնդակ պահել ու առաջ տանել, ինչպես Պոլ Պոգբան էր անում: Արդյունքում, Մխիթարյանն առջեւի գծում զրկված է գնդակից ու չի կարողանում լավագույն խաղը ցույց տալ: Հնարավոր է՝ վերջին անհաջող ելույթներից հետո Մխիթարյանի մոտ նաեւ հոգեբանական անկում կա, որից ֆուտբոլիստը դուրս կգա 1-2 հաջող խաղերից հետո»,- ասաց նա:

«Յունայթեդի» խաղի որակի մասին խոսելիս բրիտանական մամուլը եւս անդրադառնում է Պոլ Պոգբայի բացակայությանը: Վերջինս վնասվածք ունի: Նշվում է, որ նրա բացակայությունն ազդել է ինչպես ողջ թիմի, այնպես էլ առանձին ֆուտբոլիստների եւ, մասնավորապես Մխիթարյանի գործողությունների վրա: Ռաֆայել Խալաթյանը վստահ չէ, որ ֆրանսիացու վերադարձը կօգնի Մխիթարյանին:

«Նայած՝ ինչ վիճակում կվերադառնա, որքան ժամանակում մարզավիճակ կհավաքի ու որքան մեծ կլինի Մոուրինյոյի ցանկությունը վերադառնալու նախկին խաղաոճին, երբ Պոգբան կազմում էր»,- ասաց նա:

Ամեն անգամ, երբ Մխիթարյանի որեւէ դժգույն հանդիպումից հետո նրա հասցեին քննադատություն է հնչում, հայ երկրպագուների մոտ մտավախություն է առաջանում «մանկունյանցիների» կազմում նրա հետագա կարիերայի վերաբերյալ: Անցած մրցաշրջանում հայ ֆուտբոլիստի անհաջող խաղերից հետո խոսվում էր այն մասին, որ հունվարյան տրանսֆերային պատուհանի ժամանակ նա կարող է տեղափոխվել «Յուվենտուս»: Այս անգամ կան խոսակցություններ, որ Մոուրինյոն կարող է ձեռք բերել իր սիրելի ֆուտբոլիստներից մեկին՝ «Արսենալի» կիսապաշտպան Մեսութ Օզիլին, որին նա մարզել է «Ռեալ Մադրիդում»: Սա, շատերի կարծիքով «կնշանակի Մխիթարյանի կարիերայի ավարտը «կարմիր սատանաների» կազմում:

«Նման խոսակցությունները հատուկ են մրցաշրջանի այս հատվածին, որովհետեւ տրանսֆերային շշուկներ ամբողջ ընթացքում լինում են, ու երբ ինչ-որ ֆուտբոլիստ որոշակի ժամանակահատվածում լավ խաղ չի ցուցադրում, նրան սկսում են անընդհատ տեղափոխել ուրիշ թիմը, կամ նրա փոխարեն ուրիշին բերել: Դա ավելի հստակ կերեւա մրցաշրջանի ավարտին մոտ: Ներկա պահին զգացվում է, որ առայժմ մարզիչը վստահում է նրան, ու դա երեւում է նրանից, որ նույնիսկ վատ խաղերից հետո Մխիթարյանը մեկնարկային կազմում է լինում կարեւոր խաղերում: Այնպես որ մտավախության առիթ չեմ տեսնում, եթե իհարկե նման խաղը չշարունակվի երկար ժամանակ»,- ասաց Ռաֆայել Խալաթյանը:

Երեկվա խաղում Մխիթարյանը խաղադաշտ դուրս եկավ մեկնարկային կազմում եւ փոխարինվեց 62-րդ րոպեին: Նրան փոխարեն խաղադաշտ դուրս եկավ Անտոնի Մարսիալը: «Չելսիից» կրած պարտությունից հետո «Յունայթեդը» մնաց 23 միավորով: 2-րդ տեղում է եւ արդեն 8 միավորով է զիջում միանձնյա առաջատար «Մանչեստեր Սիթիին», որը երեկ «Արսենալին» 3:1 հաշվով հաղթելուց հետո միավորների քանակը հասցրեց 31-ի: «Թոթենհեմը» ՄՅՈւ-ի պես ունի 23 միավոր, սակայն զիջում է լրացուցիչ ցուցանիշներով եւ 3-րդն է: «Չելսին» 22 միավորով 4-րդն է:

Անգլիայի Պրեմիեր լիգայում «Յունայթեդը» հաջորդ հանդիպումը կանցկացնի հավաքականների խաղերով պայմանավորված դադարից հետո: 12-րդ տուրի շրջանակներում մրցակիցը կլինի «Նյուքասլը»: Հանդիպումը կկայանա նոյեմբերի 18-ին: