Հայրիկիցս ինչ խնդրում էի, գնում էր ինձ համար.Մխիթարյանի մասին ֆիլմը հասանելի է համացանցում

Հայաստանի ֆուտբոլի ազգային հավաքականի ավագ Հենրիխ Մխիթարյանի մասին «Մանչեստեր Յունայթեդի» պատրաստած «Միկին. հայ հերոսը» վերնագրով վավերագրական ֆիլմը հասանելի է համացանցում: Ֆիլմում Մխիթարյանի մասին խոսում են նրա մայրը՝ Մարինա Թաշչյանը, քույրը՝ Մոնիկա Մխիթարյանը, «Մանչեստեր Յունայթեդի» գլխավոր մարզիչ Ժոզե Մոուրինյոն, ՀՀ հավաքականի գլխավոր մարզիչ Արթուր Պետրոսյանը, «Փյունիկում» նրա նախկին մարզիչ Արմեն Գյուլբուդաղյանցը, Հայաստանի ֆուտբոլի ֆեդերացիայի նախագահ Ռուբեն Հայրապետյանը, ընկերները, Հայաստանում նրա երկրպագուները: Ժոզե Մոուրինյոն ընդգծում է, որ ՄՅՈՒ-ում է հայտնվել Բունդեսլիգայի լավագույն խաղացողը:

«Ի դեմս Միկիի մենք բերեցինք Բունդեսլիգայի լավագույն խաղացողին, որին լավագույն ֆուտբոլիստ էին ճանաչել ոչ թե երկրպագուները, լրագրողները, այլ կոլեգաները՝ ֆուտբոլիստները»,- ասել է նա՝ ավելացնելով, որ իրեն տպավորում է Մխիթարյանի գոլերի, գոլային փոխանցումների քանակը, կրեատիվությունն ու թիմային խաղը:

Մխիթարյանի համար թիմին ադապտացվելը հեշտ չէր: Սկզբում նա քիչ խաղաժամանակ էր ստանում: Հետո էլ վնասվածք ստացավ, ինչը նույնպես խանգարեց նոր թիմում իրեն դրսեւորելուն: Երկրպագուներն անհամբերությամբ սպասում էին՝ երբ է Մոուրինյոն հնարավորություն տալու նրան, իսկ մարզիչը բացատրում էր, որ ժամանակ է պետք: Ֆիլմում մեջբերված է ասուլիսներից մեկի ժամանակ մասնագետի մեկնաբանությունը Մխիթարյանին չխաղացնելու վերաբերյալ:

«Նրան ժամանակ էր պետք ադապտացվելու համար, եւ այդ ժամանակահատվածում նա իրեն դրսեւորեց որպես իսկական պրոֆեսիոնալ, որովհետեւ մեկ այլ ֆուտբոլիստ նրա փոխարեն արդարացումներ կփնտրեր, կմեղադրեր մարզչին, խաղադաշտը, եղանակային պայմանները, բայց նա հանգիստ էր, բերանը փակ մարզվում էր, սպասում էր իր հնարավորությանը»,- ասում է նա:

Մխիթարյանի համար դժվարություններն անսպասելի չեն եղել: Նա գիտակցել է, որ դժվարություններ լինելու են: Լիովին պատրաստ է եղել դիմակայելու դրանց, որպեսզի հետո չզղջա, որ ինչ-որ հնարավորություն է բաց թողել:

«Գիտեի, որ հեշտ չի լինելու՝ նոր թիմ, նոր խաղաոճ, նոր կենսակերպ, նոր մարզիչ, նոր խաղընկերներ, բայց ես չէի կարող բաց թողնել այս մարտահրավերը, քանի որ չեմ ցանկանում հետագայում զղջալ չարած բաների համար»,- ասում է նա՝ խոստովանելով, որ անգլիական գրանդ տեղափոխվելուց հետո մոտ 2 ամիս կարծես երազի մեջ լիներ եւ չէր կարողանում հավատալ, որ իրականություն է:

Մխիթարյանի կյանքում ու կարիերայում մեծ է նրա հոր՝ ֆուտբոլիստ Համլետ Մխիթարյանի դերը: Վերջինս կյանքից հեռացել է քաղցկեղի պատճառով 33 տարեկան հասակում: Ֆուտբոլիստը պատմում է, որ մանկության լավագույն հիշողությունները կապված են հոր հետ:

«Երբ հայրս մահացավ, ես սկսեցի երազել ֆուտբոլիստ դառնալու մասին: Կարծում եմ՝ նա էր իմ շարժիչ ուժը: Ինձ համար շատ ոգեւորիչ էր տեսնել նրան մարզվելիս, խաղալիս: Ես շատ լավ հիշողություններ ունեմ նրա մասին: Երբեմն մենք մարզադաշտում նայում էինք նրա խաղերը, երբ Ֆրանսիայում էինք: Լավ հիշում եմ՝ ինչ խնդրում էի նրանից, գնում էր ինձ համար, երբեք ո՛չ չէր ասում: Նա հոգ էր տանում ինձ, քրոջս, մորս մասին: Դա չեմ ասում, որովհետեւ իմ հայրն է, նույնը շատ եմ լսել նրա ընկերներից, մեր ընտանիքի մյուս անդամներից: Նա հրաշալի ֆուտբոլիստ էր, եւ նաեւ հրաշալի մարդ»,- ասում է նա:

Ընտանիքում Մխիթարյանը փորձում է փոխարինել հորը թե որպես ֆուտբոլիստ, որը պետք է լրացնի նրա անավարտ թողած կարիերան, եւ թե որպես տղամարդ: Ավագ քույրը՝ Մոնիկա Մխիթարյանը, նշում է, որ նա միշտ փորձում է պաշտպանել իրեն ու իրենց մորը: Հենրիխը օրինակ է նրա համար:

«Ինձ համար նա օրինակ է, եւ եթե մի օր ամուսնանամ, կուզենամ նրա նման տղամարդու հետ ամուսնանալ»,- ասում է նա:

Քույրը նաեւ ընդգծում է, որ շատ հպարտ է եղբոր հաջողություններով: Նա աշխարհին ներկայացնում է Հայաստանը եւ հետխորհրդային երկրները, եւ դա անում է բարձր մակարդակով:

«Նա Հայաստանի ամենահայտնի մարդն է, որը ներկայացնում է երկիրն աշխարհում: Կարող եմ նաեւ վելացնել, որ ԱՊՀ երկրներում որպես ֆուտբոլիստն է միակն է, ով արեւմուտքում ներկայացնում է Արեւելյան Եվրոպան, ռուսախոս երկրները»,- ասում է նա:

Ամուսնու մահից հետո Մխիթարյանի մոր համար երջանկությունը երեխաներն են: Նրա համար շատ կարեւոր է, որ իր ընտանիքը միասնական է:

«Ամենակարեւորն այն է, որ մենք շատ կապված ենք իրար հետ: Տարբեր երկրներում ենք ապրում, բայց ամեն օր խոսում ենք»,- ասում է նա:

Մխիթարյանի մասին ֆիլմը նկարահանելու համար ստեղծագործական անձնակազմը Հայաստան էր ժամանել այս տարի ամռանը: