«Սիթիի» անակնկալ պարտությունն ու «Լիվերպուլի» խոշոր հաշվով հաղթանակը. ՉԼ օրվա արդյունքները

Չեմպիոնների լիգայի 2017-18 մրցաշրջանի խմբային փուլի վերջին՝ 6-րդ, տուրում «Մանչեստեր Սիթին» մրցակցի հարկի տակ անակնկալ պարտություն կրեց Դոնեցկի «Շախտյորից»: Մինչեւ երեկ՝ դեկտեմբերի 6-ը, «քաղաքայինները» Չեմպիոնների լիգայում անպարտելի էին, ինչպես Անգլիայի Պրեմիեր լիգայում: «Շախտյորին» նրանք զիջեցին 1:2 հաշվով:

26-րդ րոպեին տանտերերից հաշիվը բացեց Բերնարդը: 6 րոպե անց Իսմաիլին խփեց իր թիմի 2-րդ գոլը: «Սիթին» միայն խաղավարտին կարողացավ 1 պատասխան գնդակ խփել: 11 մետրանոցի հնարավորություն ստացավ, որն ավելացված ժամանակի 2-րդ րոպեին անվրեպ իրացրեց Սերխիո Ագուերոն: Ավելին անել նրանց չհաջողվեց:

F խմբի մյուս խաղում «Սեւիլիան» մրցակցի հարկի տակ ոչ-ոքի խաղաց «Մարիբորի» հետ (1:1): Այս խմբից առաջին տեղով 1/8 եզրափակիչ դուրս եկավ «Լիվեպրպուլը» (12 միավոր), իսկ 2-րդ տեղով՝ «Սեւիլիան» (9): «Սպարտակը» խմբային փուլն ավարտեց 3-րդ տեղում (6) եւ պայքարը կշարունակի Եվրոպա լիգայում: «Մարիբորը» 3 միավորով մնաց 4-րդ տեղում:

Տուրում ամենագոլառատը «Լիվերպուլ»-«Սպարտակ Մոսկվա» հանդիպումն էր: «Մերսիսայդցիները» քարը քարի վրա չթողեցին ռուսական թիմից. 7 անպատասխան գնդակ ուղարկեցին մրցակցի դարպասը: Հետ-տրիկի հեղինակ դարձավ Ֆիլիպե Կոուտինյոն, որն աչքի ընկավ 4-րդ (11 մետրանոց), 15-րդ եւ 60-րդ րոպեներին: Սադիո Մանեն դուբլ ձեւակերպեց (47 եւ 76-րդ րոպե): Մեկական անգամ աչքի ընկան Ռոբերտո Ֆիրմինոն (19-րդ ր) եւ Մոհամեդ Սալահը (86-րդ ր):

E խմբի մյուս խաղում «Ֆեյենորդը» 2:1 հաշվով հաղթեց «Նապոլիին»: Խմբում առաջին տեղը զբաղեցրեց «Սիթին» (15), իսկ 2-րդ՝ «Շախտյորը» (12): Այս թիմերը դուրս եկան փլեյ-օֆ: 3-րդ տեղը զբաղեցրած «Նապոլին» (6) հանդես կգա Եվրոպա լիգայում: «Ֆեյենորդը» խմբում 4-րդն է (3):

G խմբում «Բեշիկթաշը» հյուրընկալվելիս 2:1 հաշվով հաղթեց «Լայպցիգին», իսկ «Պորտուն» սեփական հարկի տակ առավելության հասավ «Մոնակոյի» նկատմամբ (5:2): Առաջին տեղով 1/8 եզրափակիչ դուրս եկավ «Բեշիկթաշը» (14), իսկ 2-րդ տեղով՝ «Պորտուն» (10): 3-րդ տեղում խմբային փուլն ավարտած «Լայպցիգը» կշարունակի պայքարը «Եվրոպա լիգայում»: Այս խմբի ետնապահը «Մոնակոն» է (2):

H խմբում «Թոթենհեմը» 3:0 հաշվով հաղթեց ԱՊՕԷԼ-ին, իսկ «Ռեալ Մադրիդը»՝ 3:2 հաշվով Դորտմունդի «Բորուսիային»: Առաջին տեղով հաջորդ փուլ դուրս եկավ «Թոթենհեմը» (16), 2-րդ տեղով՝ «Ռեալը» (13): «Բորուսիան» ու ԱՊՕԷԼ-ը 2-ական միավորով ավարտեցին խմբային փուլը: Լրացուցիչ ցուցանիշներով 3-րդ տեղը զբաղեցրեց ու Եվրոպա լիգայում խաղալու հնարավորություն ստացավ «Բորուսիան»:

Այս փուլից հետո որպես իրենց խմբերի առաջատարներ 1/8 եզրափակիչ անցան «Մանչեստեր Յունայթեդը», ՊՍԺ-ն, «Ռոման», «Բարսելոնան», «Լիվերպուլը», «Մանչեստեր Սիթին», «Բեշիկթաշը» եւ «Թոթենհեմը»: 2-րդ տեղով մյուս փուլի ուղեգիր ստացան «Բազելը», «Բավարիան», «Չելսին», «Յուվենտուսը», «Սեւիլիան», «Շախտյորը», «Պորտուն» եւ «Ռեալը»:

Եվրոպա լիգայում հանդես կգան խմբերում 3-րդ տեղերը զբաղեցրած Մոսկվայի ԲԿՄԱ-ն, «Սելթիքը», «Ատլետիկոն», «Սպորտինգը», Մոսկվայի «Սպարտակը», «Նապոլին», «Լայպցիգը» եւ «Բորուսիան»:

Չեմպիոնների լիգայի 1/8 եզրափակչի վիճակահանությունը կկայանա դեկտեմբերի 11-ին: Խմբերի առաջատարներն ու 2-րդ տեղերը զբաղեցրածները կլինեն 2 առանձին զամբյուղներում: 1/8 եզրափակչում թիմերը չեն կարող խաղալ իրենց խմբային փուլի մրցակիցների կամ իրենց երկրի թիմերի դեմ: Առաջին տեղերը զբաղեցրած թիմերն առաջին հանդիպումները կանցկացնեն մրցակցի հարկի տակ: Փլեյ-օֆ փուլը կսկսվի 2018 թ. փետրվարի 13-14-ին: