Սխալ է հասկացվել, ռուս սահմանապահները խոսքի իրավուք չունեն. Արսեն Հարությունյան

«Հարցը սխալ է հասկացվել եւ խոսքը չի գնում Ռուսաստանի սահմաանապահների մասին»,- կառավարության դեկտեմբերի 14-ի նիստից հետո հայտարարեց Ջրային տնտեսության պետական կոմիտեի նախագահ Արսեն Հարությունյանը՝ մեկնաբանելով լուրերն այն մասին, որ ՌԴ սահմանապահները թույլ չեն տվել վերանորոգել Մեղրիի ճանապարհներից մեկը:

Նշենք, որ կառավարության այսօրիվա նիստի չզեկուցվող հարցերի շրջանակներում էր էներգետիկ ենթակառուցվածքների եւ բնական պաշարների նախարարության ջրային տնտեսության պետական կոմիտեի կարիքների համար գնման պայմանագրի դադարեցնելու հարցը:

Ըստ նախագծի, կնքված պայմանագրի շրջանակներում կատարվել են ՀՀ Սյունիքի մարզում Մ-2 Երեւան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում Արաքս գետի ափի շուրջ 40 մ երկարությամբ հատվածի վթարային վիճակի վերացման աշխատանքների նախապատրաստական բոլոր փուլերը: Քանի որ վերոնշյալ հատվածն Արաքս գետով սահմանակից է Իրանի Իսլամական Հանրապետությանը, եւ ՀՀ ափամերձ տարածքները հսկվում են ՌԴ-ի 2393 սահմանապահ զորամասի կողմից, ուստի անհրաժեշտ էր ձեռք բերել համաձայնություն՝ կողմերի միջեւ նշված հատվածում աշխատանքների կատարման եւ ավարտման համար: Սակայն աշխատանքային կարգով հանդիպումների ընթացքում հնարավոր չի եղել արդյունավետ համագործակցել եւ կողմերի միջեւ համաձայնություն ձեռք չի բերվել:

Ջրային տնտեսության պետական կոմիտեի նախագահ Արսեն Հարությունյանը հայտարարում է, որ հարցը սխալ է հասկացվել եւ խոսքը Ռուսաստանի սահմաանապահների մասին չէ:

«Պայմանագրի՝ ընդհանուր 12,2 միլիոն աշխատանքների համար է նախատեսված, որի հիմնականը՝ ինն ու կես միլիոնի աշխատանքը շինարարն ավարտել է: Ու քանի որ իրանական կողմի հետ բանակցությոնները դեռ շարունակվում են եւ այս տարի չեն ավարտվելու, ստիպված մենք պայմանագիրն ավարտում ենք, որ շինարարը տույժ տուգանքների տակ չընկնի: Բանակցություններն իրանական կողմի հետ շարունակվում են, ռուս սահմանապահները որեւէ կապ չունեն այս ամենի հետ»,- ասաց նա:

Հարությունյանի խոսքով՝ այս հարցի շուրջ ռուսական կողմը Հայաստանի հետ միասին բանակցություններ են վարում իրանական կողմի հետ:

Լրագրողները մեջբերեցին նախագծի հիմնավոորումը, ըստ որի՝ խնդիրը ռուսական սահմանապահների հետ է կապված, եւ նրանք համաձայնություն չեն տալիս վերանորոգում իրականացնելու համար, Արսեն Հարությունյանը նշեց, որ վրիպակ է եղել: «Ռուսական սահմանապահների հետ մենք բանակցում են իրանական կողմի հետ, եթե իրանական կողմը համաձայնություն չի տալիս, նշանակում է, որ թելը կտրվում է: Մենք ռուսական կողմի հետ որեւէ խնդիր չունենք»,- ասաց նա:

Նա պարզաբանեց, որ ափապաշտպան աշխատանքների արդյունքում գետի հունը փոխվում է եւ իրանական կողմն ունի առարկություններ, քանի որ գետը թեքվում է «դեպի մեր կողմը»: «Իրանական կողմը հարց է բարձրացել եւ հիմա քննարկումներ են ընթանում: Խոսքը 40 մետրի մասին է»,- ասաց նա:

Դիտարկմանը, բայց նշված է, որ բանակցությունները դադարեցվել են, կոմիտեի նախագահն ասաց. «Դադարեցնում ենք բանակցությունները, քանի որ շինարարը տույժ տուգանքի տակ է ընկնում: Մենք պարտավոր ենք նրա կենսագրությունը մաքուր պահել, քանի որ շինարարի պատճառով չէ, որ աշխատանքները դադարեցվում են: Ժամանակավոր աշխատանքները դադարեցվում են»:

Արսեն Հարությունյանը նշեց, որ ռուսական կողմն այս հարցում ՀՀ-ի հետ նույն դիրքերից է հանդես գալիս: «Ռուսական կողմի հանձնարարությունը ընդհանրապես կապ չունի, եւ չի կարող չհամաձայնվել, ձայնի իրավունք չունի եւ որոշում ընդունողը հայկական եւ իրանական կողմն են»,- ասաց նա: Ինչ վերաբերում է հարցին, թե ինչու են այդ դեպքում ռուսական սահմանապահները մասնակցում բանակցություններին եւ արդյո՞ք դա ՀՀ-ի ինքնիշխանության ոտնահարում է, նա պատասխանեց. «Որովհետեւ ռուսական կողմն է սահմանը պահում: Դա ինքնիշխանության իրավունքի ոտնահարում չէ»: