Ինչ դարձել եք ավագանի, ձեր հագուկապի մեջ լիքը բան է փոխվել. Տարոն Մարգարյան

17:20 Երեւանի ավագանին հաստատեց օրակարգային բոլոր հարցերը, այդ թվում 2018 թվականի բյուջեն:

16:02 - Երեւանի ավագանու «Երկիր ծիրանի» խմբակցության անդամ Մարինա Խաչատրյանը մայրաքաղաքի բյուջեն հաստատելու մասին հարցի քննարկման ժամանակ հայտարրաեց, որ քաղաքը պատրաստվում է միլիոնավոր դոլարների վարկային բեռ վերցնել, որը բեռ է դառնալու քաղաքացիների համար: Վերջինս նաեւ որոշ հաշվարկներ ներկայացրեց դոլարով, սակայն Երեւանի քաղաքապետ Տարոն Մարգարյանը հակադարձեց նրան. «Հարգելիս, ուզում եմ ձեզ հիշեցնել, որ Երեւան համայնքի բյուջեն ՀՀ դրամով է եւ ոչ թե դոլարով: Ի տարբերություն ձեզ մենք ստանում ենք ՀՀ դրամով աշխատավարձ, դուք երեւի՝ դոլարով»: Մարնիա Խաչատրյանը փորձեց տեղից հակադարձել քաղաքապետին, սակայն նրա խոսքը լսելի չդարձավ:

«Երկրորդը, երբ որ հայտարարում եք մեր հագուկապի կամ մեր գործուղումների մասին, ուզում եմ տեղեկացնեմ ձեզ՝ ի տարբերություն մեզ, ինչ դուք դարձել եք ավագանի ոնց որ ձեր հագուկապի մեջ լիքը բան է փոխվել, ձեր քյլվածքի մեջ, սանրվածքի մեջ եւ ամեն ինչի մեջ: Դրա համար հերիք է, ուղղակի երբ որ չեք տիրապետում մի բանի, դատարկ խոսելով չի կարելլի առաջ գնալ»,- հայտարարեց Տարոն Մարգարյանը:

14:36 - Երեւանի փոխքաղաքապետ Վահե Նիկոյանը ներկայացրեց մայրաքաղաքում տեղական վճարների դրույքաչափերը հաստատելու մասին ավագանու որոշման նախագիծը եւ նշեց, որ որեւէ փոփոխություն տեղի չի ունենալու: Փոխքաղաքապետի խոսքով, ավագանին պարտավոր է ամեն տարի սահմանել հաջորդ տարվա դրույքաչափերը ինչն այսօր անում են: Ավագանին հաստատեց գործող դրույքաչափերը:

13:00 - Այժմ ավագանու նիստում հայտարրավեց ընդմիջում:

12:40 - «Երկիր ծիրանի» խմբակցության անդամները օրակարգային գրեթե բոլոր հացերի վերաբերյալ ձայն են խնդրում եւ տեսակետներ հայտնում: Նրանց նույնաբովանդակ հարցերը հունից հանում են ՀՀԿ-ական ավագանիներին, երբեմն առաջացնում է նրանց ծիծաղը:

«Երկիր ծիրանի» խմբակցության անդամ Մարինա Խաչատրյանը մի հարցերի վերաբերյալ ելույթի իրավունք խնդրեց, սակայն Երեւանի քաղաքապետը նման հնարավորություն նրան չտվեց: Խաչատրյանը ստիպված ձեռքը վերցրեց բարձրախոսն ու դրանով հայտարարություն արեց, նիստերի դահլիճում աղմուկ սկսվեց: Մարինա Խաչատրյանը մի պահ էլ չվստահեց հաշվիչ հանձնաժողովի նախագահին եւ ցանկություն հայտնեց ինքն անձամբ հաշվի քվեարկություների ձայները: Հանրապետական խմբակցության անդամները հեգնեցին, բղավեին եւ հնարավոր ամեն ինչ արեցին, որպեսզի ծաղրեն Մարինա Խաչատրյանին:

11:50 - Օրակարգային 2-րդ հարցը «Ռաֆայել Պապայանի հիշատակը հավերժացնող հուշատախտակի տեղադրման մասին» որոշման նախագիծն էր: Զեկուցվեց, որ Պապայանը Սահմանադրական դատարանի անդամ է եղել, իսկ հուշատախտակի համար քաղաքապետարան է դիմել ՍԴ նախագահ Գագիկ Հարությունյանը: «Երկիր ծիրանի» խմբակցության անդամները հիշեցրեցին, թե ինչ կենսագրություն ունի նախ Գագիկ Հարությունյանը եւ հետո Ռաֆայել Պապայանը: Վերջինիս մասին կենսագրականն ընթերցելիս ավագանու անդամները նշեցին, որ Պապայանը համարվում է քաղբանտարկյալ, ինչպես նիստը վարող Տարոն Մարգարյանի հայրը, սակայն մարդիկ քիչ բան գիտեն նրանց քաղբանտարկյալ լինելու մասին: Հանրապետական խմբակցության անդամները սկսեցին ձեռքերով հարվածել սեղաններին:

11:40 - Ավագանին հաստատեց նիստի օրակարգը եւ ըստ սահմանված հաջորդականության սկսեց քննարկել եւ քվեարկել հարցերը: Դեմ քվեարկեցին միայն «Երկիր ծիրանի» խմբակցության երեք անդամները:

11:38 - Սկսվել է Երեւանի ավագանու հերթական նիստը: «Երկիր ծիրանի» խմբակցության երեք անդամները նիստերի դահլիճ եկան կուսակցության տարբերանշանով փոքր դրոշակներով, բարձրախոսով եւ ժամանակ պահելու սարքով:

Խմբակցության անդամ Սոնա Աղեկյանը ելույթով հանդես եկավ եւ նշեց, որ ավագանու երկու անդամ ապօրինի են մասնակցում նիստերին եւ մատնանշեց «Երկիր ծիրանի» խմբակցությունից հեռացածներին: Սոնա Աղեկյանը Երեւանի քաղաքապետ Տարոն Մարգարյանից պահանջեց, որպեսզի վաղաժամ դադարեցնի ավագանու անդամներ Մնացական Պարակշիեւի եւ Հայկ Պետրոսյանի լիազորությունները:

Տարոն Մարգարյանը Սոնա Աղեկյանին հիշեցրեց, որ «Երկիր ծիրանի» կուսակցությունը դիմել էր ԿԸՀ, սակայն ավագանու անդամների մանդատից զրկելու հարցը որոշվում է ավագանիների դիմումների հիման վրա: