Ճըվճվ Արոյի որդին ոստիկանությունում է. ՃՈ տեսուչը գլխի, թոքի վնասվածք է ստացել. թարմացված

Այսօր լուսադեմին Երեւանի Աբովյան փողոցի եւ Սայաթ-Նովա պողոտայի խաչմերուկում տեղի ունեցած խոշոր ավտովթարի հետեւանքով մարմնական վնասվածքներ ստացած ՃՈ ծառայող Խաչիկ Գասպարյանի վիճակը ծայրահեղ ծանր է գնահատվում:

Նա տեղափոխվել է թիվ 1 համալսարանական հիվանդանոց:

Հիշեցնենք, ժամը 04:00-ի սահմաններում իրար էին բախվել Ճանապարհային ոստիկանության ծառայություն իրականացնող «Toyota Corolla» մակնիշի եւ «BMW X6» մակնիշի ավտոմեքենաները: Վթարի հետեւանքով «Toyota Corolla»-ի վարորդ, ՃՈ ծառայող Արեգ Դավթյանը հիվանդանոցում մահացել է, իսկ ուղեւոր ՃՈ ծառայող Խաչիկ Գասպարյանը տեղափոխվել է հիվանդանոց:

«BMW X6»-ի վարորդը, որն ըստ մամուլում շրջանառվող տեղեկությունների՝ ՃըվՃվ Արոյի (Արա Վարդանյան) որդին է՝ Սարգիս Վարդանյանը, դիմել է փախուստի: Մի քանի ժամ անց, սակայն նա ինքնակամ ներկայացել է ոստիկանության բաժին: Այս պահին նա դեռ գտնվում է ոստիկանությունում եւ նրա կարգավիճակը դեռ հայտնի չէ:

Մեր զրույցում ԵՊԲՀ լրատվական հարցերով պատասխանատու Շուշան Դանիելյանն ասաց, որ Խաչիկ Գասպարյանը վթարի հետեւանքով ստացել է ծանր աստիճանի գլխի սալջարդ, պարանոցի ողի կոտրվածք, թոքի վնասվածք, կոնքի ոսկորի եւ ազդրի կոտրվածք: Հաշվի առնելով նրա ծայրահեղ ծանր վիճակը, դեռ վիրահատական միջամտություն չի արվել:

Դեպքի առթիվ քրեական գործ է հարուցվել ՀՀ  քրեական օրենսգրքի 242-րդ հոդվածի 2-րդ մասով (Ճանապարհային երթեւեկության կանոնները խախտելը, որն անզգուշությամբ առաջացրել է մարդու մահ) եւ ՀՀ ՔՕ 244 հոդվածով (Ճանապարհատրանսպորտային պատահարի վայրը թողնելը):

Այս մասին մեր հարցին ի պատասխան ասաց ՀՀ քննչական կոմիտեի նախագահի խորհրդական Սոնա Տռուզյանը: Ըստ նրա՝ նախնական տվյալներով լուսադեմին՝ ժամը 04:40-ի սահմաններում Աբովյան փողոցի եւ Սայաթ-Նովայի պողոտայի խաչմերուկում իրար են բախվել  «BMW X6» մակնիշի եւ «Toyota Corolla» մակնիշի ոստիկանության հաշվառման պետհամարանիշի ավտոմեքենաները, ինչի հետեւանքով «BMW X6» դուրս է եկել ճանապարհի երթեւեկելի հատվածից եւ բախվել կանաչապատ տարածքում գտնվող գովազդային վահանակին: Ավտովթարի հետեւանքով «Toyota Corolla»-ի վարորդ Արեգ Դավթյանը մահացել է, իսկ ուղեւոր Խաչիկ Գասպարյանը տեղափոխվել հիվանդանոց:

«BMW X6»-ի մեջ երեք հոգի է եղել, որոնցից մեկը՝ վարորդը դեպքի վայրից փախուստի է դիմել. երկուսը նույնպես մարմնական վնասվածքներ են ստացել, սակայն չեն հոսպիտալացվել: 

Դեռ հայտնի չէ, թե ՃՈ տեսուչները «BMW X6» մակնիշի մեքենային հետապնդելի՞ս են եղել, թե՞ ոչ: Բանն այն է, որ վիրավոր ՃՈ տեսուչի վիճակը ծայահեղ ծանր է, նա ի վիճակի չէ բացատրություն տալու:

Վթարի հետեւանքով մահացած ՃՈ տեսուչ Արեգ Դավթյանը համակարգում աշխատում էր 2013 թվականից, կոչումով ավագ լեյտենանտ էր:

Նշենք, որ քրեական հեղինակություն համարվող Ճըվճվ Արո մականունով հայտնի Արա Վարդանյանը ամիսներ առաջ է մահացել՝ գլխուղեղի իշեմիկ ինսուլտից: Նրա երկու որդիները՝ Սերժ եւ Սարգիս Վարդանյանները բազմաթիվ անգամ հայտնվել են մամուլի եւ հատկապես իրավապահների ուշադրության կենտրոնում: Երկուսն էլ բազմաթիվ վթարների մասնակից են եղել, եւ նախկինում դատապարտված:

Մասնավորապես Սարգիս Վարդանյանը նախորդ տարվա մարտի 27-ին դատապարտվել էր տուգանքի: Նա մեղավոր էր ճանաչվել ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության կատարման մեջ եւ նրա նկատմամբ պատիժ է նշանակվել տուգանք` 500.000 դրամի չափով: 2016 թվականի հունվարի 1-ին «Վեյվ» կարաոկե ակումբում Սարգիս Վարդանյանը եւ քաղաքացի Անդրանիկ Շահինյանը միմյանց հասցեին հայհոյանքներ էին հնչեցրել՝ հասարակական կարգը բռնությամբ զուգորդված կոպիտ կերպով խախտելու ուղղակի դիտավորությամբ, բղավել, միմյանց քաշքշել էին, հասցրել փոխադարձ հարվածներ` խաթարելով ակումբի բնականոն գործունեությունը:

Սերժ Վարդանյանը 2016 թվականին վարելով «BMW» մակնիշի ավտոմեքենանան եւ խախտելով ճանապարհային երթեւեկության կանոնները` չի ենթարկվել ՀՀ ՃՈ 1-ին գումարտակի 4-րդ դասակի տեսուչ Գևորգ Սարգսյանի օրինական պահանջին` «կանգ» հրահանգին եւ դիմել փախուստի` ստեղծելով վթարային իրավիճակ,  ճանապարհին հարվածելով ու վնասելով մի քանի ավտոմեքենաներ: Նա մեղավոր էր ճանաչվել ուրիշի գույքը դիտավորությամբ ոչնչացնելու համար եւ դատապարզտվել ազատազրկման 3 ամիս ժամկետով: