10 հազար դրամ ընտրակաշառք վերցրած մարդն էլ փողոց դուրս կգա. Արամ Սարգսյան

Այսօր ԱԺ հերթական նիստին լրագրողների հետ զրույցում ԵԼՔ խմբակցության պատգամավոր Արամ Սարգսյանը ասաց, որ խորհրդարանում հնարավոր չէ թանկացումների խնդիրը լուծել, քանի որ ՀՀԿ-ն մեծամասնություն է, ԵԼՔ-ը՝ փոքրամասնություն։

Լրագրողի այն հարցին թե՝ ինչո՞վ է բացատրում այն հանգամանքը, որ արտախորհրդարանական ուժերը չեն միանում ԵԼՔ-ի երթին, Արամ Սարգսյանը պատասխանեց. «Մենակ մնալու խնդիր չկա, ԵԼՔ-ը բացարձակ խնդիր չի դրել, որեւէ ուժի հրավիրելու, եւ ԵԼՔ-ն իր 9 պատգամավորով ԱԺ-ում անում է այն հնարավորը, ինչի համար ինքն աշխատավարձ է ստանում, եւ ինչի համար 120 հազար մարդ ձայն է տվել։ Մենք այստեղ աշխատում ենք օրնիբուն բացակա չենք ունենում, մեր տեսակետներն ասում ենք, անկախ նրանից, իշխանությանը կամ արտախորհրդարանական ուժերին դո՞ւր է գալիս դա, թե՞ չէ։ Խորհրդարանում այդ խնդիրը չենք կարողանում լուծել, քանի որ իշխանությունը հստակ ասում է, դուք 9 հոգի եք, մենք մեծամասնություն ենք, հանրությունը քվե է տվել մեզ, եւ հետեւաբար, հանրությունը վստահել է մեզ, մենք էլ այս օրենքը բերել ենք լավ ենք արել, մենք իրավունք ունենք այս օրենքը բերելու՝ թանկացումների հարկային օրենսգիրքը»։

Նա նաեւ նշեց. «Մենք ասում ենք՝ ժողովուրդ ջան, եթե դու չես կիսում այդ մոտեցումը, դա կարող է լինել իմ ընտրողը կամ այլ մարդ, մեր ընտրության հարցը չի, ԵԼՔ-ին քվե տալու հարցը չի, մենք ասում ենք՝ եթե համարում եք, որ այս թանկացումները ի վնաս ձեզ են, ամսի 19-ին դուրս եկեք փողոց, որ մենք կարողանանք ասել, որ բացի այդ 9 պատգամավորից, ունենք նաեւ հանրային աջակցություն»։ 

Ըստ Արամ Սարգսյանի, իրենց կոչը ոչ թե արտախորհրդարանական ուժերին է վերաբերվում, այլ Հայաստանի Հանրապետության հասարակությանը, որը կարող է ԵԼՔ-ի ընտրողն էլ լինել, իշխանության ընտրողն էլ լինել, 10 հազար դրամ վերցրած ընտրողն էլ լինել։ Մենք մի քանի հարց ուղղեցինք Արամ Սարգսյանին. 

- Պարոն Սարգսյան, արդյո՞ք 10 հազար դրամ վերցրած մարդը դուրս կգա փողոց։

- Իհարկե՝ կգա, 10 հազար դրամ վերցրածը փողոց չի գա ընտրությունից հետո, որովհետեւ վերցրել է փողը, ընտրել է, բայց ինքը նաեւ այսօր հասկանում է, որ այդ 10 հազար դրամն այս գների թանկացումներով իրենից տասնապատիկ հանում են: Եթե մարդը ընտրությունների ժամանակ 10 հազար դրամ է վերցրել, դա չի նշանակում, որ 5 տարի պետք է խելոք նստի, ինքն իրավունք ունի իր տեսակետը փոխել, եւ ասել՝ իշխանություն, դու ինձ խաբեցիր, իշխանություն դու այս բաները խոստացար, չարեցիր, եւ վերջիվերջո դու էդ 10 հազար դրամը, որ տվել ես, հիմա ինձնից 30 ես ստանում։

- Կան արդյո՞ք ՀՀԿ-ում այնպիսի մարդիկ, որոնք թե՛ Հայաստանում, թե՛ սփյուռքում այնպիսի հեղինակություն ունեն, որ կարողանան ՀՀ նոր նախագահ դառնալ։

- ՀՀ նախագահի թեկնածուն կարող է լինել ոչ կուսակցական: Ինչ վերաբերվում է քաղաքական քննարկումներում ԵԼՔ դաշինքի քվեին, նման բան հնարավոր չէ, որովհետեւ նույն Հանրապետականը կարող էր չէ՞ ստորագրել, որ մեր թեկնածուն մասնակցեր: Իր թեկնածությունը դներ Արտակ Զեյնալյանը, ով նախագահի  համար թվարկված բոլոր արժանիքներին համապատասխանում էր, թե՛ իր անցած ուղով, թե՛ իր գիտելիքով, թե՛ իր տարիքով ամբողջությամբ համապատասխանում էր, թող Արտակ Զեյնալյանն էլ մասնակցեր: Իրենք ստորագրեին, ասեին՝ մենք ստորագրում ենք, որ մրցակցություն լինի, որ Կոմունիստական կուսակցության նման մի թեկնածու չլինի ու բոլորով դրան կողմ քվեարկեն: Ես չեմ հասկանում կոմունիստական կարոտախտի՞ն են մնացել իրենք։ Իմ համար նախագահի ամենահարմար թեկնածուն Արտակ Զեյնալյանն է, գուցե ես սուբյեկտիվ եմ, Արտակ Զեյնալյանն իմ ընկերն է, բայց իմ համար այդ չափանիշներին ամբողջությամբ համապատասխանում է Արտակ Զեյնալյանը։ Մենք իրենց բերած ցանկացած թեկնածուին կողմ չենք քվեարկելու։

- Այսօր մամուլում տեղեկություն տարածվեց, որ որպես նախագահի թեկնածու Վազգեն Մանուկյանի հարցն է քննարկվում:

- Ով քննարկում է, իրեն հարցրեք։                                                                                                           Նիկոլայ Ավետիսյան