Պոկված տանիքներ, տապալված ծառեր. ողջ Հայաստանում հաշվում են երեկվա փոթորկի հետեւանքները

Նախօրեին ԱԻՆ օդերեւութաբանական ծառայությունը զգուշացրել էր Հայաստանի ողջ տարածքում սպասվող ուժգին քամիների մասին: Համաձայն Աին հաղորդագրության, մարտի 24-ին կեսօրից մինչև մարտի 25-ի կեսօր հանրապետության տարածքում սպասվում էին վտանգավոր ուժգնության քամիներ։

Շիրակում, Լոռիում, Տավուշում, Գեղարքունիքում, Սյունիքում և Արցախում քամու պոռթկումները հասան 30-35 մ/վրկ, Կոտայքում, Արմավիրում, Արագածոտնում, Արարատում, Վայոց Ձորում եւ Երևանում՝ 20-25 մ/վրկ, որի արդյունքում կոտրվեցին ծառեր, ծառի ճյուղեր, պոկվեցին տանիքներ, տանիքների առանձին հատվածներ,  էլեկտրոհաղորդման գծեր եւ այլն:

Ամենաուժգին քամիները ՀՀ մարզերի մեջ գրանցվեցին Լոռու մարզում,  Տաշիրի եւ Ստեփանավանի տարածաշրջաններում՝ 30 եւ 35 մ/վ: Այնտեղ փրկարարները չէին հասցնում արձագանքել ամեն րոպե գրանցվող կանչերին, աշխատում էին արտակարգ ռեժիմով:

Փոթորկի վնասներից զերծ չմնաց նաեւ մայրաքաղաքը: ԱԻՆ հասարակայնության հետ կապի եւ լրատվութան վարչության փոխանցմամբ, Երեւանում ժամը 15:54-ին ահազանգ էր ստացվել, որ Երևան քաղաքի Մարգարյան 2-րդ նրբանցքի թիվ 1 շենքի տանիքի թիթեղը պոկվել եւ կախվել էր, առկա է ընկնելու վտանգ, նույն ահազանգն էր հնչել նաեւ 15:53-ին, Երևան քաղաքի Բաշինջաղյան փողոցի թիվ 188 շենքի տանիքի պոկման մասին:

16:54-ին ահազանգ էր ստացվել, որ Երևան քաղաքի Մաշտոցի պողոտայի թիվ 10 շենքի տանիքի թիթեղը թուլացել և ճոճվում է, 17:49-ին  ահազանգով՝ Երևան քաղաքի Մամիկոնյանց փողոցի թիվ 39ա շենքի տանիքը ուժեղ քամուց թուլացել կախվել էր, ժամը 18:12-ի ահազանգով՝  ուժեղ քամու հետևանքով Մաշտոցի պողոտայի թիվ 18 շենքի տանիքի թիթեղները ճոճվում են, առկա էր ընկնելու վտանգ, ժամը 18:24-ին ահազանգ էր ստացվել, որ Երեւանի 1-ին փողոցի 1-ին նրբանցքի տներից մեկի տանիքն ուժեղ քամուց պոկվել է, 18:50-ին ահազանգ էր ստացվել, որ  Սարյան փողոցի թիվ 27 շենքի տանիքի թիթեղը պոկվել կախվել է,18:57-ին ահազանգով՝ Դրոյի փողոցի թիվ 14/1 շենքի մոտակայքում գտնվող ավտոտնակների տանիքները ուժեղ քամուց մասամբ պոկվել են, 19:26-ին՝ Միկոյան փողոցի թիվ 13 շենքի տանիքի սալիկները թուլացել են, 19:24-ին՝ Դավիթաշեն 2-րդ թաղամասի թիվ 17 շենքի տանիքի թիթեղը թուլացել կախվել է, 18:06-ին՝  Պուշկինի փողոցի թիվ 72 շենքի տանիքի թիթեղյա ծածկը ուժեղ քամուց թուլացել է, 18:24-ին՝  Ա. Բաբաջանյան փողոցի թիվ 59 շենքի տանիքի թիթեղները թուլացել և կախվել են, 18:20-ին՝  Շինարարների փողոցի թիվ 10 շենքի տանիքի թիթեղը ուժեղ քամուց թուլացել է, 23:25-ին՝ ուժեղ քամու հետևանքով վնասվել է Մինաս Ավետիսյան փողոցի թիվ 49/1 տան տանիքի մետաղյա թիթեղը: Սրանք միայն գրանցված զանգերն էին, մյուս վնասները չեզոքացվել են տեղում՝ բնակիչների կամ այլ միջամտությամբ:

Երեւանում ծառեր են տապալվել Մամիկոնյանց փողոցում՝ Արաբկիր ԲԿ-ի մոտակայքում, այստեղ ծառն ընկել էր մ,եքենաների վրա, Մամիկոնյանց փողոցում՝ Ա. Բաբլոյանի Արաբկիր ԲԿ-ի մոտակայքում, ծառն ընկել էր ճանապարհի վրա,  Մ-4 ավտոճանապարհի Երևան-Սևան հատվածի 37-րդ կմ-ի հատվածում քամու հետևանքով բարդու ծառն ընկել էր՝ փակելով ճանապարհի երթևեկելի հատվածը:

Գյումրիում քամին շենքերի տանիքներն է պոկել, շատ ծառեր է գետին տապալել: 9-11 ծառայությունն  աշխատել է գերծանրաբեռնված: Ի թիվս տասնյակ շենքերի, պոկվել են նաեւ ՇՄ ընդհանուր իրավասության դատարանի  տանիքի թիթեղները: Քամին պոկել է նաեւ «Շիրակ»  օդանավակայանի ժամանման սպասասրահի տանիքը:

Արարատի մարզում այսօր, ժամը 09:16-ին տեղեկություն է ստացվելն, որ երեկ՝ մարտի 24-ին ժամը 16:00-ի սահմաններում մարզային ոստիկանության շենքի մոտակայքում ծառը կոտրվել և կախվել է, երեկ քամին Արարատում նաեւ տների ու շենքերի տանիքներ էր պոկել:

 Գեղարքունիքի մարզի Աստղաձոր գյուղում քամուց վնասվել է տան տանիք, Տավուշի մարզի Դիլիջան քաղաքի Կալինինի 62ա շենքի գեղարվեստի դպրոցի տանիքը քամին քշել է, Գեղարքունիքի մարզի Գավառ քաղաքի Ազատության փողոցի թիվ 35 շենքի տանիքը մասամբ պոկվել է,  Շիրակի մարզի Գյումրի քաղաքի Մ. Մկրտչյան փողոցի թիվ 44 շենքի տանիքը քամին քշել պոկել է:

Լոռիում, Վանաձորի Բազում կարի ֆաբրիկայի 1 100 քառակուսի մետր տանիքն ու շպրտել մի քանի հարյուր մետր: Խնձորուտ թաղամասի N19 տան ավելի քան 220 քմ մակերեսով տանիքը քամին տեղաշարժել է ավելի քան 4 մետր,Քամին տանիքներ է քշել նաեւ Արեւաշող համայնքում, որն ընկել է կայանված Վազ 21-07 մակնիշի ավտոմեքենայի վրա: Սպիտակում քամին պոկել է ԱԿԲԱ բանկի տանիքն ու գցել կայանված Վազ-21-06  մակնիշի ավտոմեքենայի վրա: Ծաթեր գյուղում քամին վնասել է 9 սեփական տների տանիքներ: Սարահարթ գյուղում եւս բնակարաններ են վնասվել: Բազում գյուղում քամին պոկել է ավտոտնակի դարպասն ու գցել մեքենայի վրա: Ալավերդի քաղաքում քամու հետեւանքով վնասվել են բազմաբնակարան շենքերի տանիքներ: Մետաղյա թիթեղներն ընկել են հոսանքալարերի վրա, ինչի արդյունքում նաեւ հրդեհ է բռնկվել չբնակեցված տնակներից մեկում:

Եւ սա դեռ ամբողջական պատկերը չէ: Մարզերից մի քանիսում հոսանքազրկվել են քաղաքային ու գյուղական համայնքներ:

Այսօր, կեսօրից մի փոքր անց արդեն քամիները ՀՀ տարածքում նահանջել են: