ՌԴ ռազմական ոստիկանություն տեղակայելու հարցի քննարկումները սկսել են վերջերս. ՀՀ ՊՆ

Հայաստանում ռուսական ռազմական ոստիկանության ստորաբաժանում տեղակայելու մասին այժմ քննարկուներ են ընթանում: Քնարկումները սկսել են վերջերս՝ դեռեւս այս նորության` լրահոսում հայտնվելուց առաջ: Այս մասին «Հայկական ժամանակ»-ի հետ զրույցում ասաց ՊՆ մամուլի խոսնակ Արծրուն Հովհաննիսյանը:

Չնայած այս հայտարարությանը՝ ՀՀ նախկին ոստիկանապետ, ԱԺ պաշտպանության եւ անվտանգության հարցերի մշտական հանձնաժողովի անդամ Ալիկ Սարգսյանն այսօր հայտնել է, որ հանձնաժողովը դեռ չի քննարկել հարցը, բայց ստորաբաժանումը մարտի 15-ից արդեն «ոնց որ թե գործում է»:

Սակայն 1997 թվականին ՀՀ եւ ՌԴ միջև ՀՀ տարածքում ռուսաստանյան ռազմաբազայի գտնվելու հետ կապված գործերով իրավասության եւ փոխադարձ իրավական օգնության հարցերի վերաբերյալ համաձայնագրով, որը կնքվել է 1995 թվականին ստորագրված պայմանագրի հիման վրա, Հայաստանում ռուսական ռազմական բազայում ռուսական ռազմական ոստիկանության տեղակայման մասին որեւէ բառ գրված չէ:

Ըստ Ռուսաստանի Դաշնության Զինված ուժերի հարավային ռազմական շրջանի շտաբի՝ մարտի 36-ին տարածած հաղորդագրության՝ Հայաստանում ռազմական ոստիկանության տեղակայվելիք ստորաբաժանման նպատակը Գյումրիում ՌԴ ռազմաբազայում կարգուկանոնի պահպանության բարձրացումն է: Ռազմական փորձագետ Հրանտ Մելիք-Շահնազարյանն այս քայլը բացարձակ նորմալ է գնահատում:

Վերջինս «Հայկական ժամանակ»-ի հետ զրույցում ասաց, որ, իր կարծիքով, Հայաստանում ռուսական ռազմական ոստիկանության տեղակայումը կապված չէ ՌԴ-ի՝ Հայասանում իր ներկայության ուժեղացման հետ.

«Ես չեմ կարծում, թե Ռուսաստանին ավելի մեծ ներկայություն է անհրաժեշտ Հայաստանում, քան ինքն այսօր ունի: Որովհետեւ, եթե նայենք, եւ՛ ռազմական բազան, որը բավականին մեծ է ու շատ լավ սպառազինված, եւ՛ ռուսական կապիտալը, եւ՛ մեր հարաբերությունները Ռուսաստանի հետ՝ կապված համատեղ ինտեգրացիոն ծրագրերի, անվտանգության հետ, թույլ են տալիս ենթադրել, որ ավելի ուժեղ ներկայություն ունենալու մասով խոսակցություններն աննպատակային են»,-ազաց ռազմական փորձագետը:

Նա եւս նշեց, որ ռազմական ոստիկանության ստորաբաժանման տեղակայումը ռազմաբազայի հետ կապված ինչ-որ դեպքերի, միջադեպերի ժամանակ եւ ընդհանրապես կարգ ու կանոն հաստատելու նպատակով է.

«Ամեն դեպքում ռազմական ոստիկանությունն անկախ կառույց է՝ իհարկե ռազմական ուղղվածության, բայց այն նաեւ իրավական կառույց է, եւ արդյունավետության ապահովան համար համագործակցելու է Հայաստանի իրավական կառույցների հետ»,-հավելեց Մելիք-Շահնազարյանը:  

Մեր դիտարկմանը՝ կարծիքներ են շրջանառվում, թե ռազմական ոստիկանության ստորաբաժանման տեղակայումը կապված է արցախա-ադրբեջանական հակամարտ գոտում հնարավոր սրացումների հետ, որքանո՞վ է սա իրատեսական, Հրանտ Մելիք-Շահնազարյանն ասաց.

«Այդ կարծիքների մեջ իրականում տրամաբանություն չեմ տեսնում: Ես վստահ եմ որ ՀՀ տարածքում որեւէ կառույց, լինի դա Ռազմական ոսիկանություն, թե ինչ, ինքը չի կարող խոչընդոտել Հայաստանի իշխանությունների ինքնուրույն եւ ազատ որոշումներ կայացնելու գործընթացին: Սրանից ավելի՝ վստահ եմ, որ Հայաստանի իշխանությունները երբեւէ չեն գնա մի ճանապարհով, որը սպառնալիք է պարունակում իր մեջ մեր պետության համար: Անվտանգությունը մեզ համար ավելի մեծ նշանակություն ունի, քան Ռուսաստանի հետ համագործակցությունը»,-եզրափակեց ռազմական փորձագետը:

Հիշեցնենք՝ Հայատանւմ ռուսական ռազմաբազա տեղակայելու վերաբերյալ պայմանագիրը կնքվել է 1995 թվականին, որը երկարագվեց 2010 թվականի օգոստոսին: Իսկ ՌԴ ռազմական ոստիկանությունը ստեղծվել է ավելի ուշ: Հետեւաբար, Գյումրիում տեղակայված ռուսական 102-րդ ռազմաբազայի տարածքում ռազմական ոստիկանություն տեղակայելու համար առնվազն պետք է պայմանագրում որոշակի փոփոխություններ կատարվեն, որի շուրջ էլ, ըստ աենայնի, ընթանում են քննարկումները:

ՀայԱրփի Բաղդասարյան