Որդիս չի ենթարկվել բռնության, նա շատ գոհ էր. թուրք սահմանահատի հայրը Հայաստանում է

«Ermenihaber.am» երկլեզու կայքը գրում է.

«Հուլիսի 24-ին հայ-թուրքական սահմանը հատած եւ Հայաստանում կալանավորված 16-ամյա Ումութ Ալի Օզմենի հայրը՝ Մուստաֆա Օզմենը, նախօրեին ժամանել է Երեւան՝ որդուն տանելու: Մուստաֆա Օզմենը ավելի վաղ հայտնել էր, որ իրեն տեղեկացրել են, թե որդուն մոտ օրերս ազատ են արձակելու:

Ումութ Ալի Օզմենը դեպքի ուշագրավ է նրանով, որ վերջին տարիների ընթացքում հայ-թուրքական սահմանի խախտման դեպքերից թուրքական մամուլի կողմից ամենաշատն է ուշադրության արժանացել: Օզմենի կալանավորմանը անդրադարձան թուրքական գրեթե բոլոր առաջատար լրատվամիջոցները: Որոշները նույնիսկ լուրեր տարածեցին, թե Ումութ Ալիի ազատ արձակման գործին միջամտել է նախագահ Ռեջեփ Թայիփ Էրդողանը՝ զանգահարելով ՀՀ վարչապետ Նիկոլ Փաշինյանին: Հայկական կողմն ավելի ուշ հերքեց այս տեղեկությունը: Հետեւելով թուրք սահմանախախտի գործով բոլոր զարգացումներին՝ «Ermenihaber»-ը հարցազրույց է անցկացրել սահմանախախտի՝ Երեւանում գտնվող հոր հետ:

- Պարոն Մուստաֆա, Ձեր որդին հատել էր հայ-թուրքական պետական սահմանը եւ հայտնվել Հայաստանում: Այս առնչությամբ ի՞նչ կարող եք ասել. ո՞րն է եղել նրա նպատակը:

- Երբ Ումութը փոքր երեխա էր, իրեն մեզ հետ յայլա (արոտավայր) էինք տանում, որը գտնվում էր սահմանին շատ մոտ: Այնտեղ մի բլուր կա, որի մյուս կողմում Հայաստանի սահմանն էր: Փոքր ժամանակ Ումութը տարբեր լեգենդներ էր լսել այն մասին, թե ինչեր կան այդ բլրի հետեւում եւ իր մոտ հետաքրքրություն էր առաջացել դեռ այն ժամանակվանից: Այս տարի, երբ երկար ընդմիջումից հետո Ումութը նորից յայլա եկավ, մորն ասել էր, որ գնում է թեյի համար խոտաբույս հավաքելու ու գնացել էր բլրի ուղղությամբ: Բլրի վրա անասուններ են եղել եւ Ումութը գնացել է՝ նրանց հետ բերելու: Անասուններին բերելուց հետո իր հետաքրքրասիրությունից դրդված որոշել է անցնել բլրի մյուս կողմն ու գալ Հայաստան: Միամիտ, պարզ ու հետաքրքրասեր երեխա է: Նա գիտակցել է, որ դեպի սահման է գնում, սահման է անցնելու, բայց չի գիտակցել, որ դա հանցանք է:

- Իսկ Հայաստանում գտնվելու ընթացքում Ձեր որդին գո՞հ է եղել իր նկատմամբ դրսեւորված վերաբերմունքից:

- Երբ առաջին անգամ եկա նրան տեսակցության, նա շատ գոհ էր: Իրեն շատ լավ են վերաբերվել: Ես էլ զգացի այդ ջերմությունը, հոգատարությունը: Հետագայում մանկական գաղութում փոքր միջադեպ էր տեղի ունեցել հերթապահներից մեկի հետ, որը լեզուն չհասկանալու հետեւանք էր: Դրան կարեւորություն չեմ տալիս, այդ միջավայրում հնարավոր են նման բաներ: Բայց որդիս չի ենթարկվել բռնության իր ազգային պատկանելիության եւ ինքնության համար: Ընդհակառակը՝ ելնելով իր ինքնությունից այստեղ ավելի ուշադիր վերաբերմունք են ցուցաբերել նրա նկատմամբ:

- Իսկ ի՞նչ կասեք այն խոսակցությունների եւ պնդումների մասին, որ իբր Թուրքիայի նախագահ Ռեջեփ Թայիփ Էրդողանը զանգահարել է Հայաստանի վարչապետ Նիկոլ Փաշինյանին՝ միջնորդելով, որ ազատ արձակեն Ձեր որդուն: 

- Անկեղծ ասած՝ այդ մասին ես իմացել եմ լրատվական կայքերից: Ինքս տեղյակ չեմ, թե դա որքանով է հավաստի: Եթե մեր հարգարժան նախագահը զանգահարել է՝ շատ շնորհակալ եմ, եթե չի զանգահարել՝ նորից շնորհակալ եմ: Շնորհակալ եմ նաեւ Հայաստանի վարչապետին եւ ամբողջ ղեկավարությանը:

- Արդեն 2-րդ անգամ եք գալիս Հայաստան: Այս անգամ Ձեր գալու նպատակը ո՞րն է: Տեսակցությա՞ն համար եք եկել, թե՞ այլ զարգացումներ կան:

- Ինձ զանգահարեցին եւ ասացին, որ որդուս ազատ են արձակելու: Խնդրեցին՝ գամ որդուս ետեւից, որ իրեն տուն տանեմ: Այսօր քննիչի հետ խոսեցինք: Ասաց՝ իրենք պարզել են, որ որդիս որեւէ հետին նպատակ չի ունեցել, հետախուզման մեջ չի եղել, ահաբեկչական կառույցների չի անդամակցել: Այնուամենայնիվ, նա սահման էր հատել, այսինքն՝ հանցանք էր գործել եւ անհրաժեշտ էր օրինական ճանապարհով, նախատեսված ընթացակարգով պարզել հանգամանքները: Քննիչը հայտնեց, որ այդ ամենը հաշվի առնելով՝ նրանք պատրաստվում են գործը կարճել եւ որդուս ազատ արձակել: Կինս եւ ես այլեւս չէինք դիմանում: Ամեն օր տեսնում էինք, թե ուրիշ երեխաներ ինչպես են դպրոց գնում, իսկ մեր երեխան չկար, հեռու էր մեզնից: Մայրն ամեն օր արտասվում էր: Այս մարդկային վերաբերմունքի համար նորից ուզում եմ շնորհակալություն հայտնել Հայաստանի պաշտոնյաներին, ղեկավարությանը եւ ժողովրդին: Մենք մշակույթներով մոտ ժողովուրդներ ենք, երբ փողոցում նայում եմ մարդկանց, նրանցից ոմանց շատ եմ նմանեցնում իմ այս կամ այն ազգականին: Այստեղ ինձ օտար չեմ զգում: Շատ կուզենայի, որ Ումութը երբ չափահաս դառնա, միասին ավելի նորմալ վիճակում գանք Երեւանը տեսնելու, որովհետեւ շատ գեղեցիկ քաղաք է ու մարդիկ էլ այստեղ հյուրընկալ են»,- գրել է կայքը:

Հիշեցնենք, շուրջ երկու ամիս առաջ հայ-թուրքական սահմանը հատած 16-ամյա Ումութ Ալի Օզմենիի ծնողները դիմել են ՀՀ կառավարությանը եւ երկրի ղեկավարին՝ խնդրելով հետ վերադարձնել իրենց երեխային: