Քրեական հեղինակություն Նորատուսցի Արան կրակոցների պահին ալկոհոլի ազդեցության տա՞կ է եղել. նա օգտվում է լռելու իրավունքից

Հոկտեմբերի 12-ի լույս 13-ի գիշերը հերթական կրակոցներն են հնչել Երեւանում. այս անգամ էլ կրակոցների ենթադրյալ հեղինակը քրեական հեղինակություն Նորատուսցի Արա մականունով հայտնի Արա Բանդուրյանն է՝ Նորատուսցի Ալիկի հարազատ եղբայրը: Կրակոցների հետեւանքով զոհեր եւ վիրավորներ չկան:

Դեպքը տեղի է ունեցել Հյուսիսային պողոտայում գտնվող «Հուկման» ակումբում: Ըստ ոստիկանության պաշտոնական հաղորդագրության՝ հոկտեմբերի 13-ին ոստիկանությունում տեղեկություններ են ստացվել, որ նույն օրը ժամը 2-ին Հյուսիսային պողոտայի ակումբներից մեկում Նորատուս գյուղի բնակիչ Արա Բանդուրյանը, կոպիտ կերպով խախտելով հասարակական կարգը, ակումբի աշխատակիցների եւ հաճախորդների ներկայությամբ իր մոտ եղած դեռեւս չպարզված ատրճանակով մի քանի անգամ կրակոցներ է արձակել: Ոստիկանության ծառայողների իրականացրած բացատրական աշխատանքի շնորհիվ Արա Բանդուրյանը ներկայացել է ոստիկանության Կենտրոնական բաժին:

Դեպքի առթիվ հարուցվել է քրեական գործ՝ ՀՀ Քրեական օրենսգրքի 258-րդ հոդվածի 4-րդ մասի հատկանիշներով (խուլիգանություն, որը կատարավել է զենքի գործադրմամբ, պատժվում է ազատազրկմամբ՝ չորսից յոթ տարի ժամկետով): Նույն կասկածանքով էլ Արա Բանդուրյանը ձերբակալվել է:

Իրավապահները, սակայն դեռ չեն հայտնաբերել Բանդուրյանի զենքը: Մեր տեղեկություններով, այդ օրը Բանդուրյանը ալկոհոլի ազդեցության տակ է կրակոցներ արձակել, չնայած դրան իրավապահները նրա խմածության աստիճանը չեն ստուգել:

ՀՀ քննչական կոմիտեի նախագահի խորհրդական Սոնա Տռուզյանը մեր զրույցում ասաց, որ քրեական գործը ստացվել է հոկտեմբերի 14-ին եւ վարույթ ընդունվել: Խմածության վերաբերյալ մեր հարցին ի պատասխան, Տռուզյանն ասաց, որ ձեռնարկվում են անհրաժեշտ միջոցառումներ դեպքի հանգամանքները պարզելու ուղղությամբ: Խորհրդականն ասաց նաեւ, որ առգրավվել են ակումբում գործող անվտանգության տեսախցիկների տվյալ օրվա տեսագրությունները եւ ենթարկվել զննության: Բավարար ապացույցների համակցությամբ կտրմադրվի համապատասխան որոշում:

Քրեական հեղինակության փաստաբան Կարեն Բատիկյանը մեր զրույցում նշեց, որ իր վստահորդը հոկտեմբերի 13-ի ցերեկը բժշկական կենտրոններից մեկում կաթիլային ներարկում ընդունելիս է եղել, երբ տեղեկացել է, որ ոստիկաններն իրեն են փնտրում:

- Պարոն Բատիկյան, ձեր պաշտպանյալը ընդունո՞ւմ է առաջադրված կասկածանքը, թե՝ ոչ: Ի՞նչ դիրքորոշում է հայտնել:

- Դիրքորոշում այս պահին չի հայտնել, չի ասել՝ ընդունում է կասկածանքը, թե՝ ոչ: Նա իրավունք ունի ցուցմունք չտալու, պահպանում է լռության իրավունքը:

- Նա ինքնակա՞մ է ներկայացել ոստիկանության բաժին:

- Ինքը ոչ թե ինքնակամ է ներկայացել, այլ՝ կամավոր. ինքնակամը ներկայանում է հանցագործություն կատարած մեղայականով ներկայացած անձը: Ոստիկանության աշխատակիցները գնացել են իր բնակարան, ծնողներից իրենից են հարցրել, ինքն այդ պահին բուժում է ընդունել բժշկական կենտրոններից մեկում, կարծում եմ՝ արձանագրված է, ցերեկվա ժամերի մասին է խոսքը: Դրանից հետո, երբ տեղեկացրել են, որ ոստիկաններն իրեն են փնտրում, կամավոր ներկայացել է... Էդ մարդը կամավոր եկել է, միասին մտել ենք բաժին, բարձրացել ենք քրեական հետախուզության բաժանմունք ու տեւական ժամանակ սպասել ենք ինչ-որ գործողությունների: Մեկ ժամ, ժամ ու կես սպասելուց հետո օպերատիվ աշխատողն ասաց, որ ինքնակամ ներկայանալու արձանագրություն է կազմում, այսինքն՝ իր նկատմամբ արդեն հարկադրական գործողություններ սկսեցին կատարվել: Արձանագրություն կազմելուց հետո ես հայտարարություն արեցի այն մասին, որ Արա Բանդուրյանը եկել է ոչ թե ինքնակամ, այլ՝ կամավոր՝ ձեր կանչով: Անմիջապես հետո հետաքննիչի կողմից Արա Բանդուրյանը ձերբակալվել է եւ այդ պահից արդեն տեղեկացանք կասկածանքի էության ու բովանդակության մասին, որտեղ նշվում է, որ Հյուսիսային պողոտայում տեղի է ունեցել կրակոց՝ եզրահանգումը՝ զենքի գործադրմամբ խուլիգանություն` ՀՀ ՔՕ 258-րդ հոդվածի 4-րդ մաս: Ձերբակալման նպատակը նշված էր փախուստը կանխելը, ինչի վերաբերյալ ես հայտարարություն արեցի՝ նշելով, որ իմ վստահորդը փախուստի դիմելու նախադրյալներ չի ստեղծել, կամավոր ներկայացել է:

- Պարոն Բատիկյան, դուք ասացիք՝ ինքնակամ ներկայանում է հանցագործություն կատարած անձը, ձեր ասածից ստացվում է՝ Բանդուրյանը չի՞ եղել կրակոցներ արձակած անձը:

- Այստեղ կարեւորը ձերբակալման նպատակն է:

- Տեղեկություն կա, որ Արա Բանդուրյանը ալկոհոլի ազդեցության տակ է կրակոցներ արձակել: Նրա խմածության աստիճանը ստուգե՞լ են:

- Ոչ, խմածությունը չի ստուգվել: Ես շփվել եմ իր հետ, ինքը խմած չի եղել, ճնշում ուներ, բայց հաստատ խմած չէր:

- Զենքի մասով տեղեկություն ունե՞ք իրեն է պատկանում, օրինական է, թե՞ ոչ

- Այս պահին տեղեկություն չունեմ:

- Պարոն Բատիկյան, ձերբակալման որոշումը վիճարկել ե՞ք:

- Չեմ վիճարկել, դիրքորոշում եմ ներկայացրել, որ ոչ իրավաչափ է ձերբակալությունը, քանի որ ձերբակալման նպատակը նշված սխալ է, Բանդուրյանը փախուստի չի դիմել, կամավոր ներկայացել է. կոնկրետ դատավարական հարկադրանքի միջոցները իրականացնելու համար վարույթն իրականանցող մարմինը պետք է ունենա ողջամիտ ենթադրություն, որ այս մարդն ազատ մնալով կարող է փախուստի դիմել:

Նշենք, որ Արա Բանդուրյանի ձերբակալման 72 ժամը լրանում է վաղը. վաղը կորոշվի՝ նախաքննական մարմինը նրան մեղադրանք առաջադրո՞ւմ է, թե՞ ոչ եւ ինչ խափանման միջոց է նրա նկատմամբ ընտրվելու:

ՀՀ ոստիկանությունն էլ քիչ առաջ տեսանյութ տարածեց քրեական հետախույզների ձեռք բերած ակումբը տեսագրող սարքերի ձայնագրություններից, որում երեւում էր, թե ինչպես է Բանդուրյանը երեք անգամ կրակոցներ արձակում ակումբի աշխատակիցների եւ հաճախորդների ներկայությամբ:

Արա Բանդուրյանի եղբայրը՝ քրեական հեղինակություն Նորատուսցի Ալիկը, մեկ այլ աղմկոտ քրեական գործով ամբաստանյալ է: