Վալերի Օսիպյանը՝ իր եւ Հունան Պողոսյանի լարված հարաբերությունների մասին

ՀՀ ոստիկանապետ Վալերի Օսիպյանը վստահ է, որ Նիկոլ Փաշինյանը ճիշտ որոշում է կայացրել՝ նախկին փոխոստիկանապետ Հունան Պողոսյանին նշանակելով Սյունիքի մարզպետ։ Կառավարության նիստից հետո լրագրողներն Օսիպյանից հետաքրքրվեցին, թե ինչպես է գնահատում Հունան Պողոսյանի նշանակման վերաբերյալ հնչող քննադատությունները։ «Վարչապետի որոշումը ճիշտ որոշում է, եւ կարծում եմ՝ Հունան Պողոսյանը լավ կաշխատի»,– ասաց ոստիկանապետը։

Տեղեկություններ կան, որ Օսիպյան-Պողոսյան հարաբերությունները լարված են, ՀԺ-ն Օսիպյանից հետաքրքրվեց, թե որն է պատճառը: «Իսկ ո՞վ է ասում, որ լարված է: Դրանք սուտ տեղեկություններ են, չեն համապատասխանում իրականությանը»:

Հիշեցնենք, որ Հունան Պողոսյանը երկար տարիներ եղել է ոստիկանության պետի առաջին տեղակալ։ Հեղափոխությունից հետո, երբ հրաժարական ներկայացրեց ոստիկանապետ Վլադիմիր Գասպարյանը, աշխատանքից ազատման դիմում գրեց նաեւ Հունան Պողոսյանը։ Օրեր առաջ Նիկոլ Փաշինյանի որոշմամբ՝ Պողոսյանը նշանակվեց Սյունիքի մարզպետ։ 

Հարցին՝ ինչ սկզբունքով է կառավարությունն առաջնորդվում, որ բարիկադներից այն կողմ հայտնվածին պաշտոն է առաջարկում, Օսիպյանը պատասխանեց. «Մարդ, որը ունի գիտելիքներ եւ կարող է պետությանն արժեքավոր ծառայություններ մատուցի»:

Սահման մեկնող ոստիկանները սկսել են դժգոհել այդ ծառայությունից: Վալերի Օսիպյանը ՀԺ-ի հետ զրույցում նշեց, որ դա համատարած չէ, բայց չբացառեց, որ հնարավոր է լինեն մասնավոր դեպքեր: «Մի քանի օր առաջ նրանց ճանապարհում էի դիրքեր եւ նրանք մի մարդու նման ժպիտները դեմքներին գնացին»:

Դիտարկմանը, որ նրանց դրա համար տրվում է 30 հազար դրամ հավելավճար, չի՞ կարծում, որ քիչ է, Օսիպյանն ասաց. «Կարծում եմ, որ քիչ է, բայց միայն ոստիկանության զորքերի համար քիչ չէ, չէ՞ որ այդ գումարը ստանում են նաեւ ՊՆ-ի զորքերը»,- ասաց նա:

ՀՀ ոստիկանապետ Վալերի Օսիպյանը նշեց, որ արտահերթ խորհրդարանական ընտրություններին եւս ոստիկանությունն աննախադեպ վերահսկողություն է իրականացնելու։ Հարցին՝ ի՞նչ արտահայտություն է ունենալու այդ աննախադեպ վերահսկողությունը, քրեական տարրերի ներգրավվածությունը բացառելու ուղղությամբ աշխատանքներ իրականացվելո՞ւ են, ինչին ի պատասխան Օսիպյանն ասաց. «Մենք չենք տարանջատում քրեական տարր կամ այլ տարր, օրենքի առջեւ բոլորը հավասար են, եւ ոստիկանությունը պատրաստ է գերազանց անցկացնել Ազգային ժողովի ընտրությունները, հատկապես մարզերում նոր մոտեցումներ կօգտագործենք»։

Դիտարկմանը, որ նախկինում այդպես չի եղել, դրա հետ են կապված առկա կասկածները, Օսիպյանը նշեց. «Ես չգիտեմ՝ նախկինում ոնց է եղել, ամեն դեպքում իմ պաշտոնավարման ընթացքում, այդ թվում՝ նախկինում շատ եմ արժանացել քննադատությունների, բայց թող որեւէ մեկը մի փաստող դրվագ ներկայացնի, որտեղ ես թերացել եմ»։

Օսիպյանը շեշտեց՝ գոհ է իր ղեկավարած կառույցի ամեն ծառայողի աշխատանքից եւ համոզված է՝ ոստիկանների բարեխիղճ աշխատանքի շնորհիվ էր նաեւ, որ հնարավոր եղավ ավագանու լավ ընտրությունները, ինչպես նաեւ ֆրանկոֆոնիայի գագաթնաժողովը. «Կան մի քանի մարդիկ, որոնք փորձում են ցեխ շպրտել ոստիկանության վրա եւ անուն կպցնել ոստիկանությանը, բայց ես, լինելով այս կառույցի ղեկավարը, գոհ եմ համակարգի յուրաքանչյուր ծառայողի աշխատանքից՝ այն, ինչ չէի կարող ասել մայիս–հունիս ամիսներին, բայց ներկայումս ոստիկանությունը լավ է կատարում իր առջեւ դրված խնդիրները»։

Ոստիկանապետն ընդգծում է՝ Երեւանի ավագանու վերջերս կայացած ընտրությունների ցուցակների նման գերազանց ցուցակներ երբեւիցե չեն եղել, բայց հավաստիացնում է՝ նման ցուցակներ կլինեն նաեւ ԱԺ ընտրություններում. «Որեւէ մեկը չի կարող բացասական կարծիք հայտնել ավագանու ընտրությունների ցուցակների մասին, գերազանց, նմանատիպ ցուցակներ չեն եղել եւ ԱԺ ընտրություններում եւս ունենալու ենք այդպիսի ցուցակներ»։

Դիտարկմանը, որ ոստիկանության շարքային աշխատակիցներն, ըստ էության, չեն փոխվել, այդ պարագայում ինչով է պայմանավորված ոստիկանության նախկին աշխատանքի նման պատկերը, քաղաքական հրահանգ կար արդյո՞ք, ինչին ի պատասխան ոստիկանապետն ասաց. «Ժամանակաշրջանն է ստիպել, որ մեր մոտեցումներն այլ լինեն եւ ներկայիս ստեղծված իրավիճակին ոստիկանությունն ըմբռնմամբ մոտեցավ, իմ տված հանձնարարականներն ու հրամանները կատարեցին ճիշտ եւ ժամանակին»։

Լրագրողները հետաքրքրվեցին՝ ասֆալտին փռելու գործողություններ էլի իրականացվո՞ւմ են, ինչին Օսիպյանն արձագանքեց. «Դա միշտ եղել է եւ այո, էլի կլինեն»։

Նա հավաստիացրեց՝ ամբողջությամբ տիրապետում են իրավիճակին եւ կանխարգելիչ աշխատանքներ են իրականացնում, որ հակահեղափոխական ուժերի ակտիվացումներ ու լարվածություն չառաջանա։