«Արա, դու հլը սաղ ե՞ս». մեկնարկեց HSBC բանկի զինված հարձակման, երկու անձի սպանության գործով դատական նիստը

Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Տաթեւիկ Գրիգորյանի նախագահությամբ սկսվեց HSBC բանկի «Կոմիտաս» մասնաճյուղի վրա զինված ավազակային հարձակման, երկու անձի սպանության փորձի գործով առաջին դատական նիստը: Այս գործով մեղադրվում է ՃՈ գնդապետ Դանիել Դանիելյանը:

Դեպքը տեղի է ունեցել սույն թվականի մայիսի 03-ին՝ ժամը 14:10-ի սահմաններում. ավազակային հարձակման հետեւանքով սպանվել էր բանկի անվտանգության աշխատակից, «Արմոբիլ» ՓԲԸ-ի պահնորդ Խաչատուր Գալստյանը, տարածքում ծառայություն իրականացնող ՊՊԾ ոստիկան Արա Շախբուլյանը, վիրավորվել «Արմոբիլ» ՓԲԸ-ի պահնորդ Արամ Մկրտչյանը:

Դատական նիստերի դահլիճում էին գտնվում տուժողի հարազատները: Երբ ամբաստանյալ Դանիել Դանիելյանը ոստիկանների ուղեկցությամբ բերվեց դատական նիստերի դահլիճ տուժողների հարազատները վիրավորական արտահայտություններ հնչեցրին նրա հասցեին. «Արա, հլը դու սաղ ե՞ս»,- ասաց նրանցից մեկը: Իրավիճակը չթեժացնելու համար ուղեկցող ոստիկանները մինչ նիստը սկսվելը նրան դուրս բերեցին դահլիճից: Արդեն նիստերի դահլիճում Դանիելյանը պարբերաբար ձեռքերով փակում էր դեմքը եւ դատավորի հարցերին պատասխանում ցածրաձայն:

Նիստը սկսվելուն պես նախագահող դատավորը ճշտեց Դանիելյանի ինքնությունը հաստատող տվյալները: Դանիելյանն ասաց, որ բարձրագույն կրթություն ունի, ամուսնացած է, խնամքին գտնվում են երեք երեխաներ: Նա ասաց, որ ֆիզիկապես առողջ է: Դատավորի հարցին, թե որ հասցեում եք հաշվառված, ՃՈ գնդապետն ասաց, որ չի հիշում: Դատավորի ճշտող հարցին՝ ինչո՞վ է պայմանավորված չհիշելը, ամբաստանյալը պատասխանեց, որ նարկոզ է տարել, գտնվում է հետվիրահատական շրջանում եւ որոշ տվյալներ չի հիշում:

Այնուհետեւ դատավորը պարզաբանեց նրա իրավունքներն ու պարտականությունները, ինչից հետո Դանիելյանը հայտարարեց, որ ֆինանսական միջոցներ չունենալու պատճառով հրաժարվում է իր երկու պաշտպաններից: Միաժամանակ Դանիելյանը միջնորդեց իրեն ապահովել հանրային պաշտպանով, ինչը դատարանը բավարարեց:

Հանրային պաշտպանով ապահովելու պատճառով դատական նիստը հետաձգվեց. այն տեղի կունենա նոյեմբերի 5-ին՝ ժամը 12:30-ին:

Նշենք, որ Դանիել Դանիելյանը կալանքի տակ գտնվելու ընթացքում աչքի վիրահատության է ենթարկվել. վնասազերծվելիս նա աչքի շրջանում վնասվածք էր ստացել: Գնդապետն ընդունում է, որ ավազակային հարձակում կատարել է, բայց սպանելու դիտավորություն չի ունեցել: Նա մինչ դեպքը զբաղեցրել է ՀՀ ոստիկանության «Ճանապարհային ոստիկանություն» ծառայության տեսանկարահանման միջոցով հայտնաբերված խախտումների արձանագրման կենտրոնի պետի պաշտոնը:

Հիշեցնենք, որ մայիսի 03-ին՝ ժամը 14:10-ի սահմաններում, Դանիել Դանիելյանն իր անվամբ հաշվառված «Ֆաբարմ» տեսակի կարաբինով, իր կողմից ապօրինի ձեռք բերված մարտական նռնակով եւ դանակով զինված, դիմակավորված մուտք է գործել Երեւան քաղաքի Կոմիտասի պողոտա 3 հասցեում գործող «Էյչ-Էս-Բի-Սի բանկ Հայաստան» ՓԲԸ-ի «Կոմիտաս» մասնաճյուղ, որտեղ կարաբինից կրակոց արձակելով օդում` բանկի աշխատակիցներից պահանջել է իրեն հանձնել առանձնապես խոշոր չափերով` 500.000 ԱՄՆ դոլար գումար:

Այդ ընթացքում, հանդիպելով մասնաճյուղի անվտանգության աշխատակիցների դիմադրությանը, Դանիելյանն իր մոտ գտնվող կարաբինից կրակել է իր ծառայողական պարտականություններն իրականացնող անվտանգության աշխատակից, «Արմոբիլ» ՓԲԸ-ի պահնորդ Խաչատուր Գալստյանին, այնուհետեւ դանակով հարվածել է անվտանգության մյուս աշխատակցին` «Արմոբիլ» ՓԲԸ-ի պահնորդ Արամ Մկրտչյանին, որից հետո բանկից հափշտակել է առանձնապես խոշոր չափերով տարբեր արտարժույթի գումար /79.200.000 ՀՀ դրամ, 110.000 ԱՄՆ դոլար, 39.690 եվրո, 242.240 ՌԴ ռուբլի, 7.925 անգլիական ֆունտ ստեռլինգ, 2.980 կանադական դոլար, 200 ավստրալիական դոլար եւ 700 ՄԱԷ դիրհամ/ եւ դիմել փախուստի:

Ոստիկանության աշխատակիցները հետապնդել են Դանիելյանին, որի ընթացքում վերջինս իր մոտ գտնվող կարաբինից կրակել է իր ծառայողական պարտականությունները կատարող` իրեն հետապնդող ՀՀ ոստիկանության Երեւան քաղաքի վարչության ՊՊԾ գնդի ոստիկան Արա Շախգուլյանի ուղղությամբ եւ նրան պատճառել հրազենային մարմնական վնասվածք, որի հետեւանքով վերջինս նույն օրը բժշկական կենտրոնում մահացել է:

Ոստիկանության մյուս ծառայողները, հետապնդելով Դանիելյանին, վնասազերծել էին նրան եւ բերման ենթարկել ոստիկանության բաժին, ապա ձերբակալել ու կալանավորել: