Գյումրի. քրեականի պետին կոչ ենք անում խփելու փոխարեն գործ անի, իրական մեղավորին գտնի

Շիրակի մարզի դատախազության փողոցը փակելն ու այս կերպ բողոքն արտահայտելը բռնաբարության փորձի մեջ մեղադրվող Հրաչյա Շահնազարյանի ծնողների, հարազատների ու ընկերների նախաձեռնությունն էր: Հիշեցնենք, որ  հոկտեմբերի 29-ին, Ոստիկանության Մուշի բաժին էր դիմել Գյումրու բնակիչ, ՌԴ քաղաքացի 20-ամյա Եվգենյա Դ.-ն եւ հայտնել, որ նույն օրը առավոտյան ժամը 08։30-ի սահմաններում երիտասարդ մի տղա փորձել է իրեն բռնաբարել: Այնուհետ հարուցվել էր  քրեական գործ՝ ՀՀ Քրեական օրենսգրքի 138 հոդվածի հատկանիշներով։

Այսօր քաղաքի գլխավոր փողոցը տեւական ժամանակ փակած քաղաքացիները պնդեցին, որ 28-ամյա երիտասարդը դեպքի հետ կապ չունի, եւ պահանջեցին նրան ազատ արձակել եւ հանել մեղադրանքը:«Երեխան էդ օրը մինչեւ 11:30 քնած է եղել, ո՞նց կարող ա ինքը 08:30 բռնաբարություն արած լինի: Այսինքն ժամը 7-ին բուդելնիկ էր դրել, որ եթա 08:30-ին աղջիկ բռնաբարի՞: Թող իրական մեղավորին գտնեն, կարող ա իրականում ուզեցել են էդ աղջկան բռնաբարեն, կամ էլ ինքն է կանչել, որ իրեն բռնաբարեն: Եթե նման ցանկություն ունի էդ աղջիկը, թող ում ուզում է կանչի, համենայնդեպս ,մեր երեխուց հեռու մնա »,-ասաց Հրաչյայի հորեղբոր կինը:

Եղբայրը եւս պնդեց, որ դեպքի օրն իսկապես Հրաչյան տանն է եղել, ու քնած է եղել:  «Պարոն մարզպետ, ամեն առավոտ 8:30 ես գործի կերտամ, կմտնիմ խանութ պապիռոզ կառնիմ, կնստիմ գազելս կերտամ,  ախպերս քնած էր, մենք  իրար կոխք կքնինք: Էդ օրը բդի հորս հետ էրտային ռեստորանները իրա հարսնիքի համար պայմանավորվելու»,-ասաց նա:   

Հարազատները բողոքի ակցիայի ժամանակ  իրավապահներին մեղադրեցին անգործության մեջ:  «Ոստիկանությունը մինչեւ հիմա գործողություն չի իրականացնում իրական մեղավորին գտնելու համար: Մենք ենք ընկել իրանց տեղն ապացույց ենք ման գալիս, իրանք իրանց հավեսով սենյակը նստած են: Դատական բժիշկը ստուգել ա, որ մեր երեխայի վրա ոչ մի մատնահետք չկա, ոչ մի շոր չկա, ոչինչ չի համապատասխանում էդ իրավիճակին: Թող գործ անեն, ոչ թե իրանց պրիստիժը բարձրացնելու համար մեղավորի տեղը ուրիշին բռնեն, իբր թե գործ են արել: Քրեականի պետին կոչ ենք անում մարդկանց խփելու փոխարեն հելնեն գործողություն իրականացնեն, մեղավորին գտնեն»:

Փաստաբան Էդգար Թումասյանն ասաց, որ գործով տուժող ռուս կնոջ վրա առկա են վնասվածքներ, քերծվածքներ,արյան զեղումներ: «Դրանք կան եւ նա փորձել է սուտ մատնություն կատարել իմ պաշտպանյալի նկատմամբ: Դեպքի վայրի զննություն է կատարվել, նաեւ հայտնաբերվել է այն բաժակը, որով, ըստ տուժածի, տղան իրեն ջուր է տվել»,-ասաց փաստաբանը:Երկար ժամանակ ոստիկաններին չհաջողվեց համոզել, որ ակցիայի մասնակիցները բացեն փողոցը: Նրանց միացավ նաեւ Շիրակի մարզպետ Կարեն Սարուխանյանը: Այնուհետ ցուցարարները տեղափոխվեցին ՇՄ դատախազի սենյակ՝ նույն պահանջով:ՇՄ դատախազ Կարեն Գաբրիելյանն ասաց անձին մեղադրանք առաջադրելը դեռ չի նշանակում մեղքը համարել ապացուցված: «Վերջնական որոշումը դատարանն է կայացում: Հիմա որ եկել, ճանապարհ եք փակում, ի՞նչ»,-հարցրեց ՇՄ դատախազը:Ըստ փաստաբանի, Հրաչյան ռուս կնոջ հետ հանդիպել է մեկ անգամ՝ որպես վարորդ՝ տաքսի ծառայություն իրականացնելիս: Վերջինս ընդամենը մեկ անգամ է օգտվել  տղայի տաքսի ծառայությունից: Դրանից հետո մեկ-երկու անգամ սոցցանցով գրել է, մնացել է անպատասխան: Երբ Հրաչյան իմացել է, որ ամուսնացած է կինը, էլ չի գրել: Միջնորդություն եմ ներկայացնելու, որպեսզի տուժողի եւ իմ պաշտպանյալի հեռախոսները վերծանվեն հատուկ ծրագրով, որով հնարավոր կդառնա ֆիքսել նրանց գտնվելու վայրը: Տուժողը ոստիկաններին տղայի անունը նույնիսկ չի ասել, որովհետեւ չի իմացել: Ասել է անծանոթ է տղան եւ ցույց  է տվել իր հեռախոսի մեջ եղած սոցցանցի լուսանկարը, որի հիման վրա էլ գազալցակայանից բերման է ենթարկվել տղան:

Փաստաբան Էդգար Թումասյանը նշեց, որ բացի տուժող հանդիսացող անձի ցուցմունքից, չկա ուրիշ որեվէ հանգամանք կամ գործով ձեռք բերված ապացույց, որով կհաստատվի իր պաշտպանյալ Հրաչյա Շահնազարյանի մասնակցությունը տվյալ արարքին: Նաեւ ընդգծեց, որ քննիչը թերի է աշխատել:  Փաստաբանը նաեւ տղայի հարազատների ներկայությամբ ասաց, որ գաղտնիք չէ, թե բռնաբարության կամ դրա փորձի համար քկհ-ում հայտնված մարդկանց հետ ինչպես են վերաբերվում, եւ լուրջ մտահոգություն ունի տղայի անվտանգության առումով:

«Ես անձամբ կհանձնարարեմ, որ մեկուսացված մնա, ես էդ հարցը կկարգավորեմ: Գնացեք, սպասեք նախաքննությանն ու գրավոր դիմում գրեք խափանման միջոցի փոփոխության մասով»,-ասաց դատախազը:

Ի դեպ, բողոքի ցույցին մասնակցում էր նաեւ Հրաչյայի նշանածը: Հարսանիքը նշանակված է դեկտեմբերի 8-ին: