Երկրպագուները տարիներ շարունակ ուզում էին Սրբուկին տեսնել «Եվրատեսիլում». Դավիթ Ծերունյան

«Եվրատեսիլ 2019»-ի համար Հայաստանի ներկայացուցիչ ընտրելիս Հանրային հեռուստաընկերությունը մեծ ուշադրություն է դարձրել երկրպագուների կարծիքներին: Այս մասին պատասխանելով armtimes.com-ի հարցերին՝ ասաց մրցույթի հայաստանյան պատվիրակության ղեկավարներից Դավիթ Ծերունյանը: Նա նշեց, որ նախապատվությունը Սրբուհի Սարգսյանին տալիս բազմաթիվ դրական հատկանիշների թվում կարեւորել են նաեւ այդ փաստը:

«Ստեղծագործական թիմն արտիստին ընտրելիս հաշվի է առել Սրբուկի վոկալային տվյալները, կենդանի երգելու կարողությունը, արտիստիզմը, բեմական փորձը, էներգետիկան եւ որ ամենակարեւորն է՝ «Եվրատեսիլի» երկրպագուների ցանկությունը, որոնք տարիներ շարունակ ուզում էին հենց նրան տեսնել եվրատեսիլյան բեմում: Կարծում եմ, որ ընտրության հարցում չենք սխալվել, քանի-որ արձագանքներն ավելի քան դրական են ինչպես Հայաստանից, այդպես էլ արտերկրից»,- ասաց նա:

Ի տարբերություն նախորդ 2 տարիների՝ այս անգամ մասնակիցը չորոշվեց «Դեպի եվրատեսիլ» հաղորդման շրջանակներում: Ընտրության կարգը հեռարձակող ընկերությունն իրավունք ունի սահմանելու ըստ իր հայեցողության, եւ նման որոշում է կայացրել, քանի որ հեռուստանախագիծը մեծամասշտաբ է, եւ ամիսների մեծ ծավալի աշխատանք է պահանջում այն նախապատրաստելն ու եթեր հեռարձակելը: Դրանից հետո էլ դեռ անհրաժեշտ է կենտրոնանալ միազգային բեմում ելույթին:

««Դեպի Եվրատեսիլից» հետո էլ ավելի երկար ժամանակ է պահանջվում հաղթող արտիստի երգն ու բեմադրությունը վերջնական տեսքի հասցնելու եւ «Եվրատեսիլին» հանձնելու համար: Սա, իհարկե, առաջին դեպքը չէ, որ Հանրային հեռուստաընկերությունն արտիստի ներքին ընտրություն է կատարում, ինչի արդյունքում ավելի շատ ժամանակ ենք ունենում մրցույթին լավագույնս պատրաստվելու, իսկ մեր կոմպոզիտորները՝ երգեր գրելու եւ մրցույթին ներկայացնելու համար»,- ասաց Դավիթ Ծերունյանը:

Հայաստանյան պատվիրակության ղեկավարներից Անուշիկ Տեր-Ղուկասյանը նշում է, որ թե՛ Սրբուկը, թե՛ հեռուստաընկերությունը նախապատրաստական բուռն աշխատանքների փուլում են: Հայտարարվել է երգահանների մրցույթ: Երգը չպետք է գերազանցի 3 րոպեն, հրապարակված չլինի մինչեւ 2018 թ. սեպտեմբերի 1-ը, չլինի որեւէ կազմակերպության քարոզ, արտադրանքի գովազդ, կարող է լինել ցանկացած ժանրի, խոսքերը (առկայության դեպքում)՝ հայերեն կամ անգլերեն: Խոսքերում չպետք է լինի քաղաքական ենթատեքստ, վիրավորական արտահայտություններ, ոչ պատշաճ լեզու: Երաժշտությունը կամ երգն ամբողջությամբ անհրաժեշտ է ուղարկել selection@armtv.com հասցեին՝ մինչեւ 2019 թ. հունվարի 10-ը: Նամակին կից պետք է ներկայացնել երգի (եւ խոսքերի) հեղինակային իրավունքի գրանցման փաստաթուղթը:

«Ուրախությամբ ուզում եմ հայտնել, որ եվրոպական մի շարք երկրներից արդեն երգեր ենք ստանում: Ուզում եմ այս առիթն օգտագործել, որպեսզի կոչ անեմ մեր հայրենակից երգահաններին լինել ակտիվ եւ անպայման ուղարկել իրենց երգերն այս մրցույթին»,- ասաց Անուշիկ Տեր-Ղուկասյանը:

«Եվրատեսիլին» պատրաստվելու աշխատանքները հանրայինը սկսել է «Մանկական եվրատեսիլից» անմիջապես հետո: Բոլորովին վերջերս Մինսկում մրցույթում Հայաստանը ներկայացնող 12-ամյա Լեւոնը 9-րդ տեղը զբաղեցրեց: Ըստ Անուշիկ Տեր-Ղուկասյանի՝ արդյունքը տղային չի ընկճել: Նա նշում է, որ բազմաթիվ դրական արձագանքներ է ստացել, ինչը հաջողության նշան է:

«Կարծում եմ՝ կհամաձայնեք, որ «Եվրատեսիլում» լավագույն գնահատականն արտիստին տալիս է հանդիսատեսը: Այս առումով Լեւոնն իսկապես մեծ հաջողությունների է հասել, քանի որ օնլայն քվեարկությամբ 5-րդ հորիզոնականում էր, եւ թե՛ մեր կոլեգաներից, թե՛ մրցույթի երկրպագուներից, թե՛ մյուս երկրների արտիստներից բազում դրական արձագանքներ էինք ստանում ինչպես մրցութային շաբաթվա ընթացքում, այնպես էլ դրանից հետո: Այսինքն՝ հանդիսատեսը նրան գնահատել է, իսկ եթե գնահատել է հանդիսատեսը, ապա ամեն բան ստացվել է»,- ասաց նա:

«Եվրատեսիլ 2019» անցկացվելու է Իսրայելի Թել Ավիվ քաղաքում: Այս տարի Լիսաբոնում կայացած մրցույթում իր հաղթանակով այդ իրավունք ձեռք բերեց Նետան: Կիսաեզրափակիչները կայանալու են մայիսի 14-ին եւ 16-ին, իսկ եզրափակիչը՝ մայիսի 18-ին: