«Շատ հրատապ Հայաստանում պետք է անցկացվեն ՀԱՕԿ նոր ընտրություններ». Արթուր Գեւորգյան

ՀՀ բռնցքամարտի ֆեդերացիայի եւ Հայաստանի ազգային օլիմպիական կոմիտեի հեռակա բանավեճը համացանցում շարունակվում է: ՀԲՖ նախագահ Արթուր Գեւորգյանը պատասխանում է ՀԱՕԿ գլխավոր քարտուղար Հրաչյա Ռոստոմյանին: Վերջինս ֆեյսբուքի իր էջում գրել էր, որ ՀԲՖ անդամակցությունը ՀԱՕԿ-ին սառեցվել է եւ որ ֆեդերացիան ՀՀ 2019 թ. երիտասարդական առաջնություն անցկացնելու իրավունք չունի: «Հայկական ժամանակ»-ի հետ զրույցում ֆեդերացիայի նախագահ Արթուր Գեւորգյանն այդ հայտարարությունն ապատեղեկատվություն անվանեց:

«Ես տեղեկություն չունեմ՝ Հրաչյա Ռոստոմյանը կապ ունի սպորտի, օլիմպիական կոմիտեի հետ, թե՝ ոչ, եւ շատ կասկածներ ունեմ, որ առհասարակ՝ ինչ կապ կունենան սպորտի հետ ընդհանրապես: Նրանց հայտարարությունն ապատեղեկատվություն է, դա իրականությանը չի համապատասխանում»,- ասաց նա:

Ճշտող հարցին, թե ինչպես Ռոստոմյանը կապ չունի ՀԱՕԿ-ի հետ եւ հաշվի առնելով ՀԱՕԿ նախագահ Գագիկ Ծառուկյնաի գործոնը՝ ինչպես կարող էր Ռոստոմյանը նման հայտարարություն անել, եթե ՀԱՕԿ-ի հետ կապ չունի, Գեւորգյանը հետեւյալ պատասխանը տվեց.

«Ծառուկյանը կապ ունի՞: Ինչքան գիտեմ, հիմա Ծառուկյանն էլ կապ չունի: Հարց տվեք իրենց՝ իրենք ինչքանով կապ ունեն սպորտի հետ այսուհետ»,- ասաց նա:

Գեւորգյանը պարզաբանեց, թե որն է իր այս կարծիքի պատճառը: Նա նշեց, որ ամիսներ շարունակ իրենք ՀԱՕԿ-ից չեն ստացել իրենց հարցման պատասխանը: Ասում է, որ, եթե կառույցը չի պատասխանում, նշանակում է այն չկա:

«Ամիսներ առաջ մենք նամակով դիմել ենք, այդ կառույցը գոյություն չունի, այդ կառույցը չի պատասխանում նամակներին: Քանի որ չեն պատասխանում, ոչ մի ձայն չկա շնչավոր, այդտեղից կարող ենք հետեւություն անել, որ գոյություն չունի այդպիսի կառույց»,- ասաց նա:

Գեւորգյանը նաեւ նշեց, որ ՀԱՕԿ-ը չի կարող իր ցանկությամբ ճանաչել կամ չճանաչել որեւէ ֆեդերացիա: Ասաց, որ ազգային օլիմպիական կոմիտեն պարտավոր է ճանաչել այն ֆեդերացիան, որին ճանաչում է միջազգային ֆեդերացիան՝ տվյալ դեպքում ԱԻԲԱ-ն (Բռնցքամարտի միջազգային միություն):  

«Բռնցքամարտի ֆեդերացիան առանձին կառույց է: Մենք մասնակցում ենք մեր՝ Եվրոպայի, աշխարհի առաջնություններին: Հստակ գրված է նույն ՀԱՕԿ-ի կանոնադրության մեջ, որ ՀԱՕԿ-ը պարտավոր է ճանաչել այն ֆեդերացիային, որին ճանաչում է միջազգային կառույցը: Իրենք իրենց քմահաճույքով չէ, որ գիտեք՝ այս ֆեդերացիան կճանաչենք, մյուսին չենք ճանաչի: Իրենք պարտավոր են աշխատել եւ պարտավոր են ընդունել միայն այն ֆեդերացիային, որին ճանաչում է միջազգային կառույցը»,- ասաց նա:

Գեւորգյանը կարծում է ՀԱՕԿ-ը լուրջ թարմացման կարիք ունի: Նրա խոսքերով՝ տարիներ շարունակ հայկական սպորտն ապականվել ու իջեցվել է: Ընդգծում է, որ շտապ ՀԱՕԿ նոր ընտրություններ պետք է անցկացվեն:

«Կարծում եմ՝ շատ հրատապ Հայաստանում պետք է անցկացվեն ՀԱՕԿ նոր ընտրություններ, որպեսզի այդ կառույցն առողջանա եւ սկսի գործել: Հասկանում եմ, որ երկրի գլուխը խառն է, բայց ոչ պակաս կարեւոր է երկրում սպորտը, սպորտը միջոց է, որ աշխարհը ճանաչի մեր երկիրը, եւ բավականին հաջող ենք բոլոր մարզաձեւերով մեզ ներկայացրել ամբողջ պամության ընթացքում: Կարծում եմ՝ պետք է հրատապ լուծում տալ»,- ասաց նա:

Գեւորգյանը նշեց, որ բռնցքամարտի ֆեդերացիան մինչեւ այսօր պաշտոնական ոչ մի բողոք չի ստացել կապված ֆեդերացիայի նախագահի ընտրությունների հետ, որոնց պատճառով այս աղմուկն առաջացել է: Նա նաեւ նշեց, որ անկախ ամեն ինչից, իրենք շարունակում են իրենց գործունեությունը, եւ մարզիկները կմասնակցեն միջազգային՝ այդ թվում վարկանիշային մրցումներին:

«Իհարկե կարող ենք (խմբ. մասնակցել վարկանիշային մրցումների): Առանց մեզ ոչ մեկ չի կարող հայտ ներկայացնել՝ ոչ մի մրցաշարի մասնակցելու: Աշխարհի, Եվրոպայի առաջնություններին որպես պետություն ճանաչում են տվյալ երկրի ֆեդերացիային, եւ առանց ֆեդերացիայի ոչ մի մարզիկ չի կարող գնալ մասնակցել: Օլիմպիական կոմիտեի մասնակցությունը այլ է. 4 տարին մեկ նա արդեն ֆեդերացիաներով վարկանիշ ձեռք բերած մարզիկներին ուղեկցում է դեպի օլիմպիական խաղեր»,- ասաց նա:

Նա նաեւ վստահեցրեց, որ ՀՀ բռնցքամարտի երիտասարդների 2019 թ. առաջնությունը կայանալու է: Ասաց, որ մրցաշարին նախորդել է ուսումնամարզական հավաք, որ մրցաշարի մասնակիցները շատ են, ոգեւորությունն էլ մեծ է: Գեւորգյանը միայն դժգոհություն հայտնեց Վլադիմիր Ենգիբարյանի անվան մարզադպրոցի տնօրենից, որը զանգել եւ հրաժարվել է մասնակցությունից:

«Սա հանցավոր մոտեցում է, պետական աշխատավարձ ստացող մարզադպրոցի տնօրենը կամայական որոշումներ է ընդունում՝ վտանգելով մարզիկի ապագան՝ առանց ունենալու իր վերադասի՝ նախարարության հավանությունը»,- ասաց նա ավելացնելով, որ տնօրենն իրավունք չունի իր անձնական ամբիցիաների համար օգտագործելու մարզադպրոցը:

ՀՀ բռնցքամարտի ֆեդերացիայի շուրջ այս սկանդալն առաջացել է նախագահի ընտրություններից հետո: 2018 թ. օգոստոսի 2-ին Գեւորգյանը, որը միակ թեկնածուն էր, վերընտրվեց: Դրանից հետո բռնցքամարտի մի շարք ներկայացուցիչներ ոտքի կանգնեցին, դիմեցին ՀԱՕԿ նախագահ Գագիկ Ծառուկյանին, ՀՀ սպորտի եւ երիտասարդության հարցերի այն ժամանակվա նախարար Լեւոն Վահրադյանին: Ըստ նրանց՝ ընտրություններն անցել էին խախտումներով: Այդ ժամանակվանից ՀԱՕԿ-ի ու ֆեդերացիայի միջեւ մամուլի ու սոցցանցերի միջոցով հեռակա բանավեճեր են ընթանում կամ էլ 2 կողմերի ներկայացուցիչները հանդես են գալիս բողոքի ակցիաներով: