Կխնդրեմ ԱԱԾ-ին ասեք՝ ինչու է Analitik-ը իր անունից սուտ բաներ տարածում. ՊՎԾ վարչության պետ Դավիթ Ադյան

Երեկ գիշերվանից մամուլում տեղեկություներն էին շրջանառվում, որ Ազգային անվտանգության ծառայությունը ձերբակալել է Պետական վերահսկողական ծառայության մի քանի աշխատակիցների։ Ոչ ԱԱԾ-ն եւ ոչ էլ ՊՎԾ-ն ավելի քան տասը ժամ այս տեղեկությունները հաստատող կամ հերքող որեւէ մեկնաբանություն չէին տալիս։ Ապա, միայն օրվա երկրորդ կեսին, ձերբակալված համարվող աշխատակիցներից մեկը՝ Դավիթ Ադյանը, Երեւանի պետական համալսարանի դիմաց իրականացվող բողոքի ակցիայի ժամանակ բարձրացավ հարթակ, ասաց, որ ինքը ձերբակալված չէ ու հեռացավ։ Արդեն ժամեր անց ՊՎԾ ֆեյսբուքյան էջում հրապարակում արեց՝ գրելով, որ ծառայության աշխատակիցների մասին տարածվող տեղեկատվությունը խեղաթյուրված է, իսկ մանրամասներին կանդրադառնան ավելի ուշ։ ԱԱԾ-ից էլ հայտնեցին, որ թեմայի առնչությամբ հայտարարությամբ հանդես կգան։

«Հայկական ժամանակ»-ը զրուցել է ՊՎԾ սոցիալական ոլորտի վերահսկողության վարչության պետ Դավիթ Ադյանի հետ, որի անունը եւս շրջանառվում էր ձերբակալված համարվողների ցանկում։ Ի դեպ՝ Ադյանը Երեւանի պետական համալսարանում ՊՎԾ կողմից ստուգումներ իրականացնող հանձնաժողովի նախագահն է։

- Պարոն Ադյան, դուք ՊՎԾ աշխատակիցների ձերբակալությունների մասին լուրերին միայն ժամեր անց արձագանքեցիք՝ ասելով, որ ձերբակալված չեք։ Հայտարարության պահին, իհարկե, ձերբակալված չեք, իսկ դրանից առա՞ջ։

- Ոչ, ես ձերբակալված չեմ եւ իմ կյանքում երբեւիցե ձերբակալված չեմ եղել։

- Իսկ ճի՞շտ են տեղեկությունները, որ ձեզ հարցաքննել են ԱԱԾ-ում։

- Ինձ ոչ էլ հարցաքննել են։

- Դուք ֆեյսբուքում, որքանով նկատել եմ, բավական ակտիվ եք, սակայն սկզբում այս լուրերը հերքող որեւէ գրառում չարեցիք, ինչի՞ն էիք սպասում։

- Գիտեք, ֆեյսբուքում ընդհանրապես ակտիվ չեմ, միայն երեւի լայքեր եմ անում հարազատներիս, ուրիշ ակտիվություն չունեմ։ Եւ ամեն չգիտեմ ինչ մակարդակի հայտարարություններին չեմ ուզում անընդհատ անդրադառնալ։ Միայն, երբ բանը բանից անցավ, նաեւ իմ շահերը պաշտպանելու համար ես այսօր գրեցի եւ հայտարարեցի այդ մասին։

- Կառույցի մի քանի աշխատակիցների մասին նման տեղեկություններ են շրջանառվում, ԱԱԾ-ից ասում են, որ դեռ հայտարարությամբ հադնես կգան, բայց Պետական վերահսկողական ծառայությունը տասը ժամից ավելի պաշտոնական որեւէ հայտարարություն չարեց այս մասին։ Տարօրինակ չէ՞ արդյոք նման գործելաոճը։

- Ես կառույցի մասով ոչինչ չեմ կարող ասել, բայց հայտարարեցին, որ լուրերը խեղաթյուրված են եւ լրացուցիչ մեկնաբանություն կտրվի։ Եւ ինձ թվում է՝ պարզաբանումներ կլինեն նաեւ մյուս անձանց մասին։

- Պարոն Ադյան, եթե լուրերը խեղաթյուրված են ու անհիմն, ապա ինչո՞ւ պիտի նման տեղեկություններ շրջանառվեին։

- Ես կարծում եմ՝ ինչ-որ անձերի շահեր են ոտնահարվել։

- Ի՞նչ անձանց մասին է խոսքը։

- Ես իմ կարծիքն եմ ասում, նույնիսկ որպես քաղաքացի, ոչ թե պաշտոնյա։ Բայց անուններ չգիտեմ, չեմ կարող ասել։

- Իսկ ինչո՞ւ հենց Երեւանի պետական համալսարանի դիմաց իրականացվող ակցիային գնացիք ու հայտնեցիք, որ ձերբակալված չեք, այն էլ՝ օրվա երկրորդ կեսին միայն։

- Որովհետեւ ես ունեմ ծառայություն, էն ինչ շրջանառվում էր, որ իբր ձերբակալված ենք եւ այլն, ես կոռեկտ չէի համարի, որ որպես անձ հանդես գայի, որովհետեւ կարծում էի, որ մեր մամուլի ծառայությունը դիրքորոշում կհայտնի, որը մի քիչ ուշ եղավ։ Բայց ԵՊՀ գնալու իմ նպատակն այն էր, որ ինչ-որ անձ, եթե չեմ սխալվում Նարեկ անունով, կարմիր բաճկոնով մի երիտասարդ (խոսքը  ՀՀ նախկին ոստիկանապետ Վլադիմիր Գասպարյանի նախկին խորհրդական Նարեկ Մալյանի մասին է,-հեղ․), միկրոֆոնը ձեռքին ասում էր՝ տեսեք՝ ԵՊՀ-ում ովքեր են ուսումնասիրություն իրականացնում, ԵՊՀ-ում ուսումանսիրություն անող հանձնաժողովի ղեկավարը երեկ ձերբակալվել է, եւ այլն։ Դա արդեն վիրավորանք էր իմ ու իմ ստորաբաժանման հասցեին, եւ ես գնացի բոլորի դիմաց այդ հերյուրանքները հերքելու։

- Հնարավո՞ր եք համարում, որ շրջանառվող տեղեկությունները ԵՊՀ-ում իրականացրած ուսումնասիրությունների հետ ունեն ինչ-որ առնչություն։

- Չգիտեմ, չեմ կարծում, իրենք ուղղակի շահարկում էին այդ ապատեղեկատվությունը, որը նաեւ իրենք են հրապարակել։

- Նկատի ունեք ակցիա իրականացնողներին եւ հրապարակումն արած Analitik.am կայքի՞ն։

- Կխնդրեմ, որ ԱԱԾ-ին ասեք՝ ինչ-որ կայք, օրինակ, Analitik․am-ը ձեր անունից հրապարակումներ է անում, չեք ուզո՞ւմ պարզել՝ ինչու է նման սուտ բաներ տարածում։ Այսինքն՝ եթե ինչ-որ մեկն իմ անունից դուրս գա ու սուտ հայտարարություններ անի, ես դրա դեմը կառնեմ ու կասեմ՝ դու ո՞վ ես իմ անունից բան խոսես, մարդիկ ԱԱԾ-ի անունից հայտարարություններ են տարածում, եւ որեւէ մեկը չի ասում՝ Analitik.am, ո՞վ եք դուք, որ մեր անունից հայտարարություն անեք։ Կարող է իսկապե՞ս ասում են իրենց մոտ կանգնած աղբյուրները, նման բան թույլատրելի չէ։ Կարող է վեր կենան, ասեն՝ մեր աղբյուները ասում են, որ էսինչը հայրենիքի դավաճան է, նման բանը թույլատրելի է՞։

- Պարոն Ադյան, ի վերջո, դուք տեղեկություն ունե՞ք, ձեր ծառայության ղեկավար Դավիթ Սանասարյանին հրավիրե՞լ են ԱԱԾ։

- Ոչ, միանշանակ ոչ։

Հ․Գ․ Ինչ վերաբերում է Պետական վերահսկողական ծառայության՝ ձերբակալված համարվող մյուս աշխատակիցներին՝ այդ թվում իր ազգակից Սամվել Ադյանին, ՊՎԾ վարչության ղեկավարն ասաց, որ ինքը մյուսների մասով իրավասու չէ որեւէ բան ասել։