Օպերայի ստորգետնյա ավտոկայանատեղին կարող է հանձնվել հավատարմագրային կառավարման. ժամկետը՝ 10 տարի

Երեւանի ավագանին այսօր արտահերթ նիստ է գումարել՝ օրակարգում ունենալով երկու հարց: Դրանցից մեկը վերաբերում է Ազատության հրապարակում գտնվող ստորգետնյա ավտոկայանատեղին հավատարմագրային կառավարման հանձնելուն: Համապատասխան որոշման նախագծով առաջարկվում է թույլատրել Երեւանի քաղաքապետին՝ օրենսդրությամբ սահմանված կարգով հայտարարել մրցույթ:

Քաղաքապետարանի զարգացման եւ ներդրումային ծրագրերի վարչության պետ Տիգրան Սարգսյանը նշեց, որ որպես արդյունք ակնկալվում ու նախատեսվում է բարձրացնել կառավարման արդյունավետությունը, ավելացնել ավտոկայանատեղիից օգտվողների թիվը, բարձրացնել մատուցվող ծառայությունների որակը, մեծացնել ֆինանսական մուտքերը, բարձրացնել սպասարկման ծախսերի արդյունավետությունը, նպաստել երթեւեկության բարելավմանը եւ ինչու չէ նաեւ որոշակիորեն նպաստել փոքր կենտրոնում խցանումների նվազեցմանը:

Երեւան քաղաքի փոքր կենտրոնը տրանսպորտային միջոցների կայանումից ազատելու եւ ստացիոնար կայանատեղեր ապահովելու նպատակով Ազատության հրապարակում կառուցված ստորգետնյա եռահարկ ավտոկայանատեղին նախատեսված է շուրջ 500 ավտոմեքենայի համար: Ավտոկայանատեղիի պաշտոնական բացումը կազմակերպվել է 2010 թվականին: 2011 թվականից դրա աշխատանքները գործակալության պայմանագրով սահմանված կարգով իրականացրել է «Երեւանտրանս» ՓԲԸ-ն: Բայց պայմանագրի ժամկետն արդեն լրացել է, եւ քաղաքապետարանը փաստորեն նպատակահարմար չի գտնում նոր պայմանագիր կնքելը:

Ըստ Ազատության հրապարակի ստորգետնյա ավտոկայանատեղին հավատարմագրային կառավարման հանձնելու մասին որոշման նախագծում նշված տեղեկության՝  2013-2018թթ. ֆինանսական ցուցանիշների համեմատական վերլուծությունը ցույց է տալիս, որ ավտոկայանատեղին գործում է թերբեռնված՝ հատկապես ձմռան ամիսներին: Նոյեմբեր-ապրիլ ժամանակահատվածում ավտոկայանատեղիից օգտվողների թիվը զգալիորեն ավելի փոքր է մայիս-հոկտեմբեր ամիսների համեմատությամբ՝ պայմանավորված հարակից սրճարանների գործունեության սեզոնային ակտիվությամբ:

Նշվում է, որ շուրջ 10 տարի առաջ տեղադրված գործող տեսահսկման համակարգն ունի արդիականացման խիստ անհրաժեշտություն: Տեղադրված տեսախցիկների հնարավոր նկարահանման մակերեսը սահմանափակված է միայն ճանապարհներով՝չընդգրկելով բուն կայանատեղերը: Միաժամանակ տեսախցիկների որակական հատկանիշները թույլ չեն տալիս հստակ ֆիքսել մեքենաների համարանիշները: Համակարգի արդիականացման արդյունքում նախատեսվում է տեղադրել նոր, ժամանակակից տեսախցիկներ՝ որակական բարձր չափանիշներով, որը հետագայում կարող է օգտագործվել «Խելացի» կառավարման համակարգի շրջանակում: Նախատեսվում է ներդնել ավտոկայանատեղիի մուտքի եւ ելքի ավտոմատ կառավարման եւ վճարման համակարգ, ինչպես նաեւ կատարել վերանորոգման աշխատանքներ:

Ավտոկայանատեղի շահագործման օրվանից առ այսօր լուսավորության համակարգն էական փոփոխության չի ենթարկվել: Նախատեսվում է ամբողջությամբ արդիականացնել լուսավորության համակարգը: Մարկետինգային նպատակային քաղաքականության, ինչպես նաեւ էլետրոնային վճարային համակարգերի ներդրման ու վճարային փաթեթների վերաբերյալ իրազեկման բարձրացման միջոցով նախատեսվում է ավտոկայանատեղիի զբաղվածությունը զգալիորեն մեծացնել:

Նախագծով սահմանվում է, որ մրցույթին իրավունք կունենան մասնակցել այն իրավաբանական անձինք եւ անհատ ձեռնարկատերերը, ովքեր.

1) անշարժ գույքի հավատարմագրային կառավարման ոլորտում ունեն առնվազն երեք տարվա փորձ.

2) վերջին երեք տարվա ընթացքում ունեն տարեկան միջին հաշվարկային առնվազն 300,000,000.0 (երեք հարյուր միլիոն) դրամի շրջանառություն:

Նաեւ սահմանվում է կառավարչի գործունեության արդյունքում առաջացած շահույթից Երեւան համայնքի մասնաբաժնի նվազագույն չափերը՝ ա. առաջին տարին՝ 77 միլիոն դրամ, բ. երկրորդ տարին՝ 85 միլիոն, երրորդ տարին՝ 100 միլիոն դրամ:

Պայմանագիրն ուժի մեջ մտնելուց հետո հավատարմագրային կառավարչի գործունեության չորրորդ եւ հետագա տարիներին տարեկան շահույթից Երևանի քաղաքապետարանի մասնաբաժինը պետք է լինի ընդհանուր շահույթի առնվազն 50 տոկոսը, բայց ոչ պակաս, քան 100 միլիոն դրամ:

Ազատության հրապարակի ստորգետնյա ավտոկայանատեղին նախատեսվում է հավատարմագրային կառավարման հանձնել 10 տարով: