Հսկիչին հարցրել են՝ աղետի դեպքում ինչ ես անելու, ասել է՝ փախնելու եմ. դպրոցներում քաղպաշտպանություն առարկա կներառեն

ԱԻՆ-ն առաջարկում է դպրոցական ծրագրում Քաղաքացիական պաշտպանության առարկա ներառել: Այսօրվա ասուլիսի ընթացքում հայտնեց արտակարգ իրավիճակների նախարար Ֆելիքս Ցոլակյանը: Ըստ Ցոլակյանի՝ մտածելու տեղիք է տալիս տարբեր հանրային վայրերում եւ տարբեր հաստատություններում քաղաքացիական պաշտպանության կազմակերպման հետ կապված տխուր վիճակը:

«Օրինակ հանրային վայրերը, սուպերմարկետները, տարբեր հաստատությունները: Կան փրկարարական աշխատանքներ անցկացնելու ծրագրեր: Սակայն գործնականում դա միշտ չէ, որ համընկնում է տեսության հետ: ԿԳՆ-ն ընդունել է ԱԻՆ-ի՝ դպրոցական ծրագրում Քաղաքացիական պաշտպանության առարկա ներառելու մասին առաջարկը: Նախնական ռազմական պատրաստության մասին առարկան բավական չէ, այդ դասընցացները պետք է անցկացնեն մասնագետները»- նշեց Ցոլակյանը:

ԱԻՆ-ն առաջարկում է, որ առարկան դասավանդեն մասնագետ փրկարարները, այդ թվում ԱԻՆ-ի վետերանները: Ցոլակյանը որպես օրինակ բերեց սուպերմարկետների հսկիչներին, ասելով, որ շատ դեպքերում այնտեղ աշխատանքի են անցնում տնօրենի ծանոթները կամ բարեկամները եւ պատմեց զավեշտալի դեպք, երբ սուպերմարկետի հսկիչներից մեկին հարցրել են, թե ինչ է անելու, եթե աղետ լինի, վերջինս պատասխանել է՝ փախնելու եմ:

Ըստ նախարարի՝ ԱԻՆ-ում էլ գործառույթներ կան, որ պարզ չէ, թե կոնկրետ որ մասնագետը պիտի անի, ամեն մի կառույց պետք է կոնկրետ իմանա իր անելիքը եւ դա կատարի պատշաճ ու օպերատիվ կերպով: Փրկարար ծառայության կանխարգելող դերը պետք է բարձրացնել, նրա հիմնական գործառույթներից մեկը պետք է դա դառնա, այլ ոչ թե հետքեր վերացնել, ինչն անհամեմատ ավելի կարեւոր է: «Կառավարությունում հարց եմ բարձրացրել, որպեսզի Քաղպաշտպանության եւ բանապահպանության ոլորտը եւս ԱԻն-ը կոորդինացնի, այդ ուղղությամբ աշխատանք է տարվում»,-ասաց Ցոլակյանը: