Դա պլանավորված հարձակում էր՝ կապված իմ հրապարակային քաղաքական գործունեության հետ․ Ս․ Սաֆարյանը՝ իր վրա հարձակման մասին

«Երեկ կատարվածը կողոպուտի փորձ չէր, պլանավորված չէր որպես կողոպուտ կամ այդ կերպ նախազգուշացում կամ սարսափեցում. լիարժեք քննությունը ցույց կտա, որ դա կատարյալ պլանավորված հարձակում էր, կապված իմ հրապարակային քաղաքական գործունեության հետ, որը ձախողվեց ու կողոպուտի դրսեւորում ստացավ մի քանի պատճառներով»,- ֆեյսբուքյան իր էջում գրառում է կատարել քաղաքագետ Ստյոպա Սաֆարյանը՝ անդրադառնալով երեկ երեկոյան իր բնակարանի մուտքի մոտ տեղի ունեցած միջադեպին, որտեղ երկու անձ հարձակվել էին Սաֆարյանի վրա, գողացել նրա հեռախոսը:

Սաֆարյանը գրել է, որ պլանավորած հարձակումը ձախողվեց ու կողոպուտի դրսեւորում ստացավ մի քանի պատճառներով․

«1. Նրանցից մեկը, որն ինձ սպասում էր աստիճանահարթակին, դեմքով դեպի շքամուտքի դուռը, արագ զգաց, որ ես կասկածանք ունեի իր հանդեպ ու ուշադիր նայեցի իրեն, ինչը հազվադեպ բան է իմ վարքագծում։

2․ Նրանց պլանները ձախողեց տեղանքում ու մթության մեջ վատ կողմնորոշվելը. ի տարբերություն ինձ՝ երկուսն էլ մթության մեջ վատ էին կողմնորոշվում եւ տարածքը վատ գիտեին. նրանք զգացին, որ առաջինն իմ ուշադրությունը դեպի իրենց շրջեցին այն բանից հետո, երբ մուտք ներխուժած երկրորդը ահռելի բոյով մեկ /երկուսն էլ շատ բարձրահասակ էին/ դաժան կերպով հագավ միջանցքում դրված պահարանին, իսկ առաջինը, որ հասցրել էր իբր փակել դեպի երկրորդ հարկ իմ հնարավոր գնալը, հասցրեց հետույքի մեջ մխրճել սուր բազրիքը: Այս ամենը տեղի էր ունենում գրեթե միաժամանակ ու հերթականությամբ հայացքս ուղղում դեպի նախ պահարանը գրկածին, ապա հետույքով բազրիքի սուր երկաթը հայտնաբերածին: Ես բավարար չափով տեսա երկուսին էլ ու զգացի նրանց մտադրությունները:

3․ Իմ անակնկալ պահվածքը. որքան էլ այդ պահին երկու ձեռքերս ծանրաբեռնված էին խանութից կատարված գնումների տոպրակներով, իմ արագ՝ դեպի իրենց շրջվելն ու հեռախոսը գրպանիցս հանելը, լապտերիկը միացնել փորձելը փոխեց նրանց պլանները: Նրանք ամենայն հավանականությամբ վախեցան, որ ես կնկարեմ դեմքերը: Ավելին, ֆիզիկական հարձակման դեպքում բնականաբար ինքնապաշտպանվելու էի, իսկ ձեռքիս բավական ծանր իրերը բավական լուրջ մարմնական վնասվածքներ հասցելու կատարյալ գործիք էին: Դրա համար արագ ձեռքիցս վերցրեցին։

4․ Վայրկայններ անց թիկունքիցս բացվում էր տան դուռն ու նրանք հայտնվում էին կատարյալ լույսի տակ, կին, հարեւաններ, որոնք վայրկյաններ անց արդեն դրսում էին:

Ահա թե ինչու նրանք ստիպված էին բավարարվել կողոպուտով: Ես վստահ եմ, որ Ոստիկանությունը շատ արագ հայտնաբերելու է թե հեռախոսը, թե կատարողներին: Բայց կանխավ ասում եմ՝ չեմ հավատալու կողոպուտի վարկածին, որը շրջանառության մեջ է հայտնվել ԶԼՄ-ներով, առաջինը, որքան հասկանում եմ, Shamshyan.com-ով:

Իրենք էլ գիտեն, թե ես ինչ հանգամանքեր եմ ներկայացրել իրենց՝  նաեւ գործի ու հնարավոր առնչվող տարբեր անձանց մասով: Այնպես որ՝ սպասում եմ կատարյալ մերկացումների: Սա շարքային 2 ջեբկիրի արարք չէր, այլ բավական մեծաթիվ բանդայի արած, որը թաքնվում է նորաստեղծ տարատեսակ քաղաքական անվանումների տակ, բայց միով բանիվ Ռոբերտ Քոչարյանի հանցավոր խաղի խամաճիկներից են:

Եթե Ոստիկանությունը շատ ուզեցավ, լիքը կապիկների դեմքեր է պայթելու: Նրանք հավանաբար այս պահին չէն էլ մտածում, որ իրենց մասին «մտածում ենք»... Իսկ մենք գիտենք իրենց մասին, իրենց կապերի մասին:

Գրկում եմ բոլորիդ, մենք ընտանյոք հանդերձ լավ ենք, մի անհանգստացեք, կատարվածն առիթ դարձավ, որ այսօր կարգին հանգստանամ իմ տանը»,- եզրափակել է պարոն Սաֆարյանը։

Ավելի վաղ հայտնել էինք, որ երեկ՝ սեպտեմբերի 6-ին, Երեւանում կողոպուտի է ենթարկվել Միջազգային եւ անվտանգության հարցերի հայկական ինստիտուտի հիմնադիր-ղեկավար, քաղաքագետ Ստյոպա Սաֆարյանը։ Երեկոյան ժամը 22։50-ի սահմաններում, իր բնակարանի մուտքի դռան մոտ իրեն անծանոթ 2 անձինք են մոտեցել Սաֆարյանին, որոնցից մեկը նրան մեջքից հրել է, իսկ մյուսը ձեռքից հափշտակել է «iPhone 8» տեսակի բջջային հեռախոսը եւ դիմել փախուստի։

Ստյոպա Սաֆարյանի ահազանգով դեպքի վայր է ժամանել ոստիկանության Նոր Նորքի բաժնի օպերատիվ խումբը։ Նախապատրաստվում են նյութեր։

Ստյոպա Սաֆարյանի քույրը՝ փաստաբան Սեդա Սաֆարյանը, նույն օրը երեկոյան պետք է գնար եղբոր տուն, սակայն ինչ-ինչ պատճառներով չի բարձրացել բնակարան, իր տղայի մեքենայով գնացել է սեփական տուն։ «Հայկական ժամանակ»-ի հետ զրույցում տիկին Սաֆարյանն ասաց, որ մինչեւ գնալը ճանապարհին նկատել է երկու սեւազգեստ տղաների, նրանց տեսել է նաեւ իր որդին։ Մեր զրուցակցի պնդմամբ՝ եթե դրանք հասարակ կողոպտիչներ լինեին, ապա իրենց մոտ եւս իրեր են եղել, սակայն նրանք շենքի չորս մուտքերից կանգնած են եղել հենց Ստյոպա Սաֆարյանի բնակարանի մուտք դռան մոտ։