«Կանդամակցեմ միմիայն Հանրապետականին». ես բռիլյանտով բուրան չունեմ

Տպագրվել է «Հայկական Ժամանակ» օրաթերթի՝ 2006 թվականի նոյեմբերի 9-ի համարում

Հարցազրույց Մաքսային պետական կոմիտեի նախագահ Արմեն Ավետիսյանի հետ 

- Պարոն Ավետիսյան, խորհրդարանի այսօրվա արտահերթ նիստում քննարկվելու է «Մաքսային ծառայության մասին» օրենքում փոփոխություն կատարելու նախագիծը։ Առաջարկվող փոփոխությունից հետո մաքսային ծառայողը եւս կարող է դառնալ կուսակցական, ինչը գործող օրենքով արգելվում է։ Ճի՞շտ են լուրերը, որ օրենքի փոփոխությունից հետո դուք եւ համակարգի մեծ թվով աշխատակիցներ համալրելու եք Հանրապետական կուսակցության շարքերը։

- Երբ օրենքը խորհրդարանը կընդունի, եւ թույլ կտան, որ մենք անդամակցենք որեւէ կուսակցության, այդ ժամանակ էլ կմտածենք։ Իսկ ես, բնականաբար, եթե դառնամ կուսակցական, ապա կանդամակցեմ միմիայն Հանրապետականին, որը ինձ հոգեհարազատ է։ 

- Կոնկրետ ինչո՞վ է հոգեհարազատ։

- Հանրապետականն այսօր կառավարող կուսակցություն է, ես էլ ծառայում եմ այս պետությանն ու պետական չինովնիկ եմ։ Եթե այդ կուսակցության դիրքորոշումը ինձ հոգեհարազատ չլիներ, անբարոյական կլիներ իմ կողմից այդ ծրագրերի իրականացմանը մասնակցելը։ Եւ եթե օրենքն ընդունվի, ու ես դառնամ Հանրապետական կուսակցության անդամ, ապա որպես անհատ՝ աշխատելու եմ իմ կուսակցության համար։ Իսկ մինչ օրենքի փոփոխությունը իմ բոլոր կառույցների ղեկավարներին` մինչեւ վերջին տեսուչը, կոնկրետ ցուցում է տրված, որ որեւէ կուսակցության հետ կապված քայլ չանեն։ Ցանկացածին կպատժեմ, եթե մինչեւ օրենքը որեւէ մեկը հարի որեւէ կուսակցության. ընդհուպ՝ Հանրապետականին։

- Այսինքն, հենց օրենքն ընդունվեց, մաքսային ողջ համակարգին  ստիպողաբար դարձնելու եք ձեզ հոգեհարազատ հանրապետակա՞ն։

- Մենք արդեն նախադեպ ունենք, թե ստիպողաբար կուսակցություն մտածները իրենց ինչպես են պահում։ Իսկ Հանրապետականն իր իմիջով այնքան բարձր է, որ իմ լոբբինգի կարիքը չի զգում։   

- Չե՞ք վախենում, որ հենց դարձաք հանրապետական, անմիջապես  հայտնվելու եք ՀՀԿ-ի կրիմինալ հատվածում։ Հատկապես, որ ըստ «Հակակրիմինալի» սեւ ցուցակի, ձեր անունը այնտեղ Սերժ Սարգսյանի կողքին է։

- Ես վախենալու քիչ բան ունեմ, ինչպես նաեւ ձեր նշած անձը, որովհետեւ պիտակներ կպցնելով` ոչինչ չի որոշվում։ Նման պիտակներ կպցնողները պարզապես թույլ եւ անօգնական մարդիկ են, որոնք այլ այիբներ չեն գտնում եւ իրենց համար զբաղմունք են հորինել։

- Բայց կրիմինալ համարվելը բավականին լուրջ այիբ է։ Օրինակ, թերթերից մեկը գրեց, որ ձեր բուրանը արժե 40 հազար դոլար։ Որտեղի՞ց պետական չինովնիկին այդքան փող։

- Իմ ասածն այն էր, որ այլ այիբ չեն գտել եւ փորձում են այնպիսի բաներ վերագրել մարդկանց, որոնք ուղղակի անհեթեթություն են։ Ինչ վերաբերում է  բուրանին, ապա ես բուրան ունեմ, բայց այդ գրողներին խորհուրդ կտայի ինտերնետի գոնե մեկ էջ բացել եւ այնտեղ 40 հազար դոլարանց բուրան գտնել։ Աշխարհում նման բուրան չկա, եթե, իհարկե, վրան բռիլյանտներ շարած չեն։ Ամենաթանկ բուրանը «Բամբարդիրն» է, որը արժե 9.5 հազար դոլար։

- Ձեր բուրանի վրա, փաստորեն, բռիլյանտներ չկան շարած։

- Ոչ, բուրանի վրա շարած չկան։

- Պարոն Ավետիսյան, այս տարվա բյուջեում 70 միլիարդ դրամով բյուջեի եկամտային մասը ավելանալու է։ Դա նշանակո՞ւմ է, որ ընտրությունների համար փող է պետք։ Որտեղի՞ց եք բերելու այդ գումարները։

- Բնականաբար, մեր հարկատուներից։

- Իսկ ինչո՞ւ մինչեւ հիմա չէիք բերում, եւ ո՞ւր էին այդ հարկատուները։

- Իսկ ե՞րբ է եղել, որ բյուջեն սահմանվել է ու չի կատարվել։ Վերջին հինգ տարում մենք բյուջեն պրոֆիցիտով ենք կատարել։ Միշտ էլ մաքսային ու հարկային ծառայությունները այս ամիսներին սկսում են տրտնջալ, որ դժվար է, շատ է, բայց տարվա վերջին զեկուցում ենք, որ բյուջեն գերակատարված է։ Ինչ վերաբերում է նախընտրական ծախսերին, ապա բյուջե բերված գումարը նախընտրականի վրա կծախսվի այնքան, ինչքան բյուջեն նախատեսում է։ Իսկ այն, ինչ դուք նկատի ունեք, դա արդեն բոլորովին այլ հարց է։

 - Պարոն Ավետիսյան, վերջերս մի հարցման համաձայն դուք հանրապետության ամենաթանկ հագնվող պաշտոնյաներից եք։ Դարձյալ «Զիլի՞» եք հագնում, թե՞ արդեն անցել եք ավելի թանկ «Բեռլուչիին»։

- Ոչ, ես դեռ «Զիլի» եմ հագնում եւ «Բեռլուչիի» դեռ չեմ անցել։

-Իսկ ձեր կոստյումները մաքսազերծվո՞ւմ են։

- Ոչ, չեն մաքսազերծվում, որովհետեւ ես մեկ հատով եմ բերում։ Իսկ մեկ կամ երկու հատը առեւտրային քանակ չէ։

- Եւ, այնուամենայնիվ, դուք վեց հազար դոլարանոց «Կուռվազյե» կոնյակը խմե՞լ էիք, թե՞ ոչ, ինչի համար ձեզ մեղադրում էին որոշ պատգամավորներ։

- Ես ինքս թերթից եմ իմացել, որ նման կոնյակ կա, ուղարկել եմ՝ բերել են, տեսել եմ, տուփը վատը չէր, ու կրկին ետ եմ ուղարկել խանութ։ Եւ եթե հետաքրքրվեք, կիմանաք, որ այդ կոնյակից ընդամենը 3 հատ է ներկրվել հանրապետություն, ու մինչ ձեր հրապարակումը այդ 3-ն էլ խանութում դրված են եղել։

Նաիրա Զոհրաբյան