Հանրապետական «պապայափոխություն». ՀՀԿ-ին պետք է նոր «վոժակ»

Տպագրվել է «Հայկական Ժամանակ» օրաթերթի՝ 2006 թվականի նոյեմբերի 16-ի համարում

Երբ երեքշաբթի օրը ԱԺ նախագահ, ՀՀԿ փոխնախագահ Տիգրան Թորոսյանը չեղյալ հայտարարեց «Հասարակության եւ պետության կարիքների համար սեփականության օտարման մասին» նախագծի քվեարկությունը, որի նորմալ ընթացքի համար ՀՀԿ-ն մոբիլիզացրել էր իր ողջ պատգամավորական ներուժը, քվեարկությունից անմիջապես հետո մանթրաշ հանրապետականները ողջ շենքով ընկած՝ Տիգրան Թորոսյան էին ման գալիս։ Մի քանի հանրապետական նույնիսկ բարձրացան նրա աշխատասենյակ՝ բացատրություն պահանջելու համար, սակայն Թորոսյանն արդեն հասցրել էր նստել իր ծառայողական մեքենան ու շարժվել օդակայան՝ Սանկտ Պետերբուրգ մեկնելու համար։

Ո՛չ ՀՀԿ խմբակցության նախագահ Գալուստ Սահակյանը եւ ո՛չ էլ խմբակցության պատգամավորները, որոնք սպառնում էին Թորոսյանին «սամասուդ» անել, չհասցրեցին նրանից բացատրություն ստանալ, թե ինչո՞ւ նա, ինչպես ձեւակերպեցին խմբակցությունում, պարեց ընդդիմության դուդուկի տակ։ Կամ, ինչպես անմիջապես քվեարկությունից հետո հայտարարեց խմբակցության ղեկավար Գալուստ Սահակյանը՝ «Պետք չէ ընդդիմության քյամանչան առած նվագել»։ Մինչդեռ, Տիգրան Թորոսյանը չեղյալ չէր հայտարարի  քվեարկությունը, եթե չլինեին Գալուստ Սահակյանն ու ՀՀԿ գործարար պատգամավորների թիմը, որոնք, անտեսելով Թորոսյանի բազմակի հորդորները՝ չքվեարկել ուրիշի փոխարեն, դեմոնստրատիվ չէին կատարում սեփական կուսակցի խնդրանքը։

Թորոսյանը քվեարկությունը չեղյալ հայտարարեց Գալուստ Սահակյանի այն հայտարարությունից հետո, թե քվեարկությունն արդեն կայացել է, ու այն կրկնելու անհրաժեշտություն չկա։ Եւ քանի որ ՀՀԿ խմբակցության պատգամավորների համար միշտ «ասնավանի» է եղել ԱԺ նախագահից կարգավիճակով ցածր Գալուստ Սահակյանի խոսքը, ինչը, ի դեպ, միշտ առաջացրել է Թորոսյանի բողոքը,  ուստի «սխալ» հանելով Գալուստ Սահակյանին եւ նրա հրահանգի ուղիղ հակառակն անելով` Թորոսյանն այդ օրը հասկացրեց, թե ո՞վ է խորհրդարանում իրական տերը, եւ ո՞ւմ պետք է այսուհետ ենթարկվի հանրապետական զանգվածը։

Բնականաբար, Սահակյանի հետեւորդները, որոնք ժամանակին ուզում էին տապալել ԱԺ նախագահի պաշտոնում Թորոսյանի ընտրությունը, դա չեն պատրաստվում մարսել, եւ հենց ԱԺ նախագահը վերադառնա ՌԴ-ից, նրան, մեր տեղեկություններով, բավականին լուրջ ռազբորկա է սպասվում հարազատ խմբակցությունում։ Բացի նրանից, որ Թորոսյանը հրապարակավ, ըստ էության, նվաստացրեց Գալուստ Սահակյանին ու դա արեց ընդդիմության ծափերի տակ, ՀՀԿ խմբակցությունը Թորոսյանի հետ եւս մեկ հարց  ունի ճշտելու։ Ըստ մեր զրուցակից ՀՀԿ-ականների, թռնելով ՌԴ եւ նման կարեւորագույն հարցի քվեարկությունը թողնելով Վահան Հովհաննիսյանի վրա` դրանով Թորոսյանը փորձեց խորհրդարանի շենքը շրջափակած ցուցարարների մոտ մաքուր դուրս գալ եւ ողջ կեղտը բարդել ՀՀԿ-ի վրա։

Ի դեպ, այս հարցում վերջիններս այնքան էլ չէին սխալվում, որովհետեւ երեկ ԱԺ Դեմիրճյան մուտքի մոտ հավաքված ցուցարարները, թքելով ներս մտնող հանրապետականների վրա, հատուկ շեշտում էին, որ նրանց միջի միակ տղամարդը Տիգրան Թորոսյանն է: «Իրեն սուպերկուսակցություն հռչակած Հանրապետականում միակ տղամարդը Թորոսյանն է։ Մնացածները ղազեր են»,- ներս մտնող պատգամավորների ետեւից գոռում էին ցուցարարները։

Փաստորեն, հայկական քաղաքական վերնախավում հայտնվեց եւս մեկ միակ տղամարդ, որին այդ կոչումը շնորհվեց Կենտրոնի իրացման գոտիների մի քանի հարյուր ցուցարարների կողմից։ Ուստի, արդեն իսկ կարելի է պատկերացնել, թե մի քանի օրից ի՞նչ որակի ռազբորկա է սպասվում Տիգրան Թորոսյանին իր այն կուսակիցների հետ, որոնք, գաղտնիք չէ, առանձնապես մեծ կարծիքի չեն Թորոսյանի՝ հատկապես տղամարդկության մասին։

Այսպիսով, պետության համար գերակա շահի օրենքի քվեարկության չեղյալ հայտարարումից հետո ՀՀԿ խմբակցությունում լրջորեն դրված է նոր առաջնորդի  խնդիրը։ Կա՛մ Գալուստ Սահակյանն ու իր խմբակցությունն այսուհետ ընդունում են, որ խորհդարանի ներսում միակ «պապան» այլեւս Տիգրան Թորոսյանն է, որը երեքշաբթի օրը, օրվա երկրորդ կեսից այդ կարգավիճակը հրապարակավ, ծափերի ներքո «ատբիտ» արեց ՀՀԿ խորհրդարանական բազմամյա «պապա» Գալուստ Սահակյանից, կա՛մ խմբակցությունը կկարողանա Թորոսյանին իջեցնել իր դե ֆակտո կարգավիճակին։ Իսկ այդ կարգավիճակը, եթե հիշում եք, այն էր, որ գլխավոր դատախազը հարկ չէր համարում օրենքով սահմանված կարգով ԱԺ նախագահին տեղեկացնել պատգամավորի ձերբակալության մասին, իսկ արդարադատության նախարար Դավիթ Հարությունյանը, նույնիսկ Թորոսյանի միջնորդությունից հետո, պատգամավորին թույլ չտվեց մտնել քրեակատարողական հիմնարկ։

Դատելով Գալուստ Սահակյանի հետ զրույցից՝ նա այս հարցն այդպես չի թողնելու, եւ խմբակցությունով Թորոսյանից պարզաբանում են պահանջելու: «Իհարկե, հիմա փորձ կարվի ինչ-որ ինտրիգներ եւ պրովոկացիաներ տեսնել տեղի ունեցածում, սակայն ես չեմ ուզում այս հարցը այդքան լրջացնել։ Ես կարծում եմ, որ քվեարկությունը տեղի էր ունեցել, եւ մի քանի անճշտությունը չէր ազդել ընդհանուր արդյունքի վրա։ Տիգրան Թորոսյանն այլ կարծիքի էր եւ հանդուրժողականության ժեստ արեց ընդդիմությանը, որը ինձ համար ընդունելի չէ։ Նիստից անմիջապես հետո նա մեկնեց օդակայան, բայց վերադառնալուն պես այդ հարցը նրա հետ անպայման կպարզաբանվի»,- ասաց ՀՀԿ խմբակցության ղեկավարը։

Այս պատմությունը հանգուցալուծեց ՀՀԿ նախագահ Անդրանիկ Մարգարյանը, որը երեկ իր թիմին հասկացրեց, որ այսուհետ խորհրդարանում իրենց «վոժակը» Տիգրան Թորոսյանն է։ Որովհետեւ մեր այն հարցին, թե այս պատմության մեջ ինքը ո՞ւմ տեսակետն է պաշտպանում՝ Գալուստ Սահակյանի՞, թե՞ Տիգրան Թորոսյանի, Անդրանիկ Մարգարյանն ասաց. «Ինչ որ անում է Ազգային ժողովի նախագահը, ճիշտ է անում»։ Փաստորեն, ՀՀԿ խորհրդարանական խմբակցությունում տեղի ունեցավ սահուն ու գրեթե թավշյա իշխանափոխություն։ Իսկ թե արդյո՞ք վարչապետի խոսքը  «ասնավանի» է ՀՀԿ խմբակցության պատգամավորների համար, ցույց կտան առաջիկա իրադարձությունները։   

Նաիրա Զոհրաբյան